នៅ​ថ្ងៃ​នេះ សារព័ត៌មាន​អូស្រ្ដាលី​មួយ​ឈ្មោះ​ Brisbane Times ចុះ​ផ្សាយ​តាម​អ៊ីនធើរណិត​រាយការណ៍​ថា មហាសេដ្ឋិនី​អូស្រ្ដាលី​លោក​ស្រី Gina Rinehart បាន​លាលែង​ចេញ​ពី​តំណែង​គណៈកម្មាធិការ​ផ្ដល់​ឱវាទ​ផ្នែក​ជំនាញ​ នៃ​អង្គការ​កម្ពុជា​អូស្រ្ដាលី​មួយ​មាន​ឈ្មោះ​ថា SISHA ដែល​ធ្វើ​ការ​ប្រឆាំង​នឹង​ការ​ជួញ​ដូរ​មនុស្ស​នៅ​ក្នុង​ប្រទេស​កម្ពុជា​។

លោក​ស្រី​គឺជា​ម្ចាស់​អំណោយ​​ដ៏​ចម្បង​ម្នាក់​ដែល​​បរិ​ច្ចាគ​ប្រាក់ទៅ​អង្គការ​នេះ។ ឥឡូវ​អង្គការ​នេះ កំពុង​ទទួល​ការ​ពិនិត្យ​សើរើ​បញ្ជី​ពី​សវនករ​ឯករាជ្យ​លើ​កិច្ចការ​ហិរញ្ញវត្ថុ។

កាសែត​នេះ​ក៏​បាន​លើក​ឡើង​ដែរ​ថា លោក Steve Morrish អតីត​ប៉ូលិស​នៅ​ក្រុង​មែលប៊ិន និង​ជា​នាយក​ប្រតិបត្ដិ​ និង​ស្ថាបនិក​អង្គការ​នេះ​បាន​លាចេញ​ពីតំណែង​កាល​ពី​ព្រឹក​ថ្ងៃ​សុក្រ​ នៅ​ក្នុង​ខណៈ​មាន​ការ​ចោទ​ប្រកាន់​ថា មាន​ការ​ប្រើ​ប្រាស់​ថវិកា​ខុស​បែប​បទ​។ យ៉ាង​ណា​ក៏​ដោយ​ លោក​នៅ​តែ​បន្ដ​បដិសេធ​ចំពោះ​ការ​ចោទ​ប្រកាន់​ទាំង​នោះ។

អតីត​បុគ្គលិក​ជា​ច្រើន​នៃ​អង្គការ​នេះ​អះ​អាង​ថា ប្រាក់​រាប់​ម៉ឺន​ដុល្លារ​ដែល​គេ​គ្រោង​ទុក​យក​ទៅ​ប្រើ​ប្រាស់​លើ​កម្មវិធី​របស់​អង្គការ​រួម​ទាំង​កម្មវិធី​មូលនិធិ​ផ្ដល់​អាហារូបករណ៍​ Hope Scholarship Fund សម្រាប់​ក្មេង​ស្រី​រង​គ្រោះ​ផង​នោះ ត្រូវ​គេ​បង្វែរ​យក​ទៅ​ប្រើ​ក្នុង​ប្រតិបត្ដិការ​ចំណាយ​របស់​អង្គការ​ទៅ​វិញ​មាន​ដូច​ជា​យក​ទៅ​បង់​ប្រាក់​ខែ​បុគ្គលិក, បង់​ថ្លៃ​ជួល​ការិយាល័យ​នៅ​ក្រុង​ភ្នំពេញ និង​នៅ​ប្រទេស​ថៃ, ចំណាយ​លើ​ការ​ធ្វើ​ដំណើរ, រថយន្ដ និង​ចំណាយ​ផ្សេងៗ​ទៀត។

របាយការណ៍​នេះ ក៏​ឲ្យ​ដឹង​ផង​ដែរ​ថា លោក​ស្រី Gina Rinehart ទើប​ដឹង​រឿង​នេះ​កាល​ពី​ពេល​ថ្មីៗ​នេះ។ លោក​ស្រី​បាន​បដិសេធ​មិន​ព្រម​ប្រាប់​ឲ្យ​ដឹង​ថា តើ​លោក​ស្រី​បាន​បរិច្ចាគ​ប្រាក់​ច្រើន​ប៉ុន​ណា​​​ទៅ​ឲ្យ​អង្គការ SISHA នេះ ឬ​ក៏​ថា​តើ​លោក​ស្រី​ពេញ​ចិត្ដ​ប៉ុនណា​ចំពោះ​របៀប​នៃការ​ចាយ​វាយ​​ប្រាក់​របស់​លោក​ស្រី​។

យ៉ាង​ណា​ក៏​ដោយ​លោក​ស្រី​ថា លោក​ស្រី​មាន​ការ​ពេញ​ចិត្ដ​ក្នុង​ការ​គាំទ្រ​កម្មវិធី​ផ្ដល់​អាហារូបករណ៍​ និង​ការ​ដែល​កុមារី​ខ្មែរ​ទទួល​បាន​ផល​ប្រយោជន៍​ពី​កម្មវិធី​នេះ។ លោក​ស្រី ក៏​នឹង​បន្ដ​ជួយ​ដល់​កម្មវិធី​នេះ នៅ​ក្នុង​ទម្រង់ផ្សេង​ទៀត​៕

ប្រភពពី  ABC​​ Radio Australia