ចោរចូលគាស់ ទូរដែកក្នុង ក្រុមហ៊ុនលក់ ភីហ្សានៅទឹកល្អក់ទី១ យកប្រាក់អស់ ១ម៉ឺន៦ពាន់ ដុល្លារទៅបាត់
ភ្នំពេញ ៖ មានការភ្ញាក់ផ្អើលមួយបានកើតមានឡើងទាំងព្រឹកព្រលឹមក្នុងខណៈពេលដែលអ្នកគ្រប់គ្រងក្រុមហ៊ុនលក់ភីហ្សាមួយកន្លែងបានឃើញទូរដែកដាក់លុយក្នុងក្រុមហ៊ុនត្រូវជនមិនស្គាល់មុខគាស់ទម្លុះទម្លាយយកលុយអស់ពីទូរប្រមាណ១ម៉ឺន៦ពាន់ដុល្លារនោះ។
គេមិនបានដឹងថាក្រុមចោរបានធ្វើសកម្មភាពគាស់ទូរដែកយកលុយអស់ខាងលើតាំងពីថ្មើរណានោះទេ តែបានបង្កអោយការភ្ញាក់ផ្អើលឡើងកាលពីព្រឹកថ្ងៃទី០៥ ខែសីហា ឆ្នាំ២០១៣ វេលាម៉ោង៧ព្រឹកនៅក្នុងហាងលក់ភីហ្សាផ្ទះលេខ៨៨០Eo ផ្លូវកម្ពុជាក្រោម(128)ក្រុម៤ ភូមិ៤ សង្កាត់ទឹកល្អក់ទី១ ខណ្ឌទួលគោក។
ជនរងគ្រោះត្រូវបានសមត្ថកិច្ចប៉ូលិសប្រាប់អោយស្គាល់ឈ្មោះ ង៉ែត ចំរើន ភេទប្រុស អាយុ២៨ឆ្នាំមុខរបរជាអ្នកគ្រប់គ្រងក្រុមហ៊ុនលក់ភីហ្សាខាងលើ ស្នាក់នៅផ្ទះលេខ១៩៥ ផ្លូវ១៣៨Z ភូមិ៤ សង្កាត់ទឹកល្អក់ទី១ ខណ្ឌទួលគោក។
ក្នុងហេតុការណ៍ខាងលើនេះគេមិនបានដឹងថា ក្រុមល្មើសមានគ្នាប៉ុន្មាននាក់ឡើយបានធ្វើសកម្មភាពគាស់ទម្លុះទម្លាយយកលុយអស់ពីទូរដែកប្រមាណ១ម៉ឺន៦ពាន់ដុល្លារយកទៅបាត់ដោយសុវត្ថិភាព។
ជុំវិញការគាស់យកលុយពីក្នុងទូរដែកនេះត្រូវបានគេអះអាងថា មិនមានសាក្សីណាម្នាក់បានឃើញសកម្មភាពជនល្មើសថាមានគ្នាប៉ុន្មាននាក់ និងបានធ្វើសកម្មភាពតាំងពីថ្មើរណានោះមកទេ តែនៅពេលព្រឹកឡើងក៏ស្រាប់តែបានឃើញទូរដែកត្រូវបានជនមិនស្គាល់មុខគាស់ទម្លុះទម្លាយយកលុយអស់ពីក្នុងទូរប្រមាណ១ម៉ឺន៦ពាន់ដុល្លារនោះបាត់អស់ទៅហើយ ហើយភ្លាមៗនោះអ្នកគ្រប់គ្រងក្រុមហ៊ុនលក់ភីហ្សានេះក៏បានមកដាក់ពាក្យបណ្ដឹងនៅប៉ុស្តិ៍ប៉ូលិសរដ្ឋបាលទឹកល្អក់ទី១ភ្លាមដែរដើម្បីអោយសមត្ថកិច្ចស្រាវជ្រាវតាមចាប់ជនល្មើសមកដាក់ទោសទៅតាមច្បាប់៕ប្រភព កម្ពុជាថ្មី
