ចៅអធិការនិង គ្រូសូត្រស្ដាំនៅ វត្ដប្រាសាទ គោកចកទាស់ គ្នាព្រោះរឿង ចង់បានបុណ្យស័ក្ដិ
ខេត្ដសៀមរាប ៖ មាសប្រាក់ បុណ្យស័ក្ដិ អំណាច ទាំង៣នេះជាតម្រូវការ សម្រាប់មនុស្សលោកមួយចំនួនតែងតែ ប្រាថ្នាចង់បានដើម្បីយកទៅប្រើប្រាស់ជាប្រយោជន៍ផ្ទាល់ខ្លួន មិនថាអ្នកបួស អ្នកកាន់សីល ឬគ្រហត្ថនោះទេ រហូតធ្វើឱ្យមនុស្សទាំងនោះលែងស្គាល់បាបនិង បុណ្យ គុណទោសអ្វីទាំងអស់។
ជាក់ស្ដែងដូចជាទំនាស់ពាក្យសម្ដី មួយបានកើតឡើងអូសពេលជាច្រើនឆ្នាំមកហើយ រវាងព្រះចៅព្រះអធិការនឹង ព្រះគ្រូសូត្រស្ដាំគង់នៅវត្ដប្រាសាទគោកចក ស្ថិតនៅសង្កាត់គោកចក ក្រុង សៀមរាប រហូតមានមន្ដ្រីមន្ទីរធម្មការ ចុះមកដោះស្រាយនិងសម្របសម្រួល ជាបន្ដបន្ទាប់ ប៉ុន្ដែដំណោះស្រាយនោះ ហាក់ដូចជាចាក់ទឹកលើស្លឹកឈូកដដែល ដែលធ្វើឱ្យប្រជាពលរដ្ឋ ពិសេសអ្នកគោរព ព្រះពុទ្ធសាសនារិះគន់ទៅអ្នកបួសទាំង នោះថាជាការបួសសន្សំទ្រព្យ ឬបួស សន្សំបាបទៅវិញទេ ។ ករណីនេះបានកើត ឡើងតាំងពីឆ្នាំ២០០៧មកម្ល៉េះ ក៏ប៉ុន្ដែនៅថ្ងៃទី២៩ ខែសីហា ឆ្នាំ២០១៣នេះ បានផ្ទុះទំនាស់សាជាថ្មីម្ដងទៀត ធ្វើឱ្យ ផ្អើលដល់យាយជីតាជី និងព្រះសង្ឃពេញវត្ដ ។
ជម្លោះដ៏រ៉ាំរ៉ៃនេះត្រូវបានភាគីទាំង សងខាងចោទប្រកាន់គ្នាទៅវិញមកដោយ ព្រះចៅអធិការព្រះនាម រី សុភា បាន ចោទប្រកាន់ព្រះគ្រូសូត្រស្ដាំព្រះនាម ហែម គឹមសាន្ដ គង់នៅវត្ដជាមួយគ្នាថា បានប្រមូលស្នាមមេដៃព្រះសង្ឃដែលគង់ នៅក្នុងវត្ដយកទៅប្ដឹងមន្ទីរធម្មការដើម្បី ដកព្រះអង្គចេញពីព្រះចៅអធិការវត្ដ ។
ព្រះតេជគុណព្រះនាម រី សុភា ព្រះជន្ម៤៣វស្សា គង់នៅវត្ដខាងលើមានថេរ ដីកាកាលពីថ្ងៃទី២៩ ខែសីហាថា ព្រះអង្គ ធ្វើជាចៅអធិការវត្ដនេះរយៈពេល៧ឆ្នាំ មកហើយតាមឋានានុក្រមត្រឹមត្រូវនិង បានកសាងសមិទ្ធផលក្នុងវត្ដជាច្រើនទៀត ផង ។ ព្រះអង្គបន្ដថា ព្រះគ្រូសូត្រស្ដាំព្រះ នាម ហែម គឹមសាន្ដ គង់នៅវត្ដខាងលើ ជាមួយគ្នាបានប្រមូលស្នាមមេដៃព្រះ សង្ឃប្ដឹងទម្លាក់ព្រះអង្គចេញពីចៅអធិការ នេះដើម្បីចង់ធ្វើជាចៅអធិការវត្ដខ្លួនឯងប៉ុណ្ណោះ និងច្រណែនឈ្នានីសខណៈមិន បានធ្វើជាចៅអធិការវត្ដ ។
ឆ្លើយតបនឹងការលើកឡើងនេះព្រះ តេជគុណព្រះនាម ហែម គឹមសាន្ដ ព្រះ ជន្ម៣៣វស្សា ជាគ្រូសូត្រស្ដាំ មានថេរ ដីកាថា ព្រះអង្គមិនមានគំនិតប្រមូល ស្នាមមេដៃប្ដឹងព្រះចៅអធិការវត្ដឱ្យ ចុះចេញពីតំណែងដើម្បីចង់ធ្វើជាចៅ អធិការវត្ដដោយខ្លួនអង្គឯង និងការ ច្រណែនឈ្នានីសនោះទេ ។ ព្រះអង្គបន្ដថា ការមានសង្ឃដីកាបែបនេះ គឺបង្ខូច កេរិ៍ឈ្មោះ និងជាការទម្លាក់កំហុសឱ្យព្រះ អង្គចុះចេញពីតំណែងព្រះគ្រូសូត្រស្ដាំតែ ប៉ុណ្ណោះ ។ ព្រះអង្គបញ្ជាក់ថា ក្នុងមួយ ថ្ងៃៗព្រះអង្គគិតតែបិណ្ឌបាត សូត្រមន្ដ និងធ្វើកិច្ចការវត្ដតែប៉ុណ្ណោះទេ ។
ទាក់ទងនឹងអធិករណ៍ដោយសារបុណ្យ ស័ក្ដិនេះ លោកស៊ឹម តាត់ ជាមន្ដ្រី ធម្មការក្រុងសៀមរាបមានប្រសាសន៍ថា ករណីនេះមានមន្ដ្រីសង្ឃបានចុះដោះ ស្រាយ និងសម្រួលឱ្យព្រះសង្ឃទាំង២អង្គ នោះត្រូវរ៉ូវគ្នាវិញហើយ ហើយក៏មិន អាចឱ្យមានផ្ទុះអធិករណ៍អីនោះដែរ ។ លោកបន្ដថា ព្រះសង្ឃដែលបួសបម្រើ ព្រះពុទ្ធសាសនាត្រូវគោរពតាមធម៌ វិន័យឱ្យបានត្រឹមត្រូវ និងត្រូវគោរព តួនាទីរបស់ខ្លួនឱ្យបានខ្ជាប់ខ្ជួន ។
ទោះយ៉ាងណាពុទ្ធបរិស័ទដែលគោរព ព្រះធម៌ព្រះពុទ្ធ ទទូចឱ្យអាជ្ញាធរពាក់ព័ន្ធ ចុះទៅពិនិត្យ និងដោះស្រាយទំនាស់នោះ ឱ្យមានភាពយុត្ដិធម៌និងត្រឹមត្រូវ កុំ ប្រកាន់ម្ខាងៗដាក់ខ្លួនដើម្បីឱ្យដឹងថា ព្រះសង្ឃអង្គណាមួយជាអ្នកចង់បានតួនាទី ព្រះចៅអធិការវត្ដនោះ កុំឱ្យប៉ះពាល់ ដល់វិស័យព្រះពុទ្ធសាសនាដែលជា សាសនារបស់រដ្ឋ ៕
_________________________
ប្រភពពីនគរវត្ត
