សមត្ថកិច្ច ចាប់ឃាត់ខ្លួន ឌីជេ ប្រចាំក្លឹប ហ៊ីបហប ដែលលួចរកស៊ី ចែកចាយថ្នាំញៀន
ខេត្តសៀមរាប ៖ កម្លាំងសមត្ថកិច្ចនៃការិយាល័យប្រឆាំងគ្រឿងញៀននៃស្នងការដ្ឋាននគរបាលខេត្តសៀមរាប បានធ្វើការចាប់ឃាត់ខ្លួនមុខសញ្ញាចែកចាយថ្នាំញៀនដ៏សកម្មម្នាក់កាលពីវេលាម៉ោង៤ទៀប ភ្លឺថ្ងៃទី០២ ខែសីហា ឆ្នាំ២០១៣ នៅមុខខ្លោងទ្វារវត្តដំណាក់ខាងលិច ស្ថិតក្នុងក្រុមទី៩ ភូមិវត្តដំណាក់ សង្កាត់សាលាកំរើក ក្រុងសៀមរាប ខណៈដែលជនសង្ស័យរូបនេះកំពុងតែធ្វើសកម្មភាពចែកចាយថ្នាំញៀនទៅឲ្យភ្ញៀវរបស់ខ្លួន។
បើតាមប្រភពព័ត៌មានពីសមត្ថកិច្ចបានឲ្យដឹងថា ជនសង្ស័យដែលត្រូវបានចាប់ឃាត់ខ្លួនខាងលើនេះមានឈ្មោះ ឡាច វុទ្ធី អាយុ១៩ឆ្នាំ មុខរបរ ជា DJ ប្រចាំក្លឹមកម្សាន្ត ហ៊ីបហប ក្នុងក្រុងសៀមរាប មានទីលំនៅបច្ចុប្បន្នក្នុងភូមិជន្លង់ សង្កាត់សាលាកំរើក ខេត្តសៀមរាប ជាមុខសញ្ញាចែកចាយថ្នាំញៀនដ៏សកម្ម។
ប្រភពដដែលបានបន្តទៀតថា មុនពេលឈានទៅដល់ការចាប់ឃាត់ខ្លួននេះ គឺក្រុមសមត្ថកិច្ចបានធ្វើការស្រាវជ្រាវអស់រយៈពេលជាងកន្លះខែ ទើបសម្រេចចាប់បានជនសង្ស័យនៅវេលាខាងលើ និងដកហូតបានថ្នាំញៀនប្រភេទម៉ាទឹកកក១កញ្ចប់ និងទូរស័ព្ទដៃមួយគ្រឿង ។
ក្រោយពេលធ្វើការឃាត់ខ្លួនរួចមក ជនសង្ស័យបានសារភាពថាខ្លួនពិតជាបានធ្វើសកម្មភាពចែកចាយថ្នាំញៀនពិតប្រាកដ។ ដោយយោងតាមចម្លើយសារភាព និងវត្ថុតាងខាងលើ នៅព្រឹកថ្ងៃទី០៣ ខែសីហា ឆ្នាំ២០១៣ កម្លាំងសមត្ថកិច្ចបានកសាងសំណុំរឿងបញ្ជូនខ្លួនជនសង្ស័យ និងវត្ថុតាងទៅកាន់សាលាដំបូងខេត្តសៀមរាប ដើម្បីចាត់ការបន្តទៅតាមនីតិវិធីច្បាប់ ៕
________________________
ប្រភពព័ត៌មានពី៖ វត្តភ្នំ
ប្រភពព័ត៌មានពី៖ វត្តភ្នំ
