នាយកសាលា ដែលជិតដិតជាមួយ ប្រធានមន្ទីរ អប់រំខេត្តកំពង់ចាម ប្រកាសលក់វិញ្ញាសា ប្រឡងបាក់ឌុប ចាប់ពី៣០ដល់ ១០០ដុល្លារ
ខេត្តកំពង់ចាម ៖ សមាគមគ្រូបង្រៀន ឯករាជ្យកម្ពុជា បានទទួលសេចក្តី រាយការណ៍ ពីអាណាព្យាបាលសិស្ស និងបេក្ខជន ប្រឡងថ្នាក់ទី១២ ទាក់ទិនការលក់ វិញ្ញាសាប្រឡង ទ្រង់ទ្រាយធំ នៅខេត្តកំពង់ចាម ហើយក៏មានការ ទទូចសុំឲ្យ សមាគមគ្រូបង្រៀន ឯករាជ្យកម្ពុជា របស់លោក រ៉ុង ឈុន ជួបទប់ស្កាត់ភាពមិនប្រក្រតីនេះ ឲ្យបានមុនការប្រឡងចូលមកដល់។
យោងតាមសេចក្តីជូនដំណឹង របស់សិស្សថ្នាក់ទី១២ នៅទីរួមខេត្តកំពង់ចាម ដែលត្រូវប្រឡងបាក់ឌុប នៅថ្ងៃទី០៥ ខែសីហា ឆ្នាំ២០១៣នេះ បានឲ្យដឹងថា នៅតាមវិទ្យាល័យនានា ក្នុងទីរួមខេត្តកំពង់ចាម មានការប្រកាសលក់វិញ្ញាសា ប្រឡងបាក់ឌុបក្នុងទ្រង់ទ្រាយធំ ធ្វើឡើងជាចំហ ដោយមានការកំណត់តម្លៃ ប្រកួតប្រជែងទៀតផង ហើយដែលភាគច្រើន អ្នកដែលហ៊ានចេញមុខ លក់វិញ្ញាសាសុទ្ធតែថ្នាក់ដឹកនាំសាលាតែម្តង ។
មានការបញ្ជាក់ផងដែរថា តម្លៃដែលប្រកាសលក់វិញ្ញាសា មានចាប់ពី ៣០ដុល្លារ សម្រាប់ ៥មុខវិជ្ជា រហូតដល់ ១០០ដុល្លារ សម្រាប់ ១០មុខវិជ្ជា។ ប្រសិនបើគេចង់ទិញ គឺទាក់ទងតាមបណ្តាញ របស់ថ្នាក់ដឹកនាំសាលា រួមមានទាំងសាលាដីដុះ និងសាលាវិទ្យាល័យព្រះសីហនុផងដែរ ហើយថ្នាក់នាយកសាលា ដែលហ៊ានចេញមុខលក់ វិញ្ញាសាប្រឡង ជាចំហបែបនេះ សុទ្ធសឹងតែជាមមនុស្សជំនិត របស់ប្រធានមន្ទីរអប់រំខេត្តកំពង់ចាម ។
លិខិតរបស់សិស្សថ្នាក់ទី១២ បានបន្តថា ថ្វីត្បិតតែពួកគេ ជាអ្នកប្រឡង គឺពួកគេពិតជាចង់បាន នូវការប្រឡងមួយ ដែលផុសចេញពី សមត្ថភាពផ្ទាល់ខ្លួន ពួកគេមិនចង់បាននូវ រូបភាពបែបនេះទេ ព្រោះវាធ្វើឲ្យតម្លៃ នៃការប្រឡងគ្មានគុណភាព ។ ដោយឡែកអាណាព្យាបាលជាច្រើន បានបញ្ជាក់ថា កូនៗបានរំអុកសុំប្រាក់ ទៅទិញចម្លើយវិញ្ញាសាប្រឡងបាក់ឌុប ដោយបានប្រាប់ថា មានតម្លៃចាប់ពី ៣០ដុល្លារ រហូតដល់ ១២០ដុល្លារ ។ សម្រាប់ ១២០ដុល្លារ គឺត្រូវគ្រប់មុខវិជ្ជា ។
កន្លងមកមានបាតុភាពមិនប្រក្រតី កើតឡើងជាញឹកញាប់ នៅក្នុងមន្ទីរអប់រំខេត្តកំពង់ចាម ហើយរៀងរាល់ពេលប្រឡង ក៏តែងតែមានការលក់វិញ្ញាសា ឬការធ្វើឲ្យបែកធ្លាយវិញ្ញាសា ដោយនាយកសាលាមួយចំនួន មិនបានអនុវត្តន៍ ឲ្យបានត្រឹមត្រូវតាមគោលការណ៍ របស់ក្រសួងអប់រំនោះទេ។ គួរបញ្ជាក់ថា ការប្រឡងបាក់ឌុប ឆ្នាំ២០១៣ មានបេក្ខជនប្រមាណ ១០៧៨៣៥នាក់ ហើយមណ្ឌលប្រឡង មានចំនួន ២៣៤ ដោយចែកជា ៤៣៩០បន្ទប់ នៅទូទាំងប្រទេស៕
ប្រភពពី វត្តភ្នំ
