ជម្លោះក្នុងវង់ ផឹកស៊ីបងថ្លៃ ប្រើពូថៅកាប់ ប្អូនថ្លៃដេរជាង១០ថ្នេរ
ខេត្ដប៉ៃលិន ៖ អំពើហិង្សាក្នុងវង់ផឹក ស៊ីមួយបង្កឱ្យបុរសម្នាក់រងរបួសដេរជាង១០ថ្នេរដោយសារបងថ្លៃកាប់នឹងពូថៅ កាលពីវេលាម៉ោង១និង៣០នាទីរសៀល ថ្ងៃទី១ ខែសីហា ឆ្នាំ២០១៣ នៅក្នុងភូមិ ទឹកចេញ ឃុំស្ទឹងត្រង់ ស្រុកសាលាក្រៅ ខេត្ដប៉ៃលិន ។
ជនរងគ្រោះជាប្អូនថ្លៃត្រូវបានគេ ស្គាល់ឈ្មោះផុន ស៊ីណា ហៅខ្ញី ភេទ ប្រុស អាយុ២៦ឆ្នាំ រស់នៅភូមិសួនអំពៅ ខាងលិច សង្កាត់-ក្រុង-ខេត្ដប៉ៃលិន ។ រីឯជនដៃដល់ជាបងថ្លៃឈ្មោះ ឆែម នី ហៅម៉េង ភេទប្រុស អាយុ៣៨ឆ្នាំ មាន មុខរបរធ្វើចម្ការ រស់នៅភូមិក្រងោក ឃុំ ស្ទឹងត្រង់ ស្រុកសាលាក្រៅ ខេត្ដប៉ៃលិន បានរត់គេចខ្លួនប្រាក់បន្ទាប់ពីប្រើពូថៅ កាប់ប្អូនថ្លៃឱ្យរងរបួសធ្ងន់រួចមក ។
សាច់ញាតិជនរងគ្រោះឱ្យដឹងថា មុន ពេលកើតហេតុជនដៃដល់ជាបងថ្លៃនិង ជនរងគ្រោះបានជិះម៉ូតូរួមគ្នាទៅចម្ការ ដែលស្ថិតនៅចំណុចក្នុងភូមិកើតហេតុ ខាងលើ ។ នៅពេលនាំគ្នាធ្វើចម្ការបាន មួយសន្ទុះធំក៏ឈប់សម្រាក ហើយនាំគ្នា ផឹកស្រារហូតដល់ស្រវឹងរៀងៗខ្លួន ។ បើ តាមការអះអាងពីជនរងគ្រោះ ផុន ស៊ីណា ហៅខ្ញីឱ្យដឹងថា ពេលដែលផឹកស្រាអស់ ចំនួន៣កែវរូបគេពុំសូវស្រួលខ្លួនក៏ឡើង ទៅសម្រាកលើអង្រឹង ។ គ្រានោះជនដៃ ដល់ជាបងថ្លៃក៏ស្ទុះទៅធាក់មួយជើង ហើយក៏បានទាញយកពូថៅកាប់ទៅលើ ជនរងគ្រោះចំក្បាលរួចក៏រត់គេចខ្លួនបាត់ពីកន្លែងកើតហេតុតែម្ដង ។
នគរបាលបានឱ្យដឹងថា ករណីហិង្សា បង្ករបួសស្នាមរវាងបងថ្លៃនឹងប្អូនថ្លៃនេះ សមត្ថកិច្ចកំពុងតាមចាប់ខ្លួនជនដៃដល់ បន្ទាប់ពីមានពាក្យបណ្ដឹងពីក្រុមគ្រួសារជនរងគ្រោះ៕
-ប្រភពពី នគរវត្ត
