បើកម៉ូតូពេល ភ្លៀងបុកជាមួយ រថយន្តរបួសធ្ងន់
រាជធានីភ្នំពេញ ៖ បុរសម្នាក់បានរងរបួសធ្ងន់ធ្ងរ ខណៈពេលជិះម៉ូតូពេលមេឃកំពុងតែភ្លៀងធ្លាក់ខ្លាំង ជ្រុលទៅបុកជាមួយរថយន្ត ហើយរថយន្តបើករត់គេចបាត់ស្រមោល ។ គ្រោះថ្នាក់នេះកើតឡើងនៅវេលាម៉ោង៩យប់ ថ្ងៃទី៣១ កក្កដា នៅចំណុចកែងអក្សរ T ផ្លូវលេខ៣៥២ កែងមហាវិថីព្រះនរោត្តម សង្កាត់បឹងកេងកងទី១ ខណ្ឌចំការមន ។
សាក្សីឃើញហេតុការណ៍បានឱ្យដឹងថា ពេលមេឃកំពុងតែធ្លាក់ភ្លៀងខ្លាំងមានម៉ូតូវីវ៉ា ពណ៌ខ្មៅ ពាក់ស្លាកលេខភ្នំពេញ 1AB-4242 បើកបរដោយបុរសម្នាក់តាមមហាវិថីព្រះនរោត្តមពីជើងទៅត្បូង ចំណែករថយន្តកាមរីឆ្លាម ពណ៌ខ្មៅ មិនចាំស្លាកលេខ ធ្វើដំណើរតាមផ្លូវលេខ៣៥២ ពីលិចទៅកើត ខណៈមកដល់ចំណុចផ្លូវកែងរាងអក្សរ T រថយន្តនិងមូ៉តូមើលគ្នាមិនឃើញ ក៏ជ្រុលបុកពេញទំហឹងបណ្តាលឱ្យអ្នកបើកម៉ូតូដួលបោកក្បាលរងរបួសធ្ងន់ ចំណែករថយន្តបន្ទាប់ពីបុកម៉ូតូហើយក៏បន្ថែមល្បឿនបើករត់គេចបាត់ស្រមោល ។
ក្រោយពេលកើតហេតុ អ្នករងរបួសធ្ងន់ត្រូវរថយន្តសង្គ្រោះដឹកទៅព្យាបាលនៅគ្លីនិកឯកជន ចំណែកម៉ូតូដែលរងការខូចខាតសមត្ថកិច្ចយកទៅរក្សាទុកនៅប៉ុស្តិ៍រដ្ឋបាលបឹងកេងកងទី១ បណ្តោះអាសន្ន ៕ប្រភព កោះសន្តិភាព
