រថយន្តដឹកថ្មពន្លះម៉ូតូវីវាពីក្រោយ បណ្តាលឲ្យស្ត្រីម្នាក់ស្លាប់ និងម្នាក់ទៀតរបួសធ្ងន់
រាជធានីភ្នំពេញ ៖ មានហេតុការណ៍គ្រោះថ្នាក់ចរាចរណ៍មួយបានកើតឡើង កាលពីវេលាម៉ោង១០ និង៣៥នាទីព្រឹកថ្ងៃទី១៣ ខែសីហា ឆ្នាំ២០១៣ ដែលបង្កឡើងដោយសាររថយន្តដឹកថ្មមួយគ្រឿង បានជ្រុល ល្បឿនទៅបុកម៉ូតូម៉ាកវីវាមួយគ្រឿង នៅលើកំណាត់ផ្លូវជាតិលេខ៤ សិ្ថតក្នុងភូមិអូរដឹម សង្កាត់ចោមចៅ ខណ្ឌពោធិ៍សែនជ័យ បណ្តាលឲ្យស្ត្រីម្នាក់បានស្លាប់បាត់បង់ជីវិត និងបុរសម្នាក់ទៀតរងរបួសធ្ងន់។
បើតាមប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុគេបានឃើញរថយន្តដឹកថ្មមួយគ្រឿង បានបើកបរក្នុងល្បឿនយ៉ាងលឿន តាមបណ្តោយផ្លូវជាតិលេខ៤ ក្នុងទិសដៅពីកើតទៅលិច។ លុះបើកមកដល់ចំណុចកើតហេតុ ស្រាប់តែរថយន្តបានជ្រុលល្បឿនទៅបុកម៉ូតូម៉ាកវីវា មួយគ្រឿងពីក្រោយទំហឹង បណ្តាលឲ្យស្ត្រីដែលជិះពីក្រោយបានដួលបោកក្បាលស្លាប់ភ្លាមៗនៅនឹងកន្លែងកើតហេតុ ចំណែកបុរសម្នាក់ទៀតដែលជាអ្នករត់ម៉ូតូឌុបត្រូវបានរងរបួសធ្ងន់។ ក្រោយពេលបង្កហេតុរថយន្ត បានបន្ថែមល្បឿនបើកឆ្ពោះទៅកាន់ទិសខាងលិច គេចខ្លួនបាត់ស្រមោល។
ប្រភពដដែលបានបន្តឲ្យដឹងទៀតថា ជនរងគ្រោះដែលបានស្លាប់បាត់បង់ជីវិតនៅមិនទាន់ត្រូវបានស្គាល់អត្តសញ្ញាណនោះទេ គ្រាន់តែអាចសន្និដ្ឋានថាជនរងគ្រោះមានអាយុប្រហែលជា២០ឆ្នាំ ស្លៀកពាក់ឯកសណ្ឋានជាបុគ្គលិកផ្នែកសន្តិសុខ ។ ចំណែកឯបុរសម្នាក់ទៀតដែលជាអ្នករត់ម៉ូតូឌុបមានឈ្មោះ ជួន សុវណ្ណ ភេទប្រុស អាយុ៧០ឆ្នាំ មានទីលំនៅភូមិតាកេរថ្មី សង្កាត់កំបូល ខណ្ឌពោធិ៍សែន។
បន្ទាប់ពីកើតហេតុ កម្លាំងសមត្ថកិច្ចក៏បានចុះទៅអន្តរាគមន៍ បញ្ជូនជនរងគ្រោះទៅធ្វើការព្យាបាលនៅមន្ទីរពេទ្យ។ ចំណែកសាកសពជនរងគ្រោះសមត្ថកិច្ចបានកំពុងធ្វើការទំនាក់ទំនងរកក្រុមគ្រួសារ ដើម្បីមកទទួលយកទៅធ្វើបុណ្យតាមប្រពៃណី៕
ប្រភពពី វត្តភ្នំ
