កម្មករ កម្មការិនី រោងចក្រកំពុង ធ្វើការដួល សន្លប់ជាង៤៥នាក់
ស្វាយរៀង ៖ កម្មករ កម្មការិនី រោងចក្រកាត់ដេរដែលមានយីហោឈ្មោះ អេលីត ស្ថិតក្នុងតំបន់ សេដ្ឋកិច្ចពិសេសមេនហាតធេន ស្ថិតក្នុងភូមិតាពៅ សង្កាត់-ក្រុង បាវិត កំពុងតែធ្វើការ ក៏ស្រាប់តែ ដួលសន្លប់ជាបន្តបន្ទាប់។
បើតាមប្រភពព័ត៌មានពីកន្លែងកើតហេតុបានអោយដឹងថា កម្មករ កម្មការិនី ចាប់ចូលធ្វើការ ពីម៉ោង១ រហូតដល់ម៉ោង១ និង ២៥នាទី ក៏ដួលសន្លប់ជាបន្តបន្ទាប់ដោយមិនដឹងមូលហេតុពិតប្រាកដនៅឡើយទេ។ ករណីកម្មកររោងចក្រសន្លប់នេះបានកើតឡើងកាលពីថ្ងៃទី៣១ ខែកក្កដា ឆ្នាំ២០១៣ វេលាម៉ោង១ និង ២៥នាទី នៅក្នុងរោងចក្រឈ្មោះអេលីត ជារោងចក្រកាត់ដេរសំលៀកបំពាក់។
លោក អ៊ូ សុខឃឿន មន្ត្រីក្រសួងការងារបណ្តុះបណ្តាល និង វិជ្ជាជីវៈប្រចាំនៅតំបន់សេដ្ឋកិច្ច ពេសេមេនហាតធេន បានអោយដឹងតាមទូរស័ព្ទថា កម្មករ កម្មការិនី រោងចក្រអេលីតសន្លប់នោះ ចំនួន៤៥នាក់។ លោកបានបន្តថា តាមការសន្និដ្ឋានកម្មករដែលសន្លប់នោះបណ្តាលមកពីធំក្លិនជ័រ ព្រោះនៅជិតគ្នានោះមានរោងចក្រឈ្មោះ ស៊ីកូ គេផលិតស្បែកជើងហើយពេលស្លជ័រ ផលិតបាតស្បែកជើងធំក្លិនចូលក្នុងរោងចក្រអេលីត ក៏ដួលសន្លប់បែបនេះទៅ។
លោក អ៊ូ សុខឃឿន បានបញ្ជាក់ថា ការស្លជ័រនោះខាងរោងចក្រស៊ីកូ មានរៀបចំបំពង់បង្ហុយ ឡើងលើត្រឹមត្រូវ ពុំដែលមានបញ្ហាអ្វីនោះទេ ប៉ុន្តែដោយថ្ងៃនេះធាតុអាកាសប្រែប្រួល ខ្យល់បក់ វិលចុះឡើង ក៏ជះក្លិនចូលរោងចក្រអេលីត បណ្តាលអោយកម្មករ កម្មការិនី ដួលសន្លប់បែបនេះទៅ។ ក្នុងករណីខាងលើនេះពុំបណ្តាលអោយកម្មករណាម្នាក់រងគ្រោះដល់អាយុជីវិតនោះទេ។
បច្ចុប្បន្នកម្មករ កម្មការិនី ទាំង៤៥នាក់ កំពុងសំរាកព្យាបាលនៅមន្ទីពេទ្យបង្អែកជីភូ និង គ្លីនិចផាសុខភាព២ ស្ថិតក្នុងក្រុងបាវិត៕ប្រភព កម្ពុជាថ្មី
គឹម សេង
