ហ៊ីយ៉ាន់ដាយ ព្រលះរ៉ឺម៉កដឹក ដូងពេញទំហឹង ស្លាប់១ដង្ហើម ចង្រិត២នាក់
កំពង់ធំ ៖ ហេតុការណ៍គ្រោះថ្នាក់ចរាចរមួយបានកើតឡើង នៅលើកំណាត់ផ្លូវជាតិលេខ៦ ត្រង់ចំណុចភូមិវាលសរសៃ ឃុំសូយោង ស្រុកបារាយណ៍ ខេត្តកំពង់ធំ បណ្ដាលឲ្យមានមនុស្សម្នាក់ស្លាប់នៅនឹងកន្លែង និងរបួសធ្ងន់២នាក់ កាលពីរសៀលម៉ោង៣និង១៧នាទីថ្ងៃទី៣១ ខែកក្កដា ឆ្នាំ ២០១៣។
តាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុ មានរថយន្តមួយគ្រឿងម៉ាកហ៊ីយ៉ាន់ដាយ ចំណុះ២តោនកន្លះ ពណ៌ ខៀវ ពាក់ស្លាកលេខ ភ្នំពេញ 3A-4424 បានបើកលើកំណាត់ផ្លូវជាតិលេខ៦ លុះមកដល់កើតហេតុក្នុងទិសដៅបញ្ច្រាសទិសគ្នា ពីជើងទៅត្បូង ក៏បានបើកបុកយ៉ាងពេញទំហឹងទៅលើម៉ូតូសណ្ដោងរ៉ឺម៉កដឹកដូងបណ្តាលឲ្យម្ចាស់រ៉ឺម៉កខ្ទាតទៅទើរលើរ៉ឺម៉ក ដាច់ខ្យល់ស្លាប់លើបង្គងរ៉ឺម៉កយ៉ាងវេទនាជាទីបំផុត។ ជនរងគ្រោះដែលបានបាត់បង់ជីវិតក្នុងហេតុការណ៍ គ្រោះថ្នាក់ចរាចរនេះ ត្រូវបានគេស្គាល់ឈ្មោះ មួង ផាត ភេទ ប្រុសអាយុ ៤២ឆ្នាំ មានមុខរបរដឹកដូងលក់ មានទីលំនៅភូមិ កំប៉ាល ឃុំ កណ្តែក ស្រុក បាធាយ ខេត្តកំពង់ចាម។ ប្រភពបានបន្តថា នៅក្នុងហេតុការណ៍ខាងលើនោះ រថយន្តបានជ្រុលទៅបុកម៉ូតូឌុបបន្តទៀត ខណៈពេលដែលកំពុងធ្វើដំណើរជិះគ្នា៣នាក់ បណ្តាលឲ្យរងរបួសធ្ងន់ស្រាល ៣នាក់ ទី១. ឈ្មោះ អិន សំណាង អាយុ ២៩ឆ្នាំ នៅស្រុកស្ទោង ទី២.ឈ្មោះ សន ស៊ីណេត ភេទស្រី បែកក្បាល រស់នៅ ខេត្តព្រៃវែង ទី៣. ឃុន សុធា ភេទស្រីអាយុ ២៣ឆ្នាំ រស់នៅខេត្តព្រៃវែង ជនរងគ្រោះទាំងអស់ ត្រូវបានដឹកយកទៅសង្គ្រោះនៅមន្ទីរពេទ្យ។ ចំណែកតៃកុងឡាន ឃើញសភាពការណ៍មិនស្រួល ក៏បានចុះពីលើរថយន្ត ដាក់មេប្រូចបាត់ស្រមោល។
តាមការឲ្យដឹងពីសមត្ថកិច្ច នៃអធិការដ្ឋាននគរបាលស្រុកបារាយណ៍ បានឲ្យដឹងថា ករណីគ្រោះថ្នាក់ចរាចរ នេះគឺបណ្តាលមកពី តៃកុងឡានមិនគោរពច្បាប់ចរាចរ រំលោភបំពានទាំស្រុងទៅលើម៉ូតូ ដែលជាហេតុធ្វើឲ្យមានគ្រោះថ្នាក់កើតឡើង។ ក្រោយពីកើតហេតុ វត្ថុតាងមានរថយន្តនិងម៉ូតូ សមត្ថកិច្ចបាននាំយកមករក្សាទុកនៅអធិការស្រុកបារាយណ៍ ដើម្បីឲ្យភាគីទាំងសងខាង ចូលមកដោះស្រាយតាមនីតិវិធីនៃច្បាប់៕ប្រភព កម្ពុជាថ្មី
ប៊ុន រដ្ឋា
