ក្រុមហ៊ុន AZ ដែលសម្ងំជញ្ជក់ ញើសឈាមរាស្ត្រខ្មែរ អាចជាប្រភពនាំឲ្យ បាត់សំឡេងឆ្នោត របស់គណបក្ស ប្រជាជនកម្ពុជា នៅមណ្ឌលភ្នំពេញ
រាជធានីភ្នំពេញ ៖ ក្រោយពេលដំណើរការ បោះឆ្នោតជាតិ អាណតិ្តទី៥ បានបញ្ចប់ កាលពីថ្ងៃទី២៨ ខែកក្កដា ឆ្នាំ២០១៣ កន្លងទៅនេះ យើងអាចមើលឃើញយ៉ាងច្បាស់ ពីការធ្លាក់ចុះ នូវសំឡេងឆ្នោត របស់គណបក្ស ប្រជាជនកម្ពុជា នៅមណ្ឌល រាជធានីភ្នំពេញ កំពង់ស្ពឺ និងខេត្តកណ្តាល ដែលជាមណ្ឌល ឈរឈ្មោះ របស់សម្តេចតេជោ ហ៊ុន សែន នាំឲ្យសាធារណជនវាយតម្លៃថា ភាពបរាជ័យនេះ គឺជាផ្នែកមួយនៃ ការផ្តល់សិទ្ធិឲ្យក្រុមហ៊ុន AZ ដាក់កុងត្រូលចាំប្រមូលលុយ ពីអ្នកដំណើរ និងរថយន្តដឹកជញ្ជូនទំនិញ ដោយជ្រកក្រោមស្លាក វិនិយោគជួសជុលថែទាំផ្លូវជាតិលេខ៤ ផងដែរ ។
ប្រជាពលរដ្ឋដែលរស់នៅ តាមបណ្តោយផ្លូវជាតិលេខ៤ បានសម្តែងភាពក្តៅក្រហាយ ជាយូរមកហើយចំពោះក្រុមហ៊ុន AZ ដែលបានដាក់កុងត្រូល ចាំប្រមូលលុយ ពីប្រជាពលរដ្ឋនិង រថយន្តដឹកទំនិញ ដោយគ្មានការយោគយល់អ្វីឡើយ។ ជាពិសេសប្រជាពលរដ្ឋ រស់នៅក្នុងស្រុកអង្គស្នួល និងខេត្តកំពង់ស្ពឺ គឺពួកគាត់បាន ចំណាយលុយបង់ឲ្យក្រុមហ៊ុន AZ គ្រប់ពេលវេលាដែលត្រូវ ធ្វើដំណើរឆ្លងកាត់ផ្លូវជាតិលេខ៤ បើទោះបីជាប្រាក់ចំណូលប្រចាំថ្ងៃ របស់ពួកគាត់មានតិចតួចក៏ដោយ ហើយដោយសារតែរាជរដ្ឋាភិបាលកម្ពុជា មើលរំលងពីបញ្ហានេះ ទើបបណ្តាលឲ្យបាត់បង់សំឡេងឆ្នោត យ៉ាងច្រើនសន្ធឹកសន្ធាប់ ។
ប្រជាពលរដ្ឋបានចងចាំយ៉ាងច្បាស់ថា អស់រយៈពេលជាង ១០ឆ្នាំមកហើយ ដែលក្រុមហ៊ុន AZ ទទួលបានសិទិ្ធវិនិយោគ ថែទាំផ្លូវជាតិលេខ ៤ ដែលជាជំនួយ របស់សហរដ្ឋអាមេរិក ប៉ុន្ដែរឿងពិត គេសង្កេតឃើញថា ក្រុមហ៊ុននេះអត់ដែលខ្វល់ខ្វាយអនុវត្តន៍ ឲ្យស្របតាមកិច្ចសន្យានោះទេ គឺគិតតែប្រមូលប្រាក់ ដែលជាញើសឈាមរបស់ពលរដ្ឋខ្មែរ យកទៅធ្វើមានធ្វើបានផ្ទាល់ខ្លួន គឺសមល្មមដល់ពេលរាជរដ្ឋាភិបាល ពិនិត្យសើរើករណីនេះ ឡើងវិញហើយ។ ក្រុមហ៊ុន AZ ដោយជ្រកក្រោមស្លាក វិនិយោគជួសជុលថែទាំផ្លូវជាតិលេខ៤ ព្យាយាមសង់បញ្ជរកាត់ផ្លូវជាតិលេខ៤ ជាច្រើនកន្លែង ដើម្បីបង្ខំឲ្យអ្នកដំណើរ និងរថយន្តដឹកទំនិញបង់ប្រាក់ ដោយគ្មានការយោគយល់អ្វីឡើយ ។
បើនិយាយពីសេវាថែទាំ ជួសជុលផ្លូវជាតិលេខ៤ វិញក្រុមហ៊ុន AZ ធ្វើតាមរបៀបលេងៗ កុំឱ្យគេថាអត់ធ្វើអ្វីសោះ ព្រោះរឿងសំខាន់ដែល ក្រុមហ៊ុន AZ ចង់បាននោះ គឺជាការប្រឹងប្រមូលប្រាក់ ពីរថយន្ដធ្វើដំណើរឆ្លងកាត់ ផ្លូវជាតិលេខ៤ តាមរបៀបធ្វើអាជីវកម្ម លើខ្នងប្រជារាស្ដ្រខ្មែរក្រីក្រ។ ក្រុមហ៊ុន AZ បានទទួលសិទ្ធិថែទាំផ្លូវជាតិលេខ៤ ក្នុងឆ្នាំ២០០១ ហើយក៏ចាប់ផ្ដើមកែលំអ ស្ថានភាពផ្លូវត្រង់ចំណុចចោមចៅ តិចតួចប៉ុណ្ណោះក៏ បង្កើតបញ្ជរសម្រាប់ឃាត់ រថយន្ដធ្វើដំណើរឆ្លងកាត់ផ្លូវជាតិលេខ៤ ឱ្យបង់ប្រាក់យ៉ាងងាយស្រួលបំផុត ពោលគឺការវិនិយោគរបស់ក្រុមហ៊ុន AZ មិនខុសពីការធ្វើនំអត់ម្សៅនោះទេ ។
ការអះអាងបែបនេះ ក៏ព្រោះតែគេដឹងថា ក្រុមហ៊ុន AZ អាចមានសិទ្ធិសាងសង់បញ្ជរ សម្រាប់ប្រមូលលុយបែបនេះ ដោយមិនបានចំណាយដើមទុន មួយកាក់មួយសេនណាឡើយ ព្រោះផ្លូវជាតិលេខ ៤ នោះត្រូវបានស្ដាឡើងវិញដោយ ប្រើប្រាស់ប្រាក់ជំនួយ ទីភ្នាក់ងារអភិវឌ្ឍន៍អន្ដរជាតិ របស់សហរដ្ឋ អាមេរិក ដែលបានចំ ណាយប្រាក់ជាង ៣០លានដុល្លារ រួចទៅហើយ គឺក្រុមហ៊ុន AZ គ្រាន់តែមកសង់បញ្ជរ បង្ខំឱ្យអ្នកដំណើរបង់ប្រាក់តែប៉ុណ្ណោះ។ សម្រាប់ជំហានចាប់ផ្ដើមអភិវឌ្ឍន៍ ប្រទេសកម្ពុជាឡើងវិញ រាប់តាំងពីក្រោយកិច្ចព្រមព្រៀង សន្ដិភាពក្រុងប៉ារីសថ្ងៃទី២៣ ខែតុលា ឆ្នាំ១៩៩១ សហរដ្ឋអាមេរិកបានចំណាយប្រាក់ជាង ៣០លានដុល្លារអាមេរិក ដើម្បីស្ដាឡើងវិញ នូវផ្លូវជាតិលេខ៤ ពីភ្នំពេញទៅខេត្ដព្រះសីហនុ ចម្ងាយប្រមាណ ២៣០គីឡូម៉ែត្រ គឺជាប្រាក់ជំនួយ មានតម្លៃជាប្រវត្ដិសាស្ដ្រ របស់អាមេរិក ។
អំឡុងពេលបើកសម្ពោធ ផ្លូវជាតិលេខ៤ ដែលគេនិយមហៅថា ជាផ្លូវមិត្ដភាពកម្ពុជា-អាមេរិកាំង ដែលត្រូវបានស្ដាឡើងវិញ កាលពីពាក់កណ្ដាល ទសវត្សរ៍ឆ្នាំ១៩៩០ នោះតំណាងស្ថានទូតអាមេរិក ក៏ធ្លាប់បានបញ្ជាក់ផងដែរថា ការស្ដារឡើងវិញ នូវផ្លូវជាតិលេខ៤នេះ បង្កើតឱ្យមានសក្ដានុពលធំធេង ជួយដល់រាស្ដ្រខ្មែរ និងការដឹកជញ្ជូនទំនិញពីដែនសមុទ្រ មកកាន់រាជធានីភ្នំពេញ គឺជាការលើកស្ទួយសេដ្ឋកិច្ចជាតិ ក៏ដូចជាបម្រើឱ្យជីវភាពរាស្ដ្រខ្មែរក្រីក្រ ។ ផ្លូវជាតិលេខ៤ ជាសំណង់ ដ៏រឹងមាំបំផុតធានាឱ្យការ ដឹកជញ្ជូនសព្វសារពើ ជាពិសេសប្រជាពលរដ្ឋ អាចធ្វើដំណើរដោយសេរី ព្រោះវាជាជំនួយរបស់អាមេរិក ដូចដែលសម្តេចតេជោ ហ៊ុន សែន ធ្លាប់បានលើកឡើង ជាញឹកញាប់រួចហើយថា មានផ្លូវមានសង្ឃឹមដើម្បីដើរទៅមុខ ឆ្ពោះទៅកាន់ភាពរីកចម្រើន ជឿនលឿន។
ប៉ុន្ដែស្ថានភាពនេះ សម្រាប់ប្រជាពលរដ្ឋ ដែលត្រូវធ្វើដំណើរឆ្លងកាត់ ផ្លូវជាតិលេខ៤ ពីភ្នំពេញទៅខេត្ដព្រះសីហនុ កំពុងខកចិត្ដយ៉ាងសម្បើម ត្រង់ថាមានផ្លូវហើយ មិនទាន់មានសង្ឃឹមទេ ព្រោះទាល់តែមានប្រាក់ បង់ឱ្យក្រុមហ៊ុន AZ នៅតាមបញ្ជរចំនួន ៣កន្លែងគឺនៅចំណុចកំបូល ស្ទឹងសំរោង និងអូរចំណា ទើបមានសង្ឃឹម អាចធ្វើដំណើរឆ្លងកាត់ផ្លូវជាតិលេខ៤ ជាជំនួយរបស់សហរដ្ឋ អាមេរិក ។ ប្រជាពលរដ្ឋគួរតែមានសិទ្ធិ ប្រើប្រាស់ផ្លូវសាធារណៈ ព្រោះផ្លូវជាតិលេខ៤ នេះត្រូវបានស្ដារឡើងវិញ ដោយប្រាក់ជំនួយរបស់អាមេរិកប្រហែល ៣០លានដុល្លារ គេមិនបានឃើញក្រុមហ៊ុន AZ នេះចេញប្រាក់ ទៅសង់ផ្លូវដូចក្រុមហ៊ុន មួយចំនួនទៀត តាមរូបមន្ដ BOT នោះទេ៕
ប្រភពពីវត្តភ្នំ
