កាល​ពី​ចុង​ខែមិថុនា​កន្លង​ទៅ​ទើប​តែ​មាន​ពាក្យចចាមអារ៉ាមថា​ក្រុមហ៊ុន Samsung អាច​នឹង​ចេញ​ Note 3 ពីរ​ម៉ូ​​ដែល​គឺ​ប្រើអេក្រង់ AMOLED និង​អក្រង់ LCD ដោយឡែក​សម្រាប់​​​ដើម​សប្ដាហ៍​ទី១​នៃ​ខែថ្មី​នេះ​មាន​ប្រភព​មួយ​ទៀត​ថា​ក្រុមហ៊ុន​ Samsung នឹង​ធ្វើ​ការ​ប្រកាស​ចេញ​ជា​ផ្លូវការ​នូវ​ទូរស័ព្ទ Galaxy Note 3 នៅ​ថ្ងៃទី០៤ ខែកញ្ញា​ ឆ្នាំ២០១៣ ។ កម្មវិធី​នោះ​នឹង​ប្រព្រឹត្ត​ទៅ​នា​ទីក្រុងប៊ែកឡាំង​​ ប្រទេសអាល្លឺម៉ង់ ប៉ុន្តែ​បើ​យោង​តាម​ប្រភព​មុនៗ​ថា​ Samsung នឹង​បង្ហាញ​​ Galaxy Note 3 នៅ​​ក្នុង​ព្រឹត្តិការណ៍​ពិព័រណ៍​​​ពាណិជ្ជកម្ម​គ្រឿង​អេឡិចត្រូនិក​អន្តរជាតិ​ IFA 2013 ដែល​នឹង​ប្រព្រឹត្ត​ទៅ​នៅ​ថ្ងៃ​ទី០៦ ខែដដែល​ ។

សូម​បញ្ជាក់​ផង​ដែរ​ថា​មក​ទល់ពេល​នេះ​គ្មាន​ប្រភព​ណា​អាច​​​បង្ហាញ​ពីរូបភាព និង​លក្ខណសម្បត្តិ​បច្ចេកទេស​របស់​ Note 3 នៅ​ឡើយ​ទេ អ្វី​ដែល​ប្រិយមិត្ត​ធ្លាប់​បាន​ឃើញ​នោះ​គឺ​ជារូបភាព​គំរូ​និង​លក្ខណសម្បត្តិបច្ចេកទេស​ដែល​ទទួល​បា​ន​ពី​ប្រភព​ចចាមអារ៉ាម​តែ​ប៉ុណ្ណោះ ។ បើ​យោង​តាម​ប្រភព​ទាំង​នោះ​បាន​អះអាង​ថា​ Note 3 អាច​នឹង​មាន​លក្ខណសម្បត្តិ​បច្ចេកទេស​ដូច​​ជា​៖ អេក្រង់ទំហំ 5.7-inch, CPU Qualcomm 800, បំពាក់​ដោយ​បច្ចេកវិទ្យា LTE-A កាមេរ៉ា 13 MP និង​មាន​ពីរ​ជម្រើស​គឺ ម៉ូដែល​ប្រើ​អេក្រង់ LCD និង​ មួយ​ម៉ូដែល​ទៀត​ប្រើ​អេក្រង់ Super AMOLED ។ រី​ឯ​ប្រភ​ព​មួយ​ទៀត​កាល​ពី​ចុង​ខែមេសា​ ល្បី​ថា​ Galaxy Note 3 មាន​អេក្រង់ 5.99-inch, CPU Exynos 5 Octa និង RAM 3 GB ។ ធ្លាប់​មាន​សេចក្ដីរាយការណ៍​ថា​ក្រុមហ៊ុន Samsung នឹង​ចាប់​ផ្ដើម​ផលិត​ Galaxy Note ជំនាន់​ថ្មី​​ក្នុង​​បរិមាណ​ច្រើន​នៅ​ក្នុង​ខែសីហា​ ដូច្នេះ​វា​ពិត​ជា​អាច​ទៅ​រួច​ដែល​ថា​ Samsung ប្រកាស​ចេញ​ Note 3 នៅ​ដើម​ខែកញ្ញា ហើយ​​ចាប់​ផ្ដើម​បញ្ចេញ​ទៅ​លើ​ទីផ្សារ​​ក្នុង​រយៈ​ពេល​​បន្តិច​ក្រោយ​មក​ទៀត​នោះ នេះ​​បើ​យោង​តាម​ប្រភព​ពី​ UnwiredView ។

គួរ​រំលឹក​ផង​ដែរ​ថា​ Sony ដែល​ជា​គូប្រជែង​ដ៏​ធំ​មួយ​របស់​ Samsung ដែរ​នោះ​ បាន​ប្រកាស​​ចេញ​រួច​ហើយ​នូវ​ទូរស័ព្ទទំនើប Sony Xperia Z Ultra (ZU) ​ប្រភេទ Phablet ដែល​បំពាក់ដោយ CPU Snapdragron 800 និង​ថែម​ទាំង​អាច​ការពារ​ការ​ជ្រាប​ទឹក​និង​ធូលី​ថែម​ទៀត ដូច្នេះ​​​គេ​ជឿ​ថា​ Samsung នឹង​មិន​ទុក​ឱកាស​ឲ្យ​គូប្រកួត​របស់ខ្លួន​ទាញ​យក​ចំណែកទីផ្សារ​បាន​​​ដោយ​ងាយៗ​នោះ​ទេ ធ្វើ​យ៉ាង​ណា​ក្រុមហ៊ុន​ត្រូវ​តែ​បញ្ចេញ​ប្រភេទ Phablet ឲ្យ​បាន​ឆាប់ ។ សម្រាប់​ព័ត៌មាន​បន្ថែម​ទាក់ទង​នឹង​រូបរាង​ក៏​ដូច​ជា​លក្ខណសម្បត្តិបច្ចេកទេស​​របស់​ Galaxy Note 3 សូម​ប្រិយមិត្ត​រង់ចាំ​តាមដាន​ជា​មួយ​ពពក​ ព្រោះ​ថា​ព័ត៌មានទាំង​នោះ​​នឹង​ត្រូវ​លាតត្រដាង​នៅ​ឯ​​ពិព័រណ៌គ្រឿង​អេឡិចត្រូនិក​អន្តរជាតិ IFA 2013 នា​ដើម​ខែកញ្ញា ៕

 រូបភាព​ធ្លាប់​លេច​ចេញ​ដែលគេ​អះអាង​ថា​ជា​ផ្នែក​ខាង​មុខ​របស់ Galaxy Note 3

ខាង​ក្រោម​នេះ​ជា​រូបភាព​គំរូ Galaxy Note 3