ទូរស័ព្ទ Firefox OS ដំបូងនឹងត្រូវប្រកាស ចេញនៅអេស្ប៉ាញ ក្នុងតម្លៃ $90
បច្ចុប្បន្នស្របពេលដែលប្រព័ន្ធប្រតិបត្តិការ Android បានកាន់កាប់ទីផ្សារទូរស័ព្ទទំនើបចំនួន ៧០% ប្រព័ន្ធប្រតិបត្តិការថ្មី Firefox OS ក៏ត្រូវបានបង្ហាញខ្លួន និងចាប់ផ្ដើមមានចេញទូរស័ព្ទទំនើបដែលដំណើរការដោយប្រព័ន្ធប្រតិបត្តិការថ្មីនេះនៅលើទីផ្សារ ។ Firefox OS គឺជាប្រព័ន្ធប្រតិបត្តិការប្រភេទ Open-source ដែលមានមូលដ្ឋានគ្រឹះជាមួយនឹង browser-based mobile operating system នឹងត្រូវបានក្រុមហ៊ុន Mozilla បញ្ជាក់ថា តាមរយៈលក្ខណសម្បត្តិវានឹងធ្វើឲ្យទូរស័ព្ទអាចដំណើរការបានលឿន ។
សម្រាប់ Firefox OS ដែលជាប្រព័ន្ធប្រតិបត្តិការថ្មី គឺប្រហែលជាមិនសូវមានកម្មវិធីសំបូរបែបនោះទេ យ៉ាងណាមិញបើយោងតាមប្រភព Androidcentral បានឲ្យដឹងថា ដោយសារតែប្រព័ន្ធប្រតិបត្តិការថ្មីនេះមានលក្ខណៈជា browser-based mobile operating system ដូច្នេះគេអាចធ្វើការសរសេរនូវកម្មវិធីបានយ៉ាងងាយតាមរយៈ HTML 5 ។ ដោយឡែកប្រភពដដែលថែមទាំងបានលើកឡើងថា តាមរយៈ HTML 5 គេអាចធ្វើការសរសេរនូវកម្មវិធីគណនាលេខ (calculator) ដែលមានលក្ខណៈស្តង់ដារ ដោយចំណាយរយៈពេលត្រឹមតែ ២ម៉ោងប៉ុណ្ណោះ សម្រាប់ប្រព័ន្ធប្រតិបត្តិការ Firefox OS ។
ទូរស័ព្ទ ZTE Open នឹងក្លាយជាទូរស័ព្ទដំបូងដែលដំណើរការដោយប្រព័ន្ធប្រតិបត្តិការ Firefox OS ហើយទូរស័ព្ទនេះនឹងត្រូវចេញលក់នៅក្នុងប្រទេសអេស្ប៉ាញ នាថ្ងៃស្អែកនេះហើយ ជាមួយនឹងតម្លៃត្រឹមតែ $90 ប៉ុណ្ណោះ ។ យ៉ាងណាមិញបន្ទាប់ពីទូរស័ព្ទ ZTE Open ដែលជាទូរស័ព្ទរបស់ក្រុមហ៊ុន ZTE ក្រុមហ៊ុន Alcatel ដែលជាក្រុមហ៊ុនដៃគូរបស់ Mozila មួយផ្សេងទៀតក៏មានគម្រោងចេញលក់នូវទូរស័ព្ទរបស់គេ Alcatel OneTouch Fire ដែលដំណើរការដោយប្រព័ន្ធប្រតិបត្តិការ Firefox OS នាពេលឆាប់ៗខាងមុខនេះផងដែរ ។
លក្ខណសម្បត្តិបច្ចេកទេសរបស់ទូរស័ព្ទ ZTE Open ៖
- អេក្រង់ទំហំ 3.5-inch
- កម្រិតភាពច្បាស់ 480 x 320 pixels
- កាមេរ៉ាទំហំ 3.2 MP
- CPU Cortex A5 Qualcomm 600Mhz ឬ 800MHz
- RAM 256MB
- មានអង្គផ្ទុកទិន្នន័យត្រឹមតែ 512MB មានបន្ថែម microSD card
សូមបញ្ជាក់ថា ក្រៅពីក្រុមហ៊ុន ZTE និង Alcatel ក្រុមហ៊ុន Mozilla ក៏មានក្រុមហ៊ុនដៃគូសហការផលិតគ្រឿង hardware ចំនួនជាង២០ ទៀតនៅជុំវិញសកលលោកផងដែរ ។ ដោយឡែក Mozilla ក៏មានគ្រោងនឹងចេញលក់នូវទូរស័ព្ទរបស់គេនៅក្នុងប្រទេសមួយចំនួនបន្ថែមទៀតផងដែរដូចជា៖ វ៉េណាស៊ុយអេឡា, ប៉ូឡូញ, ប្រេស៊ីល និង ព័រទុយហ្គាល់ នៅក្នុងឆ្នាំនេះ និងចេញលក់ទៅក្នុងទីផ្សារសហរដ្ឋអាមេរិក នាឆ្នាំ២០១៤ ខាងមុខ ។
ទស្សនាវីឌីអូនៃ Firefox OS ដំណើរការលើ Alcatel OneTouch Fire និង ZTE Open ៖
តាមរយៈការបង្កើតកម្មវិធីដោយងាយៗជាមួយនឹង HTML 5 តើប្រព័ន្ធប្រតិបត្តិការថ្មី Firefox OS នឹងអាចដណ្ដើមយកទីផ្សារទូរស័ព្ទទំនើបបានចំនួនប៉ុន្មានភាគរយទៅថ្ងៃអនាគត ?
