Note 3 ចេញនៅថ្ងៃទី៤ កញ្ញា
Note 3 ល្បីតែឈ្មោះ និងលក្ខណៈសម្បត្តិត្រួសៗកន្លងមក ឥឡូវនេះចាប់កក្រើកថ្ងៃខែប្រកាសផ្លូវការហើយគឺនៅថ្ងៃទី៤ ខែកញ្ញាខាងមុខ។ លើកនេះ ក៏បានថែមលក្ខណៈសម្បត្តិមួយចំនួនទៀតទៅលើ CPU របស់ Galaxy Note 3 ល្បីថានឹងមាន ២ជំនាន់ខុសគ្នាដូចជា Galaxy S4 ដែរ។
យោងតាមរបាយការណ៍ចុងក្រោយនេះ ឱ្យដឹងថា Samsung នឹងផ្ញើលិខិតអញ្ជើញចូលរួមព្រឹត្តិការណ៍ Samsung Unpacked របស់ខ្លួន ដែលប្រារព្ធធ្វើនៅថ្ងៃទី៤ ខែកញ្ញាខាងមុខដែលជាពេលវេលាមួយសម្រាប់ប្រកាសបើកមុខមាត់ Galaxy Note 3 ជាផ្លូវការមុនពិព័រណ៍បច្ចេកវិទ្យា IFA បើកឆាកចំនួន ២ថ្ងៃ (ថ្ងៃទី៦ ដល់ទី ១១ ខែកញ្ញា)។
លក្ខណៈសម្បត្តិមួយចំនួនធ្លាប់បានលើកឡើងមានដូចជា៖ អេក្រង់ទំហំ ៦អ៊ីញ full HD Super AMOLED ហើយអាទិត្យមុននេះឮទៀតថា Samsung ក៏អាចនឹងបំពាក់កញ្ចក់ LCD នៅលើ Phablet ថ្មីនេះផងដែរ ឬឯ resolution មានទំហំ 1920x1080px។
ចាំបានទេ នៅពេល Samsung បង្ហាញរូបរាង Galaxy S4 ជាផ្លូវការ គឺបានបែងចែក processor ខុសគ្នា ២ប្រភេទ ចំណែកឯ Galaxy Note 3 នេះក៏រំពឹងនឹងបែបនោះផងដែរ។ CPU ប្រភេទ quad-core Qualcomm Snapdragon 800 ល្បឿន 2.3GHz ហើយមួយប្រភេទទៀតជារបស់ Samsung ផ្ទាល់គឺ Exynos 5420 processor។ ប្រព័ន្ធបណ្ដាញចែកជាពីរ ដែលមួយមានត្រឹម 3G (RAM ទំហំ 2GB) និងមួយទៀតមានដល់ 4G LTE (RAM ទំហំ 3GB)។
ចំពោះមេម៉ូរីម៉ាស៊ីនមាន ៣ ទំហំផ្សេងគ្នាគឺ 16GB/32GB/64GB និងមានរហូតដល់ 128GB។ កាមេរ៉ាទំហំ 13MP ជាមួយសមត្ថភាពកំណែលំអថ្មីកាន់តែប្រសើរ តែនៅមានទាន់ដឹងថានឹងបន្ថែមបច្ចេកវិទ្យាអ្វីខ្លះនៅឡើយទេ។
ប្រភពនៅតែលើកឡើងពីលក្ខណៈសម្បត្តិថា នឹងមានដូចជា Galaxy S4 ទៀតដូចជាបច្ចេកវិទ្យាបញ្ជាដោយកាយវិការ បញ្ជាដោយកែវភ្នែក (Eye Tracking) ជាដើម។
Phablet ជំនាន់ថ្មីនេះនឹងផ្ដើមលក់ចេញពីទីផ្សារអឺរ៉ុប និងអាមេរិកដំបូងគេនៅអំឡុងខែកញ្ញា។
