បន្ទាប់​ពី​ក្រុមហ៊ុន Samsung  បាន​ធ្វើ​ការ​ប្រកាស​ចេញ​ជា​ផ្លូវ​ការ​នូវ​ទូរស័ព្ទ​ទំនើប Galaxy S4 Zoom ​យើង​ក៏​ទទួល​បាន​នូវ​ព័ត៌មាន​ថ្មី​ថា ទូរស័ព្ទ​ទំនើប​របស់​ក្រុមហ៊ុន Nokia ដែល​ជា​​គូ​ប្រកួត​ជា​មួយ​នឹង​ទូរស័ព្ទ​ទំនើប​ Galaxy S4 Zoom​ ​​របស់​ក្រុមហ៊ុន Samsung នឹង​មាន​​ឈ្មោះ​និមិត្ត​សញ្ញា​ថា Nokia Zoom ។

​តាម​ពាក្យ​ចចាមអារ៉ាម​បាន​ឲ្យ​ដឹង​ថា​ Nokia Zoom គឺ​ជា​ការ​ដែល​នាំ​យក​នូវ​​បច្ចេកវិទ្យា​កាមេរ៉ា​ ដែល​មាន​គុណភាព​ខ្ពស់​សម្រាប់​ទូរស័ព្ទ​ទំនើប និង​កុំព្យូទ័រ​បន្ទះ​ស្ដើង ​គឺ​ដូច​ជា​ទូរស័ព្ទ​កាមេរ៉ា​ទំហំ 41MP របស់​ក្រុមហ៊ុន Nokia ដែល​ជិត​នឹង​បញ្ចេញ​នា​ពេល​ខាង​មុខ​ជា​ដើម ។

ដោយ​ឡែក​បើ​យោង​​​ទៅ​តាម​ប្រភព​នៃ​ពាក្យ​ចចាមអារ៉ាម​បាន​និយាយ​ថា ​​ក្នុង​ស្រឡាយ​​នៃ Nokia Zoom គឺ​អាច​មាន​នូវ​​​​​​​កុំព្យូទ័រ​បន្ទះ​ស្ដើង​ដែល​មាន​​អេក្រង់​ទំហំ 8.5-inch និង 10.5-inch ជា​មួយ​នឹង​កម្រាស់ 8.5mm ​ហើយ​​​ម៉ូដែល​ទាំង​​ពីរ​នេះ​នឹង​អាច​​​​នឹង​ត្រូវ​នាំ​ចេញ​ជា​មួយ​នឹង​តួ​ធ្វើ​ពី​អាលុយមីញ៉ូម និង​​​​មាន​​ពណ៌​ផ្សេងៗ​គ្នា​ផង​ដែរ​ ។ ​ក្រៅ​ពី​នេះ​ប្រភព​ដដែល​បន្ថែម​ថា សម្រាប់​ទូរស័ព្ទ​​ទំនើប​ស៊េរី Lumia ដែល​មាន​អេក្រង់​ធំៗ ​និង​មាន​ឈ្មោះ​ថា Lumia 252, 625, 725, 825 និង 925 ដែល​មាន​បំពាក់​​អេក្រង់​​ទំហំ​​ 4.5-inch, 4.6-inch, 5-inch, 5.2-inch និង 5.5-inch ។  ​

ក្រៅ​ពី​​ព័ត៌មាន​ខាង​លើ​ ក្រុមហ៊ុន Nokia ត្រូវ​បាន​ពាក្យ​ចចាមអារ៉ាម​និយាយ​ថា នឹង​ប្រកាស​ចេញ​នូវ​ទូរស័ព្ទ​ប្រភេទ phablet ដែល​មាន​អេក្រង់​ទំហំ 6-inch ឬ 6.7-inch នា​ពាក់​កណ្ដាល​ខែ មិថុនា​ ឆ្នាំ​២០១៤ ​ខាង​មុខ ។ ​សូម​បញ្ជាក់​ថា ​​​​ព័ត៌មាន​ទាំង​នេះ​គឺ ​គ្រាន់​តែ​ជា​ចចាមអារ៉ាម​ប៉ុណ្ណោះ​ ដូច្នេះ​តើ​ក្រុមហ៊ុន Nokia អាច​នឹង​ផលិត​នូវ​ឧបករណ៍​របស់​គេ​ដូច​ជា​​ពាក្យ​ចចាមអារ៉ាម​បាន​និយាយ​ឬ​ទេ ?