Google ត្រៀមបិទសេវា Latitude នៅថ្ងៃទី ៩ សីហា
Latitude គឺជាសេវាកម្មពិសេសមួយរបស់ក្រុមហ៊ុន Google ដែលអាចឲ្យអ្នកប្រើធ្វើការចែករំលែកនូវទីតាំងដែលពួកគេកំពុងស្ថិតនៅទៅកាន់មនុស្សដែលគេចង់ផ្ដល់ឲ្យ ដូចជាបងប្អូន ឬមិត្តភ័ក្ដិ ជាដើម ។ ដោយឡែកសេវាកម្មនេះនឹងត្រូវក្រុមហ៊ុនបិទដំណើរការជាផ្លូវការនាថ្ងៃទី៩ ខែសីហាខាងមុខហើយ ។
ជាប់ពាក់ព័ន្ធទៅនឹងសេវាកម្ម Latitude នៅក្នុង Google Map សម្រាប់ Android, iPhone, Latitude API, iGoogle Gadget និង Latitude នៅលើគេហទំព័រក៏នឹងមិនអាចដំណើរការបានយូរទៀតដែរ គឺប្រហែល១ខែទៀតប៉ុណ្ណោះ ។
ការបិទសេវាកម្ម Latitude របស់ Google មានន័យថា យើងនឹងមិនទទួលបានការចែកចាយទីតាំងដែលកំពុងស្ថិតនៅដោយប្រើសេវាកម្មនេះបានយូរទៀតទេ ហើយក្រុមហ៊ុន ក៏មិនបញ្ចូលនូវសេវាកម្មនេះនៅក្នុង Google Map កំណែចុងក្រោយសម្រាប់ Android ផងដែរ ។ ក្រៅពីនេះសេវាកម្ម Latitude សម្រាប់ iPhone ក៏នឹងត្រូវលុបចេញពី App Store ដែរ ។
Google នឹងធ្វើការលុបចេញនូវតារាងឈ្មោះមិត្តទាំងអស់ ដែលមាននៅលើសេវាកម្ម Latitude ហើយយើងនឹងមិនអាចមើល ឬរៀបចំឈ្មោះមិត្តបានទៀតទេ ។ លើសពីនេះ រាល់កម្មវិធីដែលមានបញ្ចូលនូវ Latitude API នឹងមិនមានរយៈពេលវែងដើម្បីដំណើរការរកទិន្នន័យដែលជាទីតាំងរបស់យើងផងដែរ រួមបញ្ចូលទាំងទិន្នន័យដែលជាប្រវត្តិទីតាំងធ្លាប់មានពីពេលមុនៗ តាមរយៈសេវាកម្មរបស់ Google ។
ម្យ៉ាងវិញទៀត Google នឹងអាចលុប check in facility ចេញពី Google Map និងរាល់ auto check-ins កាលពេលមុនៗក៏នឹងត្រូវដកចេញផងដែរ ។ តែទោះជាយ៉ាងណា យើងនឹងអាចធ្វើការ check-in និងចែកចាយ (share) នូវទីតាំងដែលយើងកំពុងស្ថិតនៅ និងមើលឡើងវិញនូវ check-ins កាលពីពេលមុនៗនៅលើកម្មវិធី Google+ វិញ ៕
តើប្រិយមិត្តធ្លាប់ប្រើសេវាកម្ម Latitude ឬទេ ?
