ធនាគារអេស៊ីលីដា ប្រកាសថា មានអ្នកយកឈ្មោះ ខ្លួនទៅបោកប្រាស់ អតិថិជនយកប្រាក់
ធនាគារអេស៊ីលីដា ដែលជាធនាគារមានសាខាច្រើនជាងគេនៅក្នុងប្រទេសកម្ពុជា បានប្រកាសកាលពីដើមខែនេះថា មានជនខិលខូចមួយចំនួនបានបន្លំយកឈ្មោះធនាគារនេះទៅបោកប្រាស់យកប្រាក់ពីអតិថិជន។
សាខាមួយកន្លែងរបស់ធនាគារអេស៊ីលីដា
តាមសេចក្តីប្រកាសព័ត៌មានដែលផ្សាយលើគេហទំព័ររបស់ខ្លួន ធនាគារអេស៊ីលីដាបានឲ្យដឹងថា ក្នុងរយៈពេលកន្លងទៅថ្មីៗនេះ មានជនខិលខូចមួយចំនួនបានអះអាងខ្លួនថា ជាបុគ្គលិកធនាគារអេស៊ីលីដា ឬយកឈ្មោះធនាគារអេស៊ីលីដា ទៅប្រើប្រាស់ដើម្បីឆបោកប្រាក់ពីអតិថិជន និងសាធារណជនមួយចំនួនតាមទូរស័ព្ទ ឬតាមមធ្យោបាយផ្សេងៗទៀត ដោយតម្រូវឲ្យអតិថិជន ឬសាធារណជននោះផ្ទេរប្រាក់មួយចំនួនជាមុនសិន ដើម្បីចំណាយរត់ការ ជាថ្នូរនឹងការទទួលបានរង្វាន់ជាទឹកប្រាក់ពីធនាគារ។
ចំពោះករណីនេះ ធនាគារអេស៊ីលីដា បានធ្វើការបញ្ជាក់ថា ធនាគារខ្លួនពុំមានកម្មវិធីចាប់ឆ្នោតផ្សងសំណាង ឬផ្តល់រង្វាន់ជាទឹកប្រាក់ណាមួយជូនអតិថិជន និងសាធារណជនឡើយ។
ដូច្នេះដើម្បីចៀសវាងទទួលរងនូវការឆបោកពីសំណាក់ជនខិលខូច ធនាគារអេស៊ីលីដាបានអំពាវនាវដល់អតិថិជន ឬសាធារណជន ត្រូវទំនាក់ទំនងមកកាន់ធនាគារដោយផ្ទាល់។
សូមបញ្ជាក់ថា ករណីឆបោករបៀបនេះ ត្រូវគេសង្កេតឃើញថា បានកើតឡើងជាញឹកញាប់នៅក្នុងប្រទេសកម្ពុជា ដែលពេលខ្លះជនខិលខូចទាំងនោះបានក្លែងបន្លំជាបុគ្គលិកទូរទស្សន៍ ធនាគារ ឬក្រុមហ៊ុនផ្សេងៗ ហើយទូរស័ព្ទទៅជនរងគ្រោះដោយប្រាប់ថា ជនរងគ្រោះទទួលបានរង្វាន់នេះ រង្វាន់នោះ ប៉ុន្តែត្រូវប្រគល់ប្រាក់មួយចំនួនដល់គេ ដើម្បីជាថ្នូរទទួលបានរង្វាន់នោះជាដើម៕www.fpmonline.net
