ជិតដល់ថ្ងៃចូលរោងការស្ត្រីមេម៉ាយម្នាក់ត្រូវជនមិនស្គាល់មុខសម្លាប់
ខេត្តបាត់ដំបង៖ ស្ត្រីមេម៉ាយកូន២ម្នាក់ ដែលត្រៀមខ្លួនចូលរោងការជាថ្មី ក្នុងសប្ដាហ៍ក្រោយ នេះ ត្រូវជនមិនស្គាល់មុខសម្លាប់នៅក្នុងផ្ទះ ហើយឪពុករបស់នាង ប្រទះឃើញសាកសព ដែលជោគជាំដោយឈាម នៅល្ងាចថ្ងៃទី១១កក្កដា ២០១៣ ដែលស្ថិតក្នុងភូមិរស្មីសង្ហា ឃុំរស្មីសង្ហា ស្រុករតនមណ្ឌល។
អធិការរងស្រុករតនមណ្ឌល លោករស់ លឹមសឺនបានប្រាប់ថា ស្ត្រីរងគ្រោះឈ្មោះលឹម រ៉ាន់ អាយុ៣៨ឆ្នាំ ជាស្ត្រីមេម៉ាយកូន២ ដែលមានលំនៅឋានក្នុងភូមិ ឃុំខាងលើ និងត្រៀមខ្លួនចូលរោងការជាថ្មី ក្នុងសប្ដាហ៏ក្រោយជាមួយគួរដណ្ដឹងជាបុរសពោះម៉ាយឈ្មោះប៊ុន ហួយ អាយុ៤៧ឆ្នាំ នៅភូមិស្វាយស ឃុំត្រែង ស្រុករតនមណ្ឌល នេះ។
លោកថា គេនូវមិនទាន់កំណត់អត្តសញ្ញាណជនសង្ស័យទេ។ ស្ត្រីរងគ្រោះមានស្នាមច្របាច់ក និងស្នាមវាយលើផ្ទៃមុខធ្ងន់ធ្ងរ។
លោកអធិការរងបញ្ជាក់ថា ឪពុកស្ត្រីរងគ្រោះឈ្មោះលឹម ឆេង វ័យ៦០ឆ្នាំ បានប្រទះឃើញកូនស្រីដេកស្លាប់ក្នុងថ្លុកឈាមលើគ្រែក្នុងផ្ទះទាំងអាក្រាតកាយ ទើបមានការភ្ញាក់ផ្អើលរាយការណ៏ប្រាប់សមត្ថកិច្ចតែម្ដង ប៉ុន្តែគេមិនទាន់អាចសន្និដ្ធានថា ស្ត្រីរងគ្រោះត្រូវជនដៃដល់សម្លាប់តាំងពីពេលណានោះទេ។
ជាមួយគ្នានេះឪពុកស្ត្រីរងគ្រោះលោកលឹម ឆេង ត្រូវបានសមត្ថកិច្ចស្រង់សំដីថា គាត់បានជិះម៉ូតូទៅមើលកូនស្រីនៅផ្ទះ ក្រោយពីលោកនិងគួដណ្ដឹងរបស់នាងទូរស័ព្ទមិ នចូល តាំងពីព្រឹករហូតដល់ល្ងាច លុះពេលគាត់បើកទ្វាចូល ស្រាប់តែឃើញកូនស្រីដេកស្លាប់លើគ្រែទាំងអាក្រាតកាយក្នុងថ្លុកឈាម និងមានកម្រាលលពួក និងសម្ភារៈផ្សេងៗធ្លាក់របាត់រប៉ាយពេញក្នុងផ្ទះ។
លោកប៊ុន ហួយ ជាគួដណ្ដឹងក៏បានបញ្ជាក់ដែរថា គួដណ្ដឹងរបស់លោកបានទូរស័ព្ទមកលោកនៅម៉ោងប្រហែល៦ព្រឹកថ្ងៃកើតហេតុនោះ សួរនាំពីរឿងរកកម្មករទៅដាំដំណាំ។ ក្រោយមកនៅម៉ោង៨ព្រឹកថ្ងៃដដែល លោកបានទូរស័ព្ទទៅគួរដណ្ដឹងវិញ បែរជាទំនាក់ទំនងលែងបានរហូត ។ លោកប្រាប់ឲ្យប្អូនស្រីរបស់គួដណ្ដឹង និងឪពុកជួយទំនាក់ទំនងក៏មិនអាចទាក់ទងបានដែរ លុះនៅល្ងាចបន្តិច មានការសង្ស័យឪពុកនាងជិះម៉ូតូទៅមើលដល់ផ្ទះ ស្រាប់តែឃើញគួដណ្ដឹងរបស់លោកត្រូវគេសម្លាប់បាត់ទៅហើយ។
ជុំវិញករណីនេះអ្នកភូមិខ្លះបានបង្ហើបឲ្យដឹងថា ស្ត្រីរងគ្រោះបានលែងលះប្ដីដើមរួចស្រេចហើយ ប៉ុន្តែក្រោយមកគេសង្កេតឃើញមានបុរសជាច្រើន តែងមានទំនាក់ទំនងជាមួយស្ត្រីមេម៉ាយរូបនេះ រហូតចុងក្រោយនេះក៏មានបុរសពោះម៉ាយម្នាក់ចូលស្ដីដណ្ដឹង និងជិតដល់ថ្ងៃចូលរោងការទៅហើយ ក៏មានរឿងនេះកើតឡើងតែម្ដង។
គេសង្ស័យការស្លាប់របស់ស្ត្រីមេម៉ាយរូបនេះ មានជាប់ពាក់ព័ន្ធក្នុងរឿងស្នេហាត្រីកោណ ដែលមិនដាច់ស្រេច។
ទោះជាយ៉ាងណា នៅកន្លែងកើតហេតុសមត្ថកិច្ចរកឃើញពូថៅ១នៅលើគ្រែ កាំបិតចុងស្រូច១ នៅក្រោមគ្រែ តែគេមិនទាន់ហ៊ានអះអាងថា វត្ថុតាងទាំងនេះមានជាប់ពាក់ព័ន្ធដែរឬយ៉ាងណានោះទេ។
លោករស់ លឹមសឺន អធិការរងស្រុករតនមណ្ឌលបានឲ្យដឹងថា មុខសញ្ញាជនសង្ស័យកម្លាំងជំនាញមិនទាន់កំណត់ឲ្យបាន ច្បាស់លាស់ទេ តែកំពុងសួរនាំសាក្សី និងធ្វើការស្រាវជ្រាវអំពីប្រវត្តិខ្លះៗរបស់ស្ត្រីរងគ្រោះ ដែលជាប់ជំពាក់ក្នុងរឿងស្នេហា ដូចការលើកឡើងរបស់អ្នកភូមិ។ ប៉ុន្តែនេះគ្រាន់តែជាតម្រុយមួយ ដើម្បីបើកការស៊ើបអង្កេតតែប៉ុណ្ណោះ៕
ប្រភពពី ann
