កម្មការិនីម្នាក់ ត្រូវរថយន្តបុកស្លាប់ ដោយសារតែ បាយមួយកញ្ចប់
ខេត្តកំពង់ឆ្នាំង ៖ មានហេតុការណ៍គ្រោះថ្នាក់ចរាចរណ៍ដ៏គួរឲ្យរន្ធត់មួយបានកើតឡើង កាលពីវេលាម៉ោង៦និង៣០នាទីព្រឹកថ្ងៃទី០៣ ខែកក្កដា ឆ្នាំ២០១៣ ដែលបណ្តាលឲ្យស្ត្រីជាកម្មការិនីកាត់ដេរម្នាក់ បានស្លាប់ភ្លាមៗនៅកន្លែងហេតុ ដោយសារតែត្រូវរថយន្តម៉ាកហ៊ីណូ មួយគ្រឿង បានបើកបុកពេញទំហឹងនៅចំណុចផ្លូវជាតិលេខ៥ ក្នុងភូមិសូវង្ស ឃុំតាជេស ស្រុកកំពង់ត្រឡាច។
ប្រភពព័ត៌មានពីកន្លែងកើតហេតុបានឲ្យដឹងថា នារីរងគ្រោះដែលត្រូវបានស្លាប់បាត់បង់ជីវិតមានឈ្មោះ អ៊ឹម ចន្ថា អាយុ២៦ឆ្នាំ មានទីលំនៅក្នុងភូមិពពេលពក ឃុំគោកបន្ទាយ ស្រុករលាប្អៀរ ជាកម្មការិនីកាត់ដេរនៅរោងចក្រ ប្លូម ហ្វ៊ៀល ខេមបូឌា ។ ប្រភពដដែលបានបន្តឱ្យដឹងទៀតថា មុនពេលកើតហេតុ គឺគេឃើញស្ត្រីរងគ្រោះខាងលើ បានជិះរថយន្តដឹកកម្មករមកឈប់កន្លែងធ្វើការ ខណៈដែលនាងបានចុះពីលើរថយន្តក៏បានភ្លេចយកកញ្ចប់បាយ រួចក៏ត្រឡប់ឆ្លងទៅយកវិញ តែភ្លាមៗនោះស្រាប់តែមានរថយន្តម៉ាកហ៊ីណូ មួយគ្រឿង បានបើកមកបុកនារីរងគ្រោះ ពេញទំហឹងបណ្តាលឲ្យស្លាប់ភ្លាមៗតែម្តង ។
បន្ទាប់ពីកើតហេតុសមត្ថកិច្ចបានចុះទៅអន្តរាគមន៍ធ្វើការវាស់វែង និងបានឃាត់ខ្លួនអ្នកបើកបរ និងរថយន្តយកទៅរក្សាទុកនៅអធិការស្រុកកំពង់ត្រឡាច ដើម្បីរង់ចាំការដោះស្រាយនៅពេលក្រោយ។ ចំណែកសាកសពរងគ្រោះ ត្រូវបានក្រុមគ្រួសារដឹកយកទៅធ្វើបុណ្យតាមប្រពៃណី៕ដោយ វត្តភ្នំ
