លោក សេង លាង យកឈ្មោះថ្នាក់លើ ទៅរាប់ក្បាលកុងតឺន័រ ដឹកទំនិញចេញចូល កំពង់ផែក្រុងព្រះសីហនុ តាមតែអំពើចិត្ត
ខេត្តព្រះសីហនុ ៖លោក សេង លាង ជាប្រធានស្នាក់ការនគរបាលអន្តោប្រវេសន៍ប្រចាំច្រកកំពង់ផែអន្តរជាតិ ខេត្តព្រះសីហនុនៅតែក្រអឺតក្រទមបង្កព្យុះភ្លៀងតាមតែអំពើចិត្ត តាមរយៈការចាត់តាំងឲ្យមន្ត្រីក្រោមឱវាទរបស់ខ្លួន អង្គុយចាំរាប់ក្បាលឡានដឹកកុងតឺន័រចេញចូលកំពង់ផែអន្តរជាតិក្រុងព្រះសីហនុ យកលុយច្រកហោប៉ៅ ដោយគ្មានក្រែងញញើតពីច្បាប់ទម្លាប់ ឬវិធានការរឹតបន្តឹងរបស់អង្គភាពប្រឆាំងអំពើពុករលួយនោះទេ ហើយសកម្មភាពដែលលោក សេង លាង កំពុងអនុវត្តន៍សព្វថ្ងៃនេះគឺផ្ទុយពីការចាត់តាំងរបស់អគ្គស្នងការនគរបាលជាតិ ដែលទាមទារឲ្យមានការកែទម្រង់ជាបន្ទាន់។
អ្នករកស៊ីដឹកជញ្ជូនទំនិញឆ្លងកាត់កំពង់ផែអន្តរជាតិ ខេត្តព្រះសីហនុ បានលើកឡើងពីការកោសរូសបង្ខំឲ្យបង់លុយពីសំណាក់នគរបាលអន្តោប្រវេសន៍របស់លោក សេង លាង ពោលគឺក្នុងម៉ោងរដ្ឋបាលនគរបាលអន្តោប្រវេសន៍កំណត់ឲ្យបង់លុយចំនួន ១,៥ដុល្លារអាមេរិក សម្រាប់ទំនិញដែលដឹកចេញពីកំពង់ផែ ប៉ុន្តែចំពោះទំនិញដែលដឹកចូលកំពង់ផែសម្រាប់នាំចេញទៅក្រៅប្រទេស ត្រូវនគរបាលអន្តោប្រវេសន៍បង្ខំឲ្យបង់លុយចំនួន ៤,៥ដុល្លារអាមេរិក ក្នុងមួយកុងតឺន័រ។ ដោយឡែក សម្រាប់បញ្ហាកកស្ទះឬផុតម៉ោងរដ្ឋបាល សម្រាប់កុងតឺន័រ ដែលដឹកចេញពីកំពង់ផែ ត្រូវបង់លុយចំនួន ១,៥ដុល្លារអាមេរិក គេបង្ខំឲ្យបង់លុយចាប់ពី២ម៉ឺនរៀល ដល់៣ម៉ឺនរៀល ហើយកុងតឺន័រដែលនាំចូលកំពង់ផែ សម្រាប់នាំចេញទៅក្រៅប្រទេសតម្លៃធម្មតាត្រូវបង់ ៤,៥ដុល្លារប៉ុណ្ណោះ ត្រូវគេបង្ខំឲ្យបង់ដល់ទៅ១៥ដុល្លារឯណោះ។
សម្រាប់ការបង់លុយកាក់ ឲ្យមន្ត្រីនគរបាលអន្តោប្រវេសន៍របស់លោក សេង លាង គឺធ្វើទៅតាមការទាមទារ តាមតែបបូរមាត់នៃមន្ត្រីទាំងនោះដែលអង្គុយចាំតែរាប់កុងតឺន័រចេញចូល កំពង់ផែក្រុងព្រះសីហនុយកលុយ ដោយគ្មានលិខិតស្នាមឬវិក្កយបត្រអ្វីឡើយ អាចចាត់ទុកជាអំពើពុករលួយ ព្រោះក្រសួងសេដ្ឋកិច្ចនិងហិរញ្ញវត្ថុ ក៏ដូចជាអង្គភាពប្រឆាំងអំពើពុករលួយបានបញ្ជាក់ជារឿយៗថា រាល់ការបង់ប្រាក់លើសេវាសាធារណៈដែលគ្មានវិក្កយបត្រ អាចចាត់ទុកជាអំពើពុករលួយ ដែលត្រូវនាំទៅផ្តន្ទាទោសតាមច្បាប់។ មន្ត្រីនគរបាលអន្តោប្រវេសន៍ដែលអង្គុយចាំរាប់កុងតឺន័រចេញចូលកំពង់ផែក្រុងព្រះសីហនុ គឺធ្វើតាមតែការចាត់តាំង និងការណែនាំរបស់លោក សេង លាង ប៉ុន្តែប្រសិនបើមានការចាប់កំហុសណាមួយពីអង្គភាពប្រឆាំងអំពើពុករលួយគេយល់ថា លោក សេង លាង ពិតជាព្យាយាមដោះសាយករួចខ្លួនជាមិនខានឡើយ ។
ភាពអសកម្មរបស់នគរបាលអន្តោប្រវេសន៍ប្រចាំច្រកកំពង់ផែអន្តរជាតិក្រុងព្រះសីហនុ ធ្លាប់ត្រូវបានមន្ត្រីក្រសួងមហាផ្ទៃម្នាក់អះអាងថា ផ្ទុយពីគោលការណ៍របស់អគ្គស្នងការនគរបាលជាតិ ព្រោះតួនាទីជានគរបាលអន្តោប្រវេសន៍ត្រូវបាត់ចាត់តាំងឲ្យទៅត្រួតពិនិត្យលិខិតឆ្លងដែនទិដ្ឋាការ និងអ្នកដំណើរឆ្លងកាត់ច្រកអន្តរជាតិតែប៉ុណ្ណោះ មិនមានតួនាទីអ្វីត្រូវទៅរាប់កុងតឺន័រចេញចូលកំពង់ផែក្រុងព្រះសីហនុ ប្រមូលលុយយកទៅច្រកហោប៉ៅនោះទេ។ អ្វីដែលលោក សេង លាង កំពុងធ្វើមិនត្រឹមតែផ្ទុយពីគោលការណ៍របស់ក្រសួងមហាផ្ទៃនិងអគ្គស្នងការនគរបាលជាតិប៉ុណ្ណោះទេ ថែមទាំងធ្វើឲ្យប៉ះពាល់ដល់គោលនយោបាយទាក់ទាញអ្នកវិនិយោគទុននិងការរឹតបន្តឹងលុបបំបាត់អំពើពុករលួយរបស់រាជរដ្ឋាភិបាលផងដែរ។
ជាញឹកញាប់គេតែងតែឮមន្ត្រីនគរបាលអន្តោប្រវេសន៍ក្រោមបញ្ជារបស់លោក សេង លាង អួតអាងអំពីការប្រឹងប្រែងប្រមូលលុយយកទៅបង់ជូនថ្នាក់លើតាម រយៈ ការរាប់កុងតឺន័រចេញចូលច្រកកំពង់ផែអន្តរជាតិក្រុងព្រះសីហនុ តាមតែអំពើចិត្ត ប៉ុន្តែគេមិនច្បាស់ទេថា តើថ្នាក់លើបានបញ្ជាឲ្យលោក សេង លាង ធ្វើដូច្នេះឬក៏យ៉ាងណានោះទេ។ ប៉ុន្តែអ្វីដែលនគរបាលអន្តោប្រវេសន៍របស់លោក សេង លាង បានអួតអាងទំនងជាការយកឈ្មោះថ្នាក់លើមកបិទបាំងអំពើពុករលួយរបស់ខ្លួននិងដើម្បីកោសរូសឲ្យក្រុមហ៊ុនរកស៊ីដឹកជញ្ជូនទំនិញចេញចូលកំពង់ផែក្រុងព្រះសីហនុ បង់លុយរួចប្រមូលលុយយកទៅច្រកហោប៉ៅផ្ទាល់ខ្លួនតែប៉ុណ្ណោះ ៕ដោយវត្តភ្នំ
