បុរសម្នាក់ត្រូវ តណ្ហាឡើងដល់ កម្រិតចាប់រំលោភ មិនរើសមុខ សូម្បីតែប្អូន ថ្លៃជីដូនមួយ ខ្លួនឯងក៏ មិនលើកលែង
រាជធានីភ្នំពេញ ៖ ដោយសារតែកាមតណ្ហាពុះកញ្ជ្រោលដុតរោលពេញខ្លួនប្រាណ ធ្វើឲ្យបុរសម្នាក់បាត់បង់សតិ មិនបានគិតពិចារណាឲ្យបានវែងឆ្ងាយ រហូតឈានដល់ការធ្វើសកម្មភាពចាប់រំលោភប្អូនថ្លៃស្រីជីដូនមួយខ្លួនឯងរហូតបានសម្រេច កាលពីថ្ងៃទី២៥ ខែមិថុនា ឆ្នាំ២០១៣ នៅចំណុចផ្ទះលេខ ៣៦AEo ផ្លូវលេខ៤០៨ ក្រុម២២ ភូមិ៣ សង្កាត់ទួលទំពូង២ ខណ្ឌចំការមន។ បន្ទាប់មកក៏ត្រូវបានសមត្ថកិច្ច នគរបាលខណ្ឌចំការមន ឃាត់ខ្លួនពីបទរំលោភសេពសន្ថវៈ នៅរសៀលថ្ងៃទី០១ ខែកក្កដា ឆ្នាំ២០១៣ នៅចំណុចផ្ទះកើតហេតុខាងលើ។
ប្រភពព័ត៌មានពីសមត្ថកិច្ចបានឲ្យដឹងថា បុរសដែលត្រូវកាមតណ្ហាដុតរោលរហូតរំលោភលែងស្គាល់បងប្អូនខ្លួនឯងនោះមានឈ្មោះ ឯក ភឿន ភេទប្រុស អាយុ ៣៦ឆ្នាំ មានមុខរបរជាអ្នកបើករថយន្ត ត្រូវជាបងថ្លៃជីដូនមួយជនរងគ្រោះ ស្នាក់នៅភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។ ចំណែកនារីរងគ្រោះ ឈ្មោះ អ ផ. ស.ក.ញ អាយុ ២៧ឆ្នាំ ស្នាក់ផ្ទះកើតហេតុ ។
បន្ទាប់ពីធ្វើការឃាត់ខ្លួនជនសង្ស័យខាងលើបានសារភាពប្រាប់សមត្ថកិច្ចថា កាលពីថ្ងៃទី២៥ ខែមិថុនា ឆ្នាំ២០១៣ រូបគេបានចុះ ពីលើផ្ទះជាន់ទី១ ហើយក៏បាននិយាយលួងលោមជនរងគ្រោះឲ្យចូលក្នុងបន្ទប់ ភ្លាមនោះរូបគេក៏បានចាក់គន្លឹះទ្វារ រួចចាប់ផ្តើមធ្វើសកម្មភាពរំលោភនារីរងគ្រោះ រហូតបានសម្រេច ។ លុះស្អែកឡើង ថ្ងៃទី២៦ ខែមិថុនា ឆ្នាំ២០១៣ ស្ត្រីរងគ្រោះបាន និយាយប្រាប់ម្តាយមីង និង ម្តាយបង្កើតពីរឿងបងថ្លៃជីដូនមួយចាប់រំលោភ ។ បន្ទាប់ពីបានដឹងរឿងហើយ ម្តាយមីង និងម្តាយបង្កើត បានទៅដាក់ពាក្យបណ្តឹងសុំឲ្យនគរបាលទួលទំពូងទី២ ជាប់ឃាត់ខ្លួនជនសង្ស័យខាងលើតែម្តង ។
បច្ចុប្បន្នជនសង្ស័យខាងលើ ត្រូវបានសមត្ថកិច្ចបញ្ជូនខ្លួនមកឃុំនៅអធិការដ្ឋាននគរបាលខណ្ឌចំការមនជាបណ្តោះអាសន្ន ដើម្បីកសាងសំណុំរឿងបញ្ជូនទៅតុលាការចាត់ការទៅតាមផ្លូវច្បាប់៕ដោយវត្តភ្នំ
