គឹម លីហ្សា ជម្រះបញ្ជី ជាមួយសូណូ មុនទៅអូស្ត្រាលី
ភ្នំពេញ ៖ មុននឹងឡើងយន្តហោះឆ្ពោះទៅកាន់ទឹកដីអូស្ត្រាលីជាលើកទី៣នេះ តារាសម្តែងនាង គឹម លីហ្សា ដែលកំពុងបារម្ភខ្លាចអ្នកនាង ច័ន្ទ សុផានី តាមរករឿងក្រោយពេលបែកធ្លាយថានាងមានស្នេហាជាមួយ នឹងតារាចម្រៀង សូណូ ដែលជាប្តីអត់ខាន់ស្លារបស់ច័ន្ទសុផានី នោះ បានចេញមុខមកបញ្ជាក់ប្រាប់អ្នកកាសែត ចំពោះដំណឹងចំណងស្នេហ៍ត្រីកោណនេះ។ ស្របពេលដែលតារាចម្រៀង ហ្សូណូ វេចបង្វេចចុះចោលប្រពន្ធនិងកូនស្រីវ័យ៥ឆ្នាំឲ្យទឹកភ្នែកហូរឥតឈប់បានតែប៉ុន្មានខែស្រាប់តែមានព័ត៌មានចុះផ្សាយថាតារាចម្រៀងរស្មីហង្សមាស លោកហ្សូណូ បានបង្កាត់ភ្លើងស្នេហាជាមួយនឹងតារាសម្តែងសាច់សខ្ចីនាង គឹម លីហ្សា ដែលដំណឹងនេះ បានធ្វើឲ្យ គឹម លីហ្សា ស្រៀវខ្លួនតែម្តង ព្រោះខ្លាចអ្នកនាង ច័ន្ទ សុផានី ដែលជាប្រពន្ធគ្មានខាន់ស្លារបស់ សូណូ ដែលកំពុងមានទុក្ខធំតាមរករឿងនោះ។
ថ្វីដ្បិតតែកន្លងមក គឹម លីហ្សា ធ្លាប់បញ្ជាក់រួចមកហើយ តែបំណកស្រាយរបស់នាងហាក់មិនអាចលុបបំបាត់ដំណឹងស្នេហ៍មួយនេះបាននៅឡើយ។ នៅសល់តែប៉ុន្មានថ្ងៃទៀតនេះ តារាចម្រៀងសម្តែងនាង គឹម លីហ្សា នឹងត្រូវស្ពាយយួរវ៉ាលីសសំពីងសំពោងធ្វើដំណើរហោះហើរតាមយន្តហោះទៅសម្តែងនៅប្រទេសអូស្ត្រាលីរយៈពេលជាងមួយខែជាមួយនឹងតារាសម្តែង អេឡិច ច័ន្ទត្រា រតនៈ ពិសិដ្ឋ និងនាង ឆយី តែមុននឹងឃ្លាតចាកចេញពីដែនដីកម្ពុជាគឹម លីហ្សា ក៏មិនទុកឲ្យរឿងអាស្រូវស្នេហាប្តីគេកាន់តែរីកសុសសាយបន្តទៀតដែរ ដោយនាងបានចេញមុខបញ្ជាក់ជាថ្មីថា នាង និង សូណូ គ្មានសម្ព័ន្ធស្នេហានឹងគ្នាដូចគេនិយាយនោះឡើយ។
ចំពោះដំណឹងបែបនេះ នាងបាននិយាយជាថ្មីថា៖ «និយាយទៅគឺអត់មានរឿងនេះទេ ខ្ញុំនិងហ្សូណូ អត់ដែលមានទំនាក់ទំនងជិតស្និទ្ធនឹងគ្នានោះទេ មួយខែមិនទាន់បានជួបមុខគ្នាម្តងផង តែគេបែរជាចោទថា មានស្នេហានឹងគ្នា ទៅវិញ។ យើងបានជួបគ្នានៅពេលថតខារ៉ាអូខេ ម្តងម្កាលប៉ុណ្ណោះ ហើយក៏ពុំធ្លាប់ទៅណាតែពីរនាក់ ដូចការលេចឮនោះដែរ គឺវាជារឿងមិនពិតនោះទេ»។ ដោយឡែកតារាចម្រៀងរបស់រស្មីហង្សមាសលោក សូណូ មិនអាចទាក់ទងសុំការបំភ្លឺបានទេ ដោយសារលេខទូរស័ព្ទដែលលោកធ្លាប់ប្រើ មានបុរសម្នាក់លើកតែប្រាប់ថា មិនមែនសូណូ។
ការបែកធ្លាយដំណឹងមិនគួរឲ្យគិតបែបនេះ ត្រូវបានតារាចម្រៀងដែលវិវត្តខ្លួនពីតារាចម្រៀងមកជាតារាសម្តែងនាង គឹម លីហ្សា បញ្ជាក់ថា នាងគិតយ៉ាងណាក៏មិនដឹងថា ហេតុអ្វីបានជាគេផ្គូផ្គងរូបនាងជាមួយនឹងតារាចម្រៀង ហ្សូណូ ដែរហើយដោយសារតែការនិយាយគ្មានការពិតនេះបានធ្វើឲ្យរូបនាងកាន់តែមានការបារម្ភខ្លាចអតីតប្រពន្ធរបស់លោក ហ្សូណូ គឺនាង ច័ន្ទ សុផានី យល់ច្រឡំលើនាង និងចេញមុខមករករឿងនាងនោះ។
តារាសម្តែងវ័យ២៤ឆ្នាំ ថៅកែផ្ទះសំណាក់២កន្លែងនៅភ្នំពេញនាង គឹម លីហ្សា បានបញ្ជាក់ថា៖«ខ្ញុំមិនដឹងគេដឹងមកពីណាទេ ខ្ញុំអត់ដឹងអីសោះ គេបែរជាផ្គូផ្គងខ្ញុំ និងហ្សូណូ ទៅវិញ។ សម្រាប់ខ្ញុំធម្មតាទេ ព្រោះយើងអ្នកសិល្បៈគេចមិនផុតពីរឿងអាស្រូវទេ។ តែខ្ញុំ និងបង ផានី សុទ្ធតែអ្នកស្គាល់គ្នា ហេតុនេះហើយ ខ្ញុំចេះតែមានអារម្មណ៍ខ្លាចច័ន្ទ សុផានី (ប្រពន្ធហ្សូណូមានកូនស្រីម្នាក់) យល់ច្រឡំ និងប្រតិកម្មមកលើខ្ញុំ គឺខ្ញុំមិនចង់ឲ្យមានពាក្យចចាមអារ៉ាមផ្តេសផ្តាសមកលើខ្ញុំអ៊ីចឹងទេ»។
នាងបានបញ្ជាក់ថា៖«ថ្វីដ្បិតតែខ្ញុំ និងសូណូ មិនស្និទ្ធស្នាលនឹងគ្នា តែពួកយើងបានស្គាល់គ្នាតាំងពីក្មេងៗមកម្ល៉េះ បើប្រុងស្រឡាញ់គ្នា គឺស្រឡាញ់យូរហើយ មិនបាច់ចាំទល់សព្វថ្ងៃនេះទេ»។ ដោយសារតែភ្លើងស្នេហ៍ ច័ន្ទ សុផានី លើ សូណូ មានទំហំធំធេងនោះ ទស្សនិកជនចង់ដឹងណាស់ថា អ្នកនាង ច័ន្ទ សុផានី មានអារម្មណ៍បែបណាចំពោះព័ត៌មានដែលធ្លាយថា សូណូ បញ្ឆេះភ្លើងស្នេហ៍ជាមួយគឹម លីហ្សា នោះ។ តែយ៉ាងណា ច័ន្ទ សុផានី មិនលើកទូរស័ព្ទឡើយ។ នៅពេលនេះ មហាជនកំពុងអង្គុយចាំមើលថា តើស្នេហានោះ ជាការពិតឬយ៉ាងណា? តែភាគច្រើនគេជឿថា មិនអាចទៅរួចហើយ ព្រោះកន្លងមក គឹម លីហ្សា ធ្លាប់ប្រកាសក្តែងៗឲ្យគេឯងបានដឹងថា នាងមិនយកប្តីជាអ្នកសិល្បៈដាច់ខាត។ នាងធ្លាប់និយាយថា៖«ខ្ញុំមិនចង់បានប្តីជាអ្នកសិល្បៈដូចគ្នាទេ ខ្ញុំចង់បានប្តីជាអ្នករកស៊ី ឬធ្វើការជាង»។
ក្នុងនាមជាស្រីស្អាតសាច់ឈាមតារា នេះមិនមែនជាលើកទីមួយទេសម្រាប់ការបែកធ្លាយចំណងស្នេហ៍របស់នាង គឹម លីហ្សា នោះ។ មុននេះបន្តិច នាងបានក្លាយជាថៅកែផ្ទះជួលតម្លៃរាប់ម៉ឺនដុល្លារ ដែលគេសង្ស័យថា ប្រហែលជានាងមានឥទ្ធិពលពីគូស្នេហ៍របស់នាងណាម្នាក់តែភ្លាមនោះនាងក៏បដិសេធយ៉ាងច្បាស់ផងដែរ។
ក្រៅពីនោះលីហ្សា ក៏ធ្លាប់លេចចេញនូវចំណងស្នេហ៍ឆ្លងទ្វីបជាមួយនឹងអាណិកជនអូស្ត្រាលីផងដែរ តែនៅពេលនេះនាងបានបញ្ជាក់យ៉ាងម៉ឺងម៉ាត់ថា ទាំងគូស្នេហ៍នៅក្នុងស្រុក និងក្រៅស្រុកគឺនាងអត់មានទាំងអស់។ នាងបានបញ្ជាក់ថា៖«និយាយរួមទៅ ពេលនេះ ខ្ញុំមិនមានគូស្នេហ៍ឬកំណាន់ចិត្តទេ អ្នកក្នុងស្រុកក៏អត់ អ្នកនៅអូស្ត្រាលីក៏អត់ដែរ»៕ via: techno2day
