ណុប បាយ៉ារិទ្ធ ឈឺឆ្អាលនឹងរឿង ទេព បូព្រឹក្ស ដូចគូស្នេហ៍មែនទែន
ភ្នំពេញ : ក្រោយពីព្យុះភ្លៀងបោកបក់បង្កាច់បង្ខូចកេរ្តិ៍ឈ្មោះមកលើតារាចម្រៀងរួមទ្រនំកញ្ញា ទេព បូព្រឹក្ស ម្តងហើយម្តងទៀត ហើយម្ចាស់ខ្លួនមិនទាន់មានពន្លឺវែកមុខជននោះនៅក្នុងបណ្ដាញហ្វេសប៊ុកលោក ណុប បាយ៉ារិទ្ធ ក្រៅពីអះអាងថា ទេពបូព្រឹក្ស មិនមែនជាមនុស្សប្រភេទនោះលោកនៅហ៊ានអះអាងប្រាប់ថា ជនខិលខូចដែលមានបំណងមិនល្អចំពោះទេព បូព្រឹក្ស នោះលោកបានស្គាល់អត្តសញ្ញាណច្បាស់មួយរយភាគរយ ហើយក៏មានការព្រមានយ៉ាងធ្ងន់ៗទៅអ្នកមានបំណងមិនល្អចំពោះទេព បូព្រឹក្ស នោះទៀតផង។
កាយវិការដែលស្តែងចេញពីការយកចិត្តទុកដាក់របស់តារាចម្រៀងចាស់វស្សានៅក្នុងទ្រនំហង្សមាស លោក ណុប បាយ៉ារិទ្ធ មកលើសិស្សប្អូនជំនាន់ថ្មីនាង ទេព បូព្រឹក្ស ដូចជាគូស្នេហ៍យល់ចិត្តគ្នាទើបតែស្តែងចេញគ្រាដែលសិស្សប្អូនធ្មេញចំពើសសម្បូរក្បាច់រាំនាង ទេព បូព្រឹក្ស ត្រូវបានជនខិលខូចយករូបថតនិងឈ្មោះនាងទៅបង្កើតគណនេយ្យហ្វេសប៊ុកហើយបានសរសេរពាក្យពេចន៍ជាច្រើនលម្អៀងទៅកាន់គណបក្សសង្គ្រោះជាតិ ដូចជាពាក្យថា «រីករាយ កម្សាន្តជាមួយនាងខ្ញុំទេព បូព្រឹក្សបន្ទាប់ពីគណបក្សសង្គ្រោះជាតិឈ្នះឆ្នោត»។
សកម្មភាពនេះផ្ទុយពីសិល្បករសិល្បការិនីជាច្រើននាក់ដែលកំពុងសម្តែងការគាំទ្របក្សនយោបាយដឹកនាំប្រទេសមួយនេះ។ ប៉ុន្តែការលេចចេញឈ្មោះ ទេព បូព្រឹក្ស លើទំព័រហ្វេសប៊ុកនិងបំផុសអក្សរដ៏គួរឲ្យភ្ញាក់ផ្អើល មិននឹកស្មានដល់នោះ ត្រូវបាននាងអះអាងថា នោះមិនមែនឈ្មោះទំព័រហ្វេសប៊ុកពិតរបស់នាងឡើយ ដោយមានអ្នកខិលខូចលួចបង្កើតដើម្បីបង្ខូចកិតិ្តយស ហើយនាងក៏បានប្រកាសថា នាងកំពុងតាមវែករកមុខមនុស្សអាក្រក់នោះដែរ។
បើទោះជាសាមីខ្លួនកញ្ញា ទេព បូព្រឹក្ស ប្រកាសពីមហិច្ឆតា តាមរកវែកមុខជនមានបំណងមិនល្អចំពោះនាងយ៉ាងដាច់អហង្ការក្តី តែនៅក្នុងទំព័រហ្វេសប៊ុកដែលប្រើឈ្មោះថា Teb Boprek Singer នោះមិនបានបញ្ឈប់នូវសកម្មភាពនោះឡើយ ធ្វើឲ្យតារាចម្រៀងសម្បូរក្បាច់រាំកញ្ញា ទេពបូព្រឹក្ស វិលមុខនឹងការតាមរកជនអាថ៌កំបាំងដែលយកឈ្មោះនាងប្រើក្នុងបំណងមិនល្អនោះ។
យ៉ាងណា ទង្វើផ្គើននឹងឧត្តមគតិសាមីខ្លួន ត្រូវបានតារាចម្រៀងចាស់វស្សានៅទ្រនំហង្សមាសលោក ណុប បាយ៉ារិទ្ធ បានបង្ហាញពីពន្លឺនៃលទ្ធផលក្នុងដំណើរជួយវែករកមុខអ្នកដែលមានបំណងបង្កាច់បង្ខូចកិត្តិយសសិស្សប្អូន កញ្ញា ទេព បូព្រឹក្ស អមជាមួយហេតុផលជាច្រើន ដែលហេតុផលខ្លះនោះហាក់ស្តែងឲ្យគេដឹងថាជាហេតុផលមិនមែនជាលក្ខណៈស្និទ្ធស្នាលធម្មតា។
លោក ណុប បាយ៉ារិទ្ធបានសរសេរបង្ហោះក្នុងហ្វេសប៊ុកថា៖ «បណ្តាមិត្តភក្តិបងប្អូនក្នុងហ្វេសប៊ុកrethfcជាទីរាប់អាន។ មួយរយៈនេះហ្វេសប៊ុករបស់ប្អូនស្រីទេព បូព្រឹក្សត្រូវជនថោកទាបតែងតែfakeបន្លំរបស់នាងយកទៅសរសេរមិនល្អជាច្រើនទាក់ទងនឹងរឿងនយោបាយនិងរឿងមិនល្អផ្សេងៗទៀតក្នុងគោលបំណងបំផ្លាញកេរ្តិ៍ឈ្មោះនាង»។
ប៉ុន្តែតារាចម្រៀងមុខដូចកូរ៉េលោក ណុប បាយ៉ារិទ្ធ ក៏បានថ្លែងពីលទ្ធផលពោរពេញការជឿជាក់ទៅឲ្យនាង ទេព បូព្រឹក្ស ផងដែរ ដោយលោកប្រាប់ថា៖ «ទៅមកៗដង្កូវចេញពីសាច់ឯងសោះ។ ហាស់! អាព្រឹក្សអើយ!សំណាងហើយអូនដែលព្រះជួយអូនឯង។ បងរកមុខអាអ្នកfakeprofileអូនឯងចេញបានត្រឹមក្បាលហើយ។ ល្ងង់ៗដូចពួកយើងវានឹងទៅជាមនុស្សឆ្លាតក្នុងថ្ងៃ១គឺថ្ងៃនេះ។ មកពីគេគិតថាយើងល្ងង់ពេក។ គិតទៅម្យ៉ាងហ្ន! ធ្វើដើម្បីសងសឹក»។
លោក ណុប បាយ៉ារិទ្ធ បានបញ្ជាក់ថា៖«ខ្ញុំទុកមុខឲ្យទើបមិនសរសេរចំឈ្មោះជននោះ។ឲ្យដឹងថាមនុស្សយើងម្នាក់ៗមិនមែនដំឡូងមូលទេ»។
បន្ថែមលើហេតុផលនោះ សិស្សច្បងដែលស្តែងពីការយកចិត្តទុកដាក់មកលើសិស្សប្អូនលើសពីកាយវិការរាប់អានធម្មតានោះ លោក ណុប បាយ៉ារិទ្ធ ក៏បានលើកពីហេតុផលដែលបង្ហាញផ្លូវឲ្យលោកមានភាពងាយស្រួលក្នុងការតាមរកវែកមុខជនខិលខូចមកលើទេព បូព្រឹក្ស ក្នុងពេលខ្លីដែលងាយដូចគេបកចេកនោះលោកអះអាងថា៖«វាចម្លែកដែរដែលរឿងអាក្រក់វាមកធ្វើដាក់តែចំពោះនាងតែម្នាក់គត់? វាហាក់ដូចរឹតតែធ្វើឲ្យមិត្តភក្តិក្នុងហ្វេសប៊ុកដឹងថាមនុស្សថោកទាបនោះចង់បង្ហាញថាគេជាសត្រូវរបស់នាង? ហើយក៏មានន័យថាទាល់តែមនុស្សឆ្អិននឹងលេងហ្វេសប៊ុក នឹងអ៊ីនធឺណិតទើបរត់ទៅបង្កើត account fake ធ្វើជានាងពី១ទៅ១បាន»។
លោកបានបន្តថា៖ «តើមនុស្សមិនស្និទ្ធគ្នាណាដែលសុខៗទៅដឹងលេខទូរស័ព្ទរបស់បូព្រឹក្ស ក្រៅពីមិត្តភក្តិជិតស្និទ្ធ fansអ្នកគាំទ្ររបស់នាងនិងអ្នកសារព័ត៌មាននឹងមនុស្សដែលធ្លាប់ស្រឡាញ់នាង? រឿងមួយនេះវាបានចង្អុលបង្ហាញឲ្យខ្ញុំយល់បានច្រើនថា ជននោះជានរណា»។
លោក ណុប បាយ៉ារិទ្ធ បានបញ្ជាក់ថា៖ «កាលពីសប្តាហ៍មុនក្រោយពីpostរឿងមិនល្អដល់បូព្រឹក្សហើយ បូព្រឹក្សបានសម្ភាសដល់វេបសាយមួយដើម្បើបង្ហាញពីការពិតអំពីរឿងនេះ។
account fake ដ៏ថោកទាបមួយនេះវាក៏បាន block account ខ្លួនឯងចោលប៉ុន្មានថ្ងៃដើម្បីសម្ងំទៅប្តូរ email របស់វាដែលប្រើក្នុង account fake នោះ»។ តារាដែលសម្តែងភាពឈឺឆ្អាលនឹងសិស្សប្អូនរូបនេះ បានថ្លែងបន្ថែមថា៖«វាគិតខ្លីណាស់ព្រោះវាគិតថាគេមិនដឹង។ វាយករឿងផ្ទាល់ខ្លួនរបស់វា មកបំផ្លាញនាងដោយយករូបភាពធ្វើជា fakeaccount របស់នាងហើយប្រើប្រាស់ក្នុងផ្លូវនយោបាយក្នុងបំណងចង់ឲ្យនាងមានបញ្ហា និងចង់បំបាក់ទីផ្សាររបស់ទេព បូព្រឹក្ស»។
លោកក៏បានថ្លែងជាសារយ៉ាងក្តៅៗទៅឲ្យអ្នកដែលមានបំណងមិនល្អចំពោះ ទេព បូព្រឹក្ស ផងដែរ ថា៖ «សូមចាំឲ្យច្បាស់ថាសម័យនេះខួរក្បាលមនុស្សឆ្លាតខ្លាំងជាងអេឡិចត្រូនិកទៅទៀតឲ្យដឹង! ទោះអ្នកប្រឹងលាក់ថាខ្លួនអ្នកជានរណាក៏គេដឹងទោះជានៅដល់អឺរ៉ុបក៏ដោយដឹងនៅ?សូមផ្តាំថាបើមិនបញ្ឈប់ទេគឺអ្នកមិនរួចខ្លួនពីច្បាប់ទេទោះជាអ្នកនៅដល់ក្រហែងមេឃក៏ដោយគិតឬថាគេល្ងង់? គិតឬថាគេរកមុខអ្នកមិនឃើញ? អ្នកចង់បំផ្លាញគេណាស់មែនទេមិនសម្រេចទេ ត្រូវចាំថាកុំគិតថាខ្លួនឯងតែម្នាក់ដែលឆ្លាតធ្វើមិនឲ្យគេដឹង»៕
___________________
ប្រភពព័ត៌មានពី៖ ខ្មែរប៉ុស្តិ៍
ប្រភពព័ត៌មានពី៖ ខ្មែរប៉ុស្តិ៍
