ទូរស័ព្ទ​ទំនើប Sony Xperia Hanami ឬ​ Xperia i1 ​ត្រូវ​បាន​ពាក្យ​ចចាមអារ៉ាម​កាល​ពី​ពេល​មុន​និយាយ​ថា ជា​ទូរស័ព្ទ​ទំនើប​ដែល​នឹង​​​មាន​បំពាក់​​ដោយ​កាមេរ៉ា​ទំហំ​ដល់​ទៅ 20MP ។ ​ដោយ​ឡែក​បន្ទាប់​ពី​បាត់​ព័ត៌មាន​​ពី​ទូរស័ព្ទ​នេះ​អស់​រយៈ​ពេល​​ជិត​ពីរ​ខែ​ ពេល​នេះ​យើង​ទើប​តែ​ទទួល​បាន​នូវ​​រូប​ភាព​ដំបូង​ដែល​ត្រូវ​បាន​គេ​អះអាង​ថា ជា​ Sony Xperia i1 ។

​នៅ​ក្នុង​រូប​ភាព​ខាង​លើ​​ទូរស័ព្ទ​ទី​១​គឺ​ជា​​ Sony Xperia Z Ultra និង​ទូរស័ព្ទ​ទី​២​គឺ​​ Xperia i1 ហើយ​ទូរស័ព្ទ​​ទី​៣​គឺ​ជា Sony Xperia ZL ។ តាម​រយៈ​រូប​ភាព​គេ​​សង្កេត​ឃើញ​ថា ទូរស័ព្ទ​​ទំនើប​ Xperia 1i ហាក់​មាន​​ទំហំ​ធំ​ជាង​ទូរស័ព្ទ Xperia ZL​ ​បន្តិច​។​ យ៉ាង​ណា​មិញ​បើ​​យោង​ទៅ​តាម​ប្រភព​ Gsmarena បាន​ឲ្យ​ដឹង​ថា​ ទូរស័ព្ទ​នេះ​​​មាន​​នូវ​រន្ធ​សម្រាប់ SIM និង microSD card ស្ថិត​នៅ​ចំហៀង​នៃ​ទូរស័ព្ទ​ដូច​ជា​ទូរស័ព្ទ Sony Xperia Z និង Xperia Z Ultra ដែរ ​​តាម​លក្ខណៈ​នេះ​ថ្ម​របស់​ទូរស័ព្ទ​​គឺ​នឹង​មិន​អាច​ធ្វើ​ការ​ដោះ​ដូរ​បាន​ឡើយ ។

សូម​បញ្ជាក់​ថា​ មិន​មាន​ព័ត៌មាន​​​លំអិត​ពី​ទូរស័ព្ទ Sony Xperia Hanami ឬ Xperia i1 នេះ​នៅ​ឡើយ​ទេ ​ហើយ​ចំពោះ​រូប​ភាព​ដែល​គេ​ទទួល​បាន​ក៏​មិន​អាច​ប្រាកដ​ទាំង​ស្រុង​ថា​ជា​រូប​ពិត​នៃ​ទូរស័ព្ទ​នេះ​ដែរ ៕