មាន​សេចក្ដីរាយការណ៍​ថ្មី​មួយ​ថា​ក្រុមហ៊ុន​ Samsung នឹង​ផ្គត់ផ្គង់​អេក្រង់​ Retina សម្រាប់​ផលិត​ iPad mini 2 ឬ iPad mini ជំនាន់​ថ្មី​ និង iPad 5 នេះ​បើ​យោង​តាម​ប្រភព​ពី​គេហទំព័រ ElectronicTimes ។ កាល​ពីចុង​ឆ្នាំ២០១២ កន្លង​ទៅ​​ធ្លាប់​មាន​​ពាក្យចចាមអារ៉ាមថា​ Apple ត្រៀមនឹង​​ផលិត​ iPad mini 2 ដែល​មាន​អេក្រង់ Retina ។ សូម​បញ្ជាក់​ផង​ដែរ​ថា​ Retina Display គឺ​ជា​បច្ចេកវិទ្យា​អេក្រង់​ដ៏​ទំនើប​និង​ចុង​ក្រោយ​របស់​ក្រុមហ៊ុន​ Samsung ដែល​មាន​​ភាព​ម៉ដ្ឋ​​ខ្លាំង​និង​ច្បាស់ល្អ ។ បញ្ជាក់​​ Retina Display ជា​បច្ចេកវិទ្យា​អេក្រង់​ដែល​ក្រុមហ៊ុន Apple ធ្លាប់​បាន​ប្រើ​រួច​មក​ហើយ​នៅ​លើ​ iPad 3 និង iPad 4 ។

ប្រភព​ដដែល​ខាង​លើ​បាន​បន្ថែម​ថា​ក្រុមហ៊ុន Apple នឹង​បញ្ចេញ​ iPad mini 2 ដែល​បំពាក់​ដោយអេក្រង់ Retina ក្នុង​កម្រិតភាព​ច្បាស់ QXGA នៅ​ក្នុង​ត្រីមាសទី៣ នៃ​ឆ្នាំ២០១៣ ។​ តាម​រយៈ​ការ​បន្តប្រើ​នូវ​បច្ចេកវិទ្យាអេក្រង់​របស់​ Samsung នេះ​មាន​ន័យ​ថា​ទំនាក់ទំនង​រវាង​ក្រុមហ៊ុន​ទាំង​ពីរ​​កំពុង​តែ​មាន​ភាព​ប្រសើរឡើង​​​បើ​ទោះ​បី​ជា​ប្រិយមិត្ត​ធ្លាប់​ឮ​ជា​រឿយៗ​នូវ​​សង្គ្រាម​ប៉ាតង់​​រវាង​ក្រុមហ៊ុន​ទាំង​ពីរ ។ ហើយ​ក៏​សូម​បញ្ជាក់​ផង​ដែរ​ថា​ក្រុមហ៊ុន​ផ្សេង​ៗ​ទៀត​​ដែល​ផ្គត់ផ្គង់អេក្រង់​ឲ្យ​ Apple មាន Sharp និង AUO ប៉ុន្តែ​​ក្រុមហ៊ុន​ដែល​​​ផ្គង់ផ្គង់​អេក្រង់​ឲ្យ​ Apple ធំ​ជាង​គេ​នោះ​គឺ LG ។

ទាំង​នេះ​គឺ​គ្រាន់​តែ​ជាការ​សន្និដ្ឋានរបស់​​ប្រភព​ចចាមអារ៉ាម​តែ​ប៉ុណ្ណោះ​ ចំពោះ​ព័ត៌មានពិត​ទាក់ទង​នឹង​លក្ខណសម្បត្តិ​បច្ចេកទេស​របស់​ iPads ទាំង​ពីរ​​ សូម​ប្រិយមិត្ត​រង់ចាំ​ការ​បង្ហាញដោយ​ផ្ទាល់​ពី​ក្រុមហ៊ុន Apple ថា​តើ​ក្រុមហ៊ុន​ Apple នៅ​តែ​បន្ត​ប្រើ​អេក្រង់​ Retina របស់​ក្រុមហ៊ុន​ Samsung នៅ​លើ​ខ្សែស្រឡាយ iPad​ ឬ​ក៏​​បញ្ឈប់ ៕