“GEMS ON THE RUN” រឿងខ្មែរបាញ់ប្រហារ កណ្តាលទីក្រុង ថតបាន ៧០% ហើយ!
ខ្សែភាពយន្តខ្មែរវណ្ណកម្មដំបូងរបស់ផលិតកម្ម ៣៩១ ដែលចម្រុះដោយអ្នកជំនាញខ្មែរ និងបរទេស សម្រេចបាន ៧០% ភាគរយហើយ បន្ទាប់ពីបានចាប់ផ្តើមដំណើរការថតប្រមាណជាង១ខែកន្លងមក។ នេះបើតាមការអះអាងរបស់លោក តេត ណាន អ្នកគ្រប់គ្រងការផលិតនៃខ្សែរឿងនេះ។
រូបទី១
លោក តេត ណាន បានប្រាប់បន្តជាមួយការអះអាងថា “Gems on the Run” នឹងក្លាយជាខ្សែរឿងដំបូងរបស់កម្ពុជាដែលមានឈុតឆាកបាញ់ប្រហារគ្នាយ៉ាងកក្រើក ក្នុងករណីឧក្រិដ្ឋជនប្លន់ឡានដឹកលុយ និងគ្រាប់ពេជ្រ នៅកណ្តាលរាជធានីភ្នំពេញ រួមទាំងការឆ្លុះបញ្ចាំងពីជនសង្គមងងឹតផង។ លោក ថ្លែងថា “ពេលដល់ត្រូវថតឈុតនេះ នឹងមានការបិទផ្លូវណាដែល ត្រូវថតតាមពេលវេលាខ្លះៗ ហើយត្រូវចំណាយច្រើន”។ ទាំងនេះ គឺជាទិដ្ឋភាពប្លែកមួយ ស្របពេលដែលខ្សែរឿងក្នុងស្រុកជាច្រើន ច្រើននិយាយពីស្នេហាយុវវ័យជាធំនោះ។
ទោះយ៉ាងនេះក្តី “Gems on the Run” ក៏មិនចេញឆ្ងាយពីយុវវ័យដែរ។ អតីតអ្នកគ្រប់គ្រងការផលិតរបស់កម្មវិធី “ឡូយ៩” លោក តេត ណាន ថ្លែងថា រឿងនេះ និយាយភក្តីភាព មិត្តភាពជាអមតៈ ដែលសូម្បីតែទ្រព្យសម្បត្តិមានតម្លៃរាប់លានដុល្លារ ក៏មិនស្មើ។
រូបទី២ (រូបទី១ និងទី២ លោក Cheky សម្តែងជាតួ រិទ្ធ ពេលកំពុងសម្តែង)
អ្នកនាង សោម ម៉ាល័ក្ខ តួឯកស្រីក្នុងរឿងនេះ បានប្រាប់ថា មានទិដ្ឋភាពថ្មីៗជាច្រើន ដែលអ្នកនាងទើបបានជួបក្នុងជីវិតជាតារាសម្ដែង ក្នុងនោះមានទាំងបាញ់ប្រហារ វាយតប់ជាដើម ឯការថតទៀតសោត បានចុះទៅថតដល់ព្រៃជ្រៅ ជ្រោះជ្រងជ្រលងដងអូរ និងរូងភ្នំជាច្រើនផង។ អ្នកនាង ថ្លែងថា “ខ្ញុំមានជំនឿចិត្តថា រឿងនេះនឹងជោគជ័យ ហើយខ្ញុំមានអារម្មណ៍កក់ក្តៅមែនទែន!”។
លោក តេត ណាន បានសង្ខេបពីសាច់រឿង “Gems on the Run” ថា នៅក្នុងសាច់រឿងមាន តួអង្គសំខាន់ៗបីនាក់ គឺលីយ៉ា សម្ដែងដោយអ្នកនាង សោម ម៉ាល័ក្ខ លោក រិទ្ធ សម្ដែងដោយ លោក Cheky និងសុវណ្ណ សម្ដែងដោយ លោក វ៉ាន់ឌី ពិសិដ្ឋ អ្នកសម្ដែងទទួលការចាប់អារម្មណ៍នៅក្នុងខ្សែរឿងរបស់កម្មវិធី “ឡូយ៩”។
លោក បន្តថា លីយ៉ា គឺជាគូដណ្តឹងរបស់ជនសង្គមងងឹត ប៉ុន្តែ លីយ៉ា អត់ស្រឡាញ់គូដណ្តឹងនោះទេ។ ឯ រិទ្ធ គឺមន្ត្រីប៉ូលីស សុវណ្ណ ជានិស្សិតមកសហរដ្ឋអាមេរិក និងតួអង្គម្នាក់ទៀត ឈ្មោះ តារា ជាអ្នកជំនួញនៅខេត្ត ពួកគេទាំងបី ជាមិត្តជិតស្និទ្ធនឹងគ្នា។ តែក្រោយមក តារា បានស្លាប់ ហើយដើម្បីបានទៅចូលរួមបុណ្យសពមិត្តភ័ក្ដិ សុវណ្ណ ដែលមានជាប់ពាក់ព័ន្ធនឹងសង្គមងងឹត ព្រោះតែរឿងគ្រាប់ពេជ្រមួយថង់ រួមជាមួយ រិទ្ធ បានរំដោះខ្លួនយ៉ាងលំបាកទើបបានទៅដល់កន្លែងបុណ្យសពរបស់មិត្ត។
មិនអស់នៅឡើយ ព្រោះតែចំណងមិត្តភាពដដែល សុវណ្ណ បានលះបង់លាភសំណាងដ៏ធំម្តងទៀត ដើម្បីទៅជួយ រិទ្ធ ដែលត្រូវដែលជនសង្គមងងឹតមួយក្រុមទៀត ចាប់ជាជនចំណាប់។
តួសម្តែងមួយចំនួនក្នុងសាច់រឿង
ការប្រថុយខ្លួនទៅជួយមិត្តភ័ក្ដិលើកនេះ សុវណ្ណ ត្រូវគេបាញ់ឲ្យស្លាប់ តែតាមពិតរូបគេអត់ស្លាប់ទេ ព្រោះបានពាក់អាវក្រោះ ប៉ុន្តែបានធ្វើឲ្យ លីយ៉ា និង រិទ្ធ យល់ថាច្រឡំថាស្លាប់ពិតមែន។ ចុងក្រោយ លីយ៉ា ដែលបានដាក់ចិត្តស្រឡាញ់គ្នាជាមួយ សុវណ្ណ បានបាក់ទឹកចិត្ត ព្រោះព្រាត់គូស្នេហ៍ ប៉ុន្តែពេល លីយ៉ា កំពុងបង្ហើរអារម្មណ៍កណ្ដោចកណ្ដែងនៅឆ្នេរសមុទ្រ សុវណ្ណ ក៏បានបង្ហាញខ្លួនគួរឲ្យភ្ញាក់ផ្អើល ហើយចុងក្រោយ ពួកគេបានរួមរស់ជាមួយគ្នាក្នុងជីវភាពសាមញ្ញមួយ។
រឿង “Gems on the Run” នឹងបញ្ចប់ការថតនៅថ្ងៃទី ០៤ ខែកក្កដា ខាងមុខ។ ហើយបន្ទាប់ពីចំណាយពេលកាត់ត និងសម្រួលបច្ចេកទេសមួយចំនួន រឿងនេះ គ្រោងដាក់ឲ្យប្រិយមិត្តទស្សនានៅរង្វង់ខែតុលា ឆ្នាំ២០១៣ នេះ។
លោក តេត ណាន បញ្ជាក់ថា បច្ចុប្បន្ន “Gems on the Run” មានចំណងជើងបណ្ដោះអាសន្នមួយជាភាសាខ្មែរថា“គ្រាប់ពេជ្រនៃស្នេហ៍”។ ប៉ុន្តែក្រុមការងារ កំពុងពិភាក្សាគ្នារកចំណងជើងថ្មីមួយ ដែលទាក់ទាញ និងស៊ីជម្រៅជាងនេះ៕
ប្រភព : សប្បាយ
