លោក ជុំ ម៉ី ឡើងមកបំភ្លឺនៅសាលាដំបូងនៅព្រឹកថ្ងៃចន្ទនេះ
លោក ជុំ ម៉ី ឡើងមកបំភ្លឺនៅសាលាដំបូងរាជធានីនៅព្រឹកថ្ងៃចន្ទនេះ។ រូបថត ម៉ៃ វីរៈ
ភ្នំពេញៈ អតីតអ្នកទោសរស់រានមានជីវិតពីគុកទួល ស្លែង លោក ជុំ ម៉ី ឡើងមកបំភ្លឺនៅសាលាដំបូងរាជធានីនៅព្រឹកថ្ងៃចន្ទនេះ ទាក់ទងនឹងបណ្តឹងរបស់លោក ប្តឹងលោក កឹម សុខា ប្រធានស្តីទីគណបក្សសង្គ្រោះជាតិពីបទបរិហាកេរ្តិ៍ ខណៈពេលដែលលោក កឹម សុខា ត្រូវបានសាលាដំបូងរាជធានីកោះហៅ ឲ្យចូលបំភ្លឺនៅថ្ងៃទី២៧ ខែមិថុនានេះ ដែលជាថ្ងៃទី១ នៃយុទ្ធនាការឃោសនាបោះឆ្នោត។
បណ្តឹងរបស់អតីតជនរងគ្រោះនៅគុកទួលស្លែងក្នុងរបបខ្មែរក្រហមនេះ បានដាក់ប្រឆាំងទៅលើលោក កឹម សុខា ប្រធានស្តីទីនៃគណបក្សសង្គ្រោះជាតិ ពាក់ព័ន្ធនឹងសេចក្តីអត្ថាធិប្បាយដែលគាត់បានធ្វើឡើងកាលពីចុងខែ ឧសភាដែលបានអះអាងថា មន្ទីរឃុំឃាំងសម្លាប់មនុស្សនៅទួលស្លែង ជាគុកសិប្បនិមិ្មតដែលរៀបចំឡើងដោយប្រទេសវៀតណាម។
លោក គួយ ធុនណា មេធាវីរបស់ក្រុមអ្នករស់រានមានជីវិតបួននាក់ពីមន្ទីរប្រល័យពូជ សាសន៍ទួលស្លែង ស‑២១ ដែលរួមបញ្ចូលទាំងប្រធានសមាគមជនរងគ្រោះនៃរបបខ្មែរក្រហម លោក ជុំ ម៉ី បានថ្លែងថា ព្រះរាជអាជ្ញា លោក មាស ចាន់ពិសិដ្ឋ បានកោះហៅកូនក្តីទាំងបួននាក់របស់ខ្ញុំចូលការពារបណ្តឹងរបស់ ខ្លួននៅថ្ងៃទី២៤ ខែមិថុនានេះ។ ចំណែកពីរនាក់ទៀតត្រូវចូលឆ្លើយបំភ្លឺនៅពេលរសៀលថ្ងៃដដែល។
លោកបានថ្លែងបន្តថា៖ «វាជានីតិវិធីរបស់តុលាការដែលដើមបណ្តឹងត្រូវតែនាំយកព័ត៌មាន និងភ័ស្តុតាងបន្ថែមទៅបញ្ជាក់ប្រាប់តុលាការដើម្បីជាការការពារទៅ លើពាក្យបណ្តឹងរបស់ខ្លួន»។
