ចរិតអ្នកនយោបាយខ្មែរដែលចូលចិត្ដរមិលគុណ
មានអ្នកនយោបាយប្រឆាំង និងអ្នកកាសែតប្រឆាំង ព្រមទាំងសង្គមស៊ីវិលប្រឆាំងមិនតិចនាក់ទេ ដែលបានចាកចេញពីទ្រនំធ្លាប់ប្រឆាំងនឹងគណបក្សប្រជាជនកម្ពុជា ឬប្រឆាំងនឹងថ្ងៃ៧ មករា ទៅចុះចូលបម្រើម្ចាស់ថ្មីក្នុងគណបក្សប្រជាជនកម្ពុជា ជាគណបក្សនយោបាយកាន់អំណាច សម្បូណ៌លុយកាក់ដែលខ្លួនធ្លាប់ជេរកប់ៗមាត់វិញ ។
តាមរយៈលោក សយ សុភាព បណ្ណាធិការសារព័ត៌មានដើមអម្ពិល ដែលធ្លាប់សរសេរកាសែតជេរគណបក្សប្រជាជនកម្ពុជារាប់ឆ្នាំមកហើយនោះ លោក ម៉ា យ៉ារិទ្ធ អតីតជាបុគ្គលិកវិទ្យុVOA និងក្រោយមកជាបុគ្គលិកវិទ្យុអាស៊ីសេរី (RFA)ជាវិទ្យុមិនកាន់ជើងឬរណបនឹងគណបក្សប្រជាជនកម្ពុជា បានសម្រេចចុះចូលគណបក្សប្រជាជនកម្ពុជានាអំឡុងឆ្នាំ២០០៩ ដើម្បីទទួលបានលាភសក្ការៈដុំកំភួនមួយចំនួន ។ រីឯលោក ទិត សុធា អតីតបម្រើការជាបុគ្គលិកវិទ្យុVOA ដែរនោះ ក៏បានសម្រេចចុះចូលគណបក្សប្រជាជនកម្ពុជា ដោយទទួលបានងារជាឯកឧត្ដមក្នុងនាមជាទីប្រឹក្សារាជរដ្ឋាភិបាល មានឋានៈស្មើរដ្ឋលេខាធិការ ។
កំពូលជើងខ្លាំងខាងជេរប្រទេចឬប្រឆាំងនឹងថ្ងៃ៧មករា ដោយធ្លាប់ចាត់ទុកថ្ងៃ៧មករាដែលគណបក្សប្រជាជនកម្ពុជាឱ្យតម្លៃថា ជាថ្ងៃកំណើតទី២នោះថាជាថ្ងៃនាំយួនឱ្យចូលមកឈ្លានពានស្រុកខ្មែរ គឺលោក ស៊ុត ឌីណា ហៅ ម៉ៅ មឿងយ៉ាត និងលោកស្រី ស៊ុន សុគន្ធមាលា (ប្ដី-ប្រពន្ធ)ក៏បានចុះចូលជាមួយគណបក្សប្រជាជនកម្ពុជា ដើម្បីទទួលបានបុណ្យស័ក្ដិ លាភសក្ការៈមួយចំនួន ហើយក៏ស្ងាត់មាត់ដូចគេចុកទល់សព្វថ្ងៃ (លោក ស៊ុត ឌីណា ត្រូវបានតែងតាំងជាអនុរដ្ឋលេខាធិការក្រសួងការបរទេសនិងសហប្រតិបត្ដិការអន្ដរជាតិ និងជាទីប្រឹក្សាផ្ទាល់សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ដ្រីនៃព្រះរាជាណាចក្រកម្ពុជា មានឋានៈស្មើរដ្ឋលេខាធិការ មានងារជាឯកឧត្ដម និងលោកស្រី ស៊ុន សុគន្ធមាលា ត្រូវបានតែងតាំងជា សមាជិកាក្រុមប្រឹក្សាសេដ្ឋកិច្ច សង្គមកិច្ច និងវប្បធម៌នៃទីស្ដីការគណៈរដ្ឋមន្ដ្រី មានឋានៈស្មើរដ្ឋ លេខាធិការ មានងារជាលោកជំទាវ) ។
អ្នកគ្រូ ហេង យូ អតីតអនុប្រធានសមាគមគ្រូបង្រៀនកម្ពុជាឯករាជ្យ ដែលមានលោកគ្រូ រ៉ុង ឈុនជាប្រធាន ក៏បានចុះចូលគណបក្សប្រជាជនកម្ពុជា ដើម្បីទទួលបានតំណែងជាសមាជិកា ក្រុមប្រឹក្សាសេដ្ឋកិច្ច សង្គមកិច្ច និងវប្បធម៌នៃទីស្ដីការគណៈរដ្ឋមន្ដ្រី មានឋានៈស្មើអនុរដ្ឋលេខា ធិការមានងារជាលោកជំទាវទល់សព្វថ្ងៃ ។
ឯកឧត្ដម កែវ រ៉េមី ជាអ្នកនយោបាយធ្លាប់បម្រើគណបក្សហ្វ៊ុនស៊ិនប៉ិច គណបក្សសម រង្ស៊ី និងគណបក្សសិទ្ធិមនុស្ស តែក្រោយមកក៏បានចុះចូលគណបក្សប្រជាជនកម្ពុជាវិញ ដោយទទួលបានមុខតំណែងជាសមាជិកក្រុមប្រឹក្សាជាតិប្រឆាំងអំពើពុករលួយជ្រើសចេញពីគណៈកម្មាធិការសិទ្ធិមនុស្ស កម្ពុជា មានឋានៈស្មើរដ្ឋមន្ដ្រី ។
មិនខុសពីឯកឧត្ដម កែវ រ៉េមី ទេ លោក កឹម សុខុន ត្រូវជាប្អូនបង្កើតរបស់ឯកឧត្ដម កឹម សុខា ប្រធានស្ដីទីគណបក្សសង្គ្រោះជាតិ ធ្លាប់បម្រើជីវភាពនយោបាយក្នុងគណបក្សហ្វ៊ុនស៊ិនប៉ិច គណបក្ស សម រង្ស៊ី និងគណបក្សសិទ្ធិមនុស្ស លុះក្រោយមកក៏បានចុះចូលគណបក្សប្រជាជនកម្ពុជា ដោយទទួលបានតួនាទីជាទីប្រឹក្សារាជរដ្ឋាភិបាលកម្ពុជា មានឋានៈស្មើរដ្ឋលេខាធិការ ។
នៅមានអ្នកនយោបាយជាច្រើនទៀតដែលធ្លាប់បម្រើការងារក្នុងគណបក្សប្រឆាំង ជេរគណបក្ស ប្រជាជនកម្ពុជា ហើយបានចុះចូលគណបក្សប្រជាជនកម្ពុជា ដែលខ្លួនធ្លាប់ជេរ និងប្រមាថដោយទទួលបាននូវបុណ្យស័ក្ដិដ៏ខ្ពង់ខ្ពស់ ។ ក្នុងចំណោមអ្នកនយោបាយក្ដី អ្នកកាសែតក្ដី សង្គមស៊ីវិលក្ដី ដែលធ្លាប់ប្រឆាំង ហើយចុះចូលគណ បក្សប្រជាជនកម្ពុជាដើម្បីទទួលបុណ្យស័ក្ដិលាភសក្ការៈជាថ្នូរនឹងការឈប់ប្រឆាំងនោះ គឺមានពីរ ប្រភេទ ៖ ១-ចូលគណបក្សប្រជាជនកម្ពុជាហើយស្ងប់ស្ងាត់ឥតងាកត្រឡប់ទៅជេរប្រទេចគណបក្សនយោបាយប្រឆាំងពីអតីតកាលរបស់ខ្លួនឱ្យកក្រើកមេឃកក្រើកដីទេ ដូចជាឯកឧត្ដម ង៉ោ សុវណ្ណ, ឯកឧត្ដម លន់ ភន់…។ល។ ២- ចូលគណបក្សប្រជាជនកម្ពុជា ហើយឈរបង់ជំទែងស្រែកជេរ ប្រទេចនិងហែកហួរមកលើបង ខ្លួនឯងបង្កើតផង និងគណបក្សប្រឆាំងវិញផងដោយឥតសំចៃ ជាអាទិ៍ ឯកឧត្ដម កឹម សុខុន ប្អូន បង្កើតឯកឧត្ដម កឹម សុខា ។
មជ្ឈដ្ឋានអ្នកវិភាគនយោបាយឯករាជ្យនៅកម្ពុជា បានលើកឡើង គ្មាននរណាម្នាក់នៅសុខៗរត់ចូលគណបក្សប្រជាជនកម្ពុជា ដោយទទួលបានបុណ្យស័ក្ដិឬលាភសក្ការៈភ្លាមៗក្ដៅៗទាំងដុំនោះទេ គឺមានតែក្រុមអ្នកនយោបាយ ឬក្រុមអ្នកកាសែតប្រឆាំងដែលចុះចូលគណបក្សប្រជាជនកម្ពុជា ទើបទទួលបាននូវភ័ព្វសំណាងបែបនេះជាថ្នូរនឹងការឈប់ប្រឆាំង ។ ដូច្នេះ តម្លៃខ្លួនរបស់អ្នកទាំងនោះមានទៅកើតទៅ គឺដោយសារការប្រឆាំង ឬជេរប្រទេចគណបក្សប្រជាជនកម្ពុជា ជាពិសេស“សម្ដេចតេជាសែន”នាពេលកន្លងមក ហើយត្រូវអរគុណដល់គណបក្សប្រឆាំង ឬវិទ្យុប្រឆាំង ឬសមាគមប្រឆាំងទើបស័ក្ដិសមជាមនុស្សមិនភ្លេចគុណ ។
សរុបសេចក្ដីមក អំពើរបស់ឯកឧត្ដម កឹម សុខុន ដែលបានធ្វើទៅលើគណបក្សប្រឆាំង និងទៅលើបងប្រុសបង្កើតបស់ខ្លួនឯង (ឯកឧត្ដម កឹម សុខា)នាពេលថ្មីៗនេះ និងអាចនៅពេលបន្ដទៀត គឺបានបង្ហាញអំពីចរិតអ្នកនយោបាយខ្មែរមួយរូបដែលូលចិត្ដរមិលគុណ។
ពាក្យកាព្យរបស់សម្ដេចព្រះសង្ឃរាជ ជួន ណាត បានរំលឹកថា “មនុស្សរមិលគុណស៊ុនខាងល្មើស ចិត្ដទ្រើសទ្រនង់ភ្លេចគ្រាក្រ កាលគេផ្គត់ផ្គង់ឱ្យខ្លួនល្អ ឥតនឹកតបតសងគុណគេ ។ លុះដល់យូរមកនឹកស្ដាយក្រោយ នឹកឃើញក្ដីធ្លោយព្រោះធ្វេសទ្វេ មិនហ៊ានហើបមាត់មួយម៉ាត់ទេ ចេះតែគេចខ្លួនពួនបំបាំង ។ ” ៕
ប្រភពពី ដើមត្នោត
