ក្បាលមិនពាក់ ម៉េចយកទៅពាក់នឹងគូទទៅវិញ?
ពេលបើកបរម៉ូតូ ច្បាប់ចែងមកឲ្យពាក់មួកសុវត្ថិភាព និងដាក់កញ្ចក់ឲ្យបានត្រឹមត្រូវ។ ម្យ៉ាងវិញទៀតមួកសុវត្ថិភាព គេផលិតមកឲ្យពាក់ដើម្បីការពារក្បាល តែសង្កេតឃើញអ្នកខ្លះមិនយកមួកទៅពាក់លើក្បាលទេ បែរជាយកទៅពាក់ឲ្យគូទម៉ូតូ ឬដៃម៉ូតូទៅវិញ។ ហេតុអ្វីបានជាធ្វើដូច្នេះ?
អុន រ៉ាឌី បុគ្គលិកធ្វើការនៅក្រុមហ៊ុន Smart បាននិយាយថា រូបលោកធ្លាប់ឃើញគេយកមួកទៅពាក់នៅគូទម៉ូតូបែបនេះច្រើនណាស់ ហើយមានទាំងស្រីទាំងប្រុស។
“ភាគច្រើនគឺអ្នកជិះម៉ូតូ Scoopy ឬម៉ូតូលេខអូតូ។ ទង្វើបែបនេះមិនសមទេ ព្រោះអីខាតទាំងប្រយោជន៍ខ្លូនឯង និងអ្នកដទៃទៀតផង ជាពិសេសអាចប៉ះពាល់ដល់អាយុជីវិត។ យ៉ាងទៀត ពេលគេជិះទៅឃើញប៉ូលីស គេជិះបកក្រោយឆ្វាត់ឆ្វែងប៉ះពារដល់អ្នកដទៃ។ ខ្ញុំសុំឲ្យពួកគេបញ្ឈប់ទង្វើនេះទៅ ព្រោះសង្គមមិនទទួលស្គាល់ ហើយធ្វើឲ្យសង្គមធា្លក់ចុះទៀតផង”។ រ៉ាឌី បន្ថែម។
ចំណែកឯ ចាន់ គន្ធា ធ្វើការនៅក្រុមហ៊ុនឯកជនមួយបានលើកឡើងថា៖ “ប្រហែលជាគេចង់បង្ហាញថា ពួកគេឡូយសង្សារ ឬគេគិតថាមិនជួបគ្រោះថា្នក់អីទេ ដោយគ្រាន់តែទៅត្រឹមត្រង់នេះហ្នឹង! ក៏ប៉ុន្តែនេះមិនមែនជាទម្លាប់ល្អទេ ព្រោះមិនគោរពស្រលាញ់អាយុជីវិតខ្លួនឯង និងអ្នកដទៃ និងមិនគោរពច្បាប់ចរាចរណ៍។ មួយវិញទៀត សុំកុំមើលងាយគ្រោះថា្នក់ចរាចរណ៍ឲ្យសោះ”។
រីឯយុវជន ផុន ពិសិដ្ឋ វិញក៏មានគំនិតទុទ្ទិដ្ឋិនិយមចំពោះរឿងនេះផងដែរ។ “ខ្ញុំឃើញភាគច្រើនអ្នកធ្វើបែបនេះគឺចន្លោះអាយុ១៧ទៅ២០ឆ្នាំជាង ហើយជិះម៉ូតូ Honda និង Scoopy។ ជាពិសេសនៅម្តុំស្តុបទួលទំពូង និងជិះលឿនៗទៀតផង។ បើមិនខ្លាចប៉ូលីលផាកទេ ក៏គួរតែគិតពីអាយុខ្លួនឯងផង វាថ្លៃជាងថ្លៃការផាកនោះទៅទៀត”។
ដោយឡែក កញ្ញា ស៊ីវម៉ី សិស្សវិទ្យាល័យស៊ីសុវត្ថិបាននិយាយថា៖ “ដាក់មួកនៅដៃម៉ូតូ ឬគូទម៉ូតូវាអាចនឹងទាក់ ឬប៉ះនឹងអ្នកដទៃ។ មួយវិញទៀត វាអាចនឹងធ្វើឲ្យយើងបាត់បង់អាយុជីវិត ហេតុដូច្នេះវាបង្កើនឲ្យមានគ្រោះថា្នក់ចរាចរណ៍កាន់តែច្រើនឡើង។ ខ្ញុំសុំឲ្យអ្នកទាំងអស់គ្នាពាក់មួកសុវត្ថិភាពឲ្យបានគ្រប់ៗគ្នា”។
ចុះអ្នកវិញមានយោបល់យ៉ាងណាដែរចំពោះរឿងនេះ?
