មីនីស្តុកភើសាកកំលាំងជាមួយរថយន្តក្រុងកៀបជាប់សំណាងល្អមិនមានអ្នករងរបួស
ភ្នំពេញ ៖ រថយន្តមីនីស្តុកភើមួយគ្រឿងបើកក្នុងល្បឿនលឿនរួចជ្រុលទៅបុកចំកង់ក្រោយរថយន្តដឹកភ្ញៀវទេសចរណ៍មួយគ្រឿងយ៉ាងពេញទំហឹងបណ្ដាលឲ្យរថយន្តមីនីស្តុកភើកៀបជាប់ទៅមុខមិនរួច សំណាងល្អមិនមានអ្នកណារងរបួស។
គ្រោះថ្នាក់នេះបានកើតឡើងកាលពីវេលាម៉ោង១៩និង៤០នាទីយប់ថ្ងៃទី២៣ ខែមិថុនា ឆ្នាំ២០១៣ នៅចំណុចជិតស្ពានហង្សកោះពេជ្រ តាមបណ្តោយផ្លូវសបិត ក្នុងសង្កាត់ទន្លេបាសាក់ ខណ្ឌចំការមន ។
យោងតាមប្រភពព័ត៌មានពីសមត្ថកិច្ចដែលចុះទៅពិនិត្យនិងវាស់វែងដល់ចំណុចកើតហេតុបានឲ្យដឹងថា មុនពេលកើតហេតុរថយន្តមីនីស្តុកភើមួយគ្រឿងពណ៌ឈាមជ្រូកគ្មានស្លាកលេខបានបើកបរ តាមបណ្តោយផ្លូវសបិតក្នុងទិសដៅពីជើងទៅត្បូងក្នុងល្បឿនយ៉ាងលឿនដូចហោះ មកដល់ចំណុច កែងផ្លូវស្ពានហង្សកោះពេជ្របានជ្រុលល្បឿនទៅបុកចំកង់ក្រោយរថយន្តដឹកភ្ញៀវទេសចរណ៍មួយគ្រឿងដែលមានទិសដៅបញ្ច្រាសទិសគ្នាយ៉ាងពេញទំហឹងបណ្ដាលឲ្យរថយន្តមីនីស្តុកភើកៀបជាប់ទៅមុខមិនរួច។
ប្រភពដដែលបានបន្តថា គ្រោះថ្នាក់នេះបណ្ដាលឲ្យរថយន្តទាំងពីរគ្រឿងកៀបជាប់គ្នា និងរងការខូចខាតប៉ុន្តែមិនបណ្ដាលឲ្យមនុស្សណាម្នាក់រងរបួសនោះទេ។
បន្ទាប់ពីកើតហេតុមន្ត្រីនគរបាលចរាចរណ៍ខណ្ឌចំការមនចុះមកអន្តរាគមន៍ឲ្យភាគីទាំងពីធ្វើការ សម្របសម្រួលចរចាគ្នាប៉ុន្តែសុទ្ធតែអ្នកខ្លាំង ភាគីទាំងពីរសុំឲ្យសមត្ថកិច្ចធ្វើការវែងវាស់រកខុសត្រូវ៕
Resource by : kpt-news.com
