គុយបា៖ សេវាកម្មហាងអាំងធើណែត បើកទ្វាដំបូងទទួលអតិថិជន
ហាងអាំងធើណែតជាច្រើន បានបើកទ្វាជាបន្តបន្ទាប់ នៅក្នុងប្រទេសគុយបា ដើម្បីអនុញ្ញាតឲ្យប្រជាជនគុយបា អាចធ្វើការពីគ្រោះព័ត៌មានបាន តាមរយៈបច្ចេកវិជ្ជាថ្មីស្រឡាងមួយនេះ នៅក្នុងរបបកុម្មុយនីស ដែលមានវ័យចំណាស់ជាងគេក្នុងលោក។
ថ្ងៃដំបូង នៃការបើកឲ្យប្រើប្រាស់ នូវសេវាកម្មអាំងធើណែត នៅតាមហាងសាធារណៈ ក្នុងប្រទេសគុយបា។
ហាងអាំងធើណែតប្រមាណជា១០០កន្លែង បានបើកទ្វាទទួលអតិថិជនរបស់ខ្លួន នៅក្នុងក្របខ័ណ្ឌនៃការបើកទូលាយ ក្នុងវិស័យបច្ចេកវិទ្យា របស់រដ្ឋាភិបាលកុម្មុយនីសនៃប្រទេសគុយបា។ ប៉ុន្តែតម្លៃនៃការភ្ជាប់ក្នុងមួយម៉ោង នៅថ្លៃស្មើនឹងមួយភាគប្រាំ នៃប្រាក់ខែទាបបំផុតរបស់ពលរដ្ឋគុយបាម្នាក់ៗ ដែលវានឹងនៅតែធ្វើឲ្យសេវាកម្មនេះ ស្ថិតនៅឆ្ងាយពីអ្នកដែលចង់សិក្សាស្រាវជ្រាវ ឬចង់ពិគ្រោះព័ត៌មានអ្វីមួយនោះនៅឡើយ។
សិល្បករមួយរូបរស់នៅក្នុងទីក្រុងឡាហាវ៉ាន (LaHavane) អាយុ៣៨ឆ្នាំ បាននិយាយថា «ជាលទ្ធភាពដ៏ធំមួយ។ វានៅតិចតួចណាស់ ក្នុងពេលនេះ តែយ៉ាងហោចណាស់ វាគ្រាន់បើជាងអត់។»
ទោះបីជាមានភ្លៀងធ្លាក់ខ្លាំងបែបណាក៏ដោយ នៅថ្ងៃអង្គារទី០៤ខែមិថុនា (ថ្ងៃដែលសេវាកម្មតាមហាងនេះ ត្រូវបានបើកអោយមានប្រើប្រាស់ដំបូង ជាសាធារណៈ) មនុស្សម្នាបានទៅឈរតម្រៀបជួរគ្នា ដើម្បីបានភ្លក្សពី«ការភ្ជាប់អាំងធើណែត»នៅតាមហាងដ៏ថ្មីស្រឡាង ផ្ដល់ដោយក្រុមហ៊ុនជាតិទូរគមនាគមន៍នៃប្រទេសគុយបា។ អ្នកខ្លះបានបើកជាបន្ទាន់នូវប្រអប់ទូរសារផ្ទាល់ខ្លួនមួយ ដើម្បីអាចបញ្ជូន ឬទទួលសារ ដែលពួកគេគិតថាចាំបាច់ ក្នុងការទាក់ទងគ្នា និងខ្លះទៀតបានទាញយកកម្មវិធីជាច្រើន ដូចជាពីគេហទំព័រយ៉ាហូ (Yahoo) ជាដើម ដើម្បីដាក់បញ្ជូលក្នុងម៉ាស៊ីនកំព្យូទ័រ ទុកជាការប្រើប្រាស់ជាប្រចាំ។
វេជ្ជបណ្ឌិតមួយរូប អាយុ៣៣ឆ្នាំ ដែលទើបនឹងពិគ្រោះគេហទំព័រមួយនោះ ក៏បាននិយាយឡើងដែរថា «សម្រាប់យើង ជាសេវាកម្មមួយ ដែលអនុញ្ញាតឲ្យប្រើអាំងធើណែត និងដឹងពីព័ត៌មានជាច្រើន ដែលពិមុនមក យើងមិនដែលបានដឹងទាល់តែសោះ»។
តាមស្ថិតិចុងក្រោយគេបង្អស់របស់រដ្ឋាភិបាល នៅក្នុងប្រទេសដែលបិតជើងមេឃជិតឈឹងនេះ ប្រជាជនតែ២,៩%ប៉ុណ្ណោះ ដែលអាចទទួលសេវាកម្មភ្ជាប់ទៅអាំងធើណែត។ តែអ្នកវិភាគបានរំពឹងថា បើនិយាយពីការចង់ចេះចង់ដឹងរបស់ពលរដ្ឋ តួលេខស្ថិតិអាចមានចំនួនពី៥ទៅ១០% បៀបធៀបទៅនឹងតួលេខមួយចំនួនធំ ដែលទូរស័ព្ទដែលភ្ជាប់ទៅអាំងធើណែតបាន ត្រូវគេលួចលក់នៅលើទីផ្សារងងឹត។
ប៉ុន្តែតម្លៃភ្ជាប់សេវាកម្ម ៤,៥ដុល្លាអាមេរិក ក្នុងមួយម៉ោង ជាតម្លៃដ៏ខ្ពស់មួយ សម្រាប់ជនជាតិគុយបា ដែលរកបានតែ២០ដុល្លាក្នុងមួយខែ។ ក្នុងឆ្នាំ២០០៨ នៅពេលដែលមានការអនុញ្ញាតិ ឲ្យប្រើប្រាស់ទូរស័ព្ទដៃដែលភ្ជាប់ទៅអាំងធើណែតបាន ជាលើកដំបូង គេត្រូវចំណាយរហូតដល់ទៅ១០០ដុល្លា ដើម្បីបើកគណនីអាំងធើណែតមួយបាន។ តែនៅថ្ងៃនេះ គេចំណាយតែ១៥ដុល្លាប៉ុណ្ណោះ ហើយបើតាមស្ថិតិឆ្នាំ២០១១ បានឲ្យដឹងថា ប្រជាជនគុយបាចំនួនជាងមួយលាននាក់ មានទូរស័ព្ទដៃប្រើ។
ការភ្ជាប់ទៅបណ្ដាញអាំងធើណែត នៅជាចំណោទខាងនយោបាយមួយ យ៉ាងខ្លាំងនៅឡើយ ក្នុងប្រទេសកុម្មុយនីសមួយនេះ។ ក្រុមអ្នកប្រឆាំង បានចោទរដ្ឋាភិបាលលោក រ៉ូល កាស្ត្រូ (Raul Castro) ថាបានមានបំណងដាក់កំហិតការភ្ជាប់ទៅអាំងធើណែត ដើម្បីងាយស្រួល ក្នុងការឃ្លាំមើលប្រជាជន។ តែខាងរដ្ឋាភិបាល បានអះអាងថា ជាបញ្ហាបច្ចេកទេសទាំងស្រុង ព្រោះហេត្ថារចនាសម្ព័ន្ធ នៅមិនទាន់មានបំពាក់គ្រប់គ្រាន់នៅឡើង សម្រាប់ដាក់ឲ្យដំណើរការ នូវសេវាកម្មដ៏ថ្មីស្រឡាងនេះ៕
