មើលម៉េចទើបដឹងថាមនុស្សចិត្តងាយ?
មនុស្សមានចរិតខុសគ្នា ខ្លះចូលចិត្តស្ងៀមស្ងាត់ ខ្លះចូលចិត្តរាប់អានមិត្តភ័ក្ដិ ប៉ុន្តែមនុស្សខ្លះ ងាករេច្រើន បានរាប់អានមនុស្សម្នាក់ថ្មី បោះបង់អ្នកចាស់ភ្លាម ហើយបើចំពោះស្នេហាទៀត មនុស្សប្រភេទនេះ គឺឆាប់ផ្លាស់ប្ដូរដៃគូច្រើន ដែលចាស់ច្រើននិយាយថា ជាមនុស្សចិត្តងាយ។ តើយុវវ័យសម្គាល់យ៉ាងណាខ្លះទើបដឹងថា មនុស្សម្នាក់ចិត្តងាយ ឬចិត្តមិនងាយ?
ខាងក្រោមជាយោបល់របស់យុវជន៤នាក់ ដែលមានការសម្គាល់ខុសៗគ្នា។
កញ្ញា សាហ្វាលីន និស្សិតឆ្នាំទី២ ជំនាញទីផ្សារ សាកលវិទ្យាល័យជាតិគ្រប់គ្រង បានឲ្យដឹងថា ធម្មជាតិបុរសជាអ្នកតាមស្រឡាញ់នារី ពិបាកនឹងសម្គាល់ដែរ ប៉ុន្តែអ្វីដែលកញ្ញាធ្លាប់សង្កេតឃើញគឺ បុរសខ្លះឲ្យតែឃើញស្រីៗ ចូលចិត្តឲ្យក្រសែភ្នែកពីចម្ងាយ និងព្យាយាមមានសកម្មភាពឲ្យស្រីៗចាប់អារម្មណ៍ ។
កញ្ញាបាននិយាយយ៉ាងនេះថា៖ “មនុស្សប្រុសចរិតហេ ឧស្សាហ៍បាញ់ភ្នែកទៅរកមនុស្សស្រី ឲ្យឃើញគេស្អាត គឺព្យាយាមមកនិយាយជាមួយគេភ្លាមៗ”។
ចំណែកកញ្ញា ដាលីស និស្សិតឆ្នាំទី២ ជំនាញធនាគារ នៅសាកលវិទ្យាល័យបៀលប្រាយ បានឲ្យដឹងស្រដៀង ហ្វាលីនថា៖ “មនុស្សប្រុសចរិតសាវា និងចិត្តងាយ ដូចតែគ្នា ដូចជាមនុស្សប្រុសខ្លះមានប្រពន្ធ ឬមានសង្សារហើយ កំពុងបណ្ដើរទៀត តែនៅពេលឃើញស្រី តាមឲ្យភ្នែក អត់ឈប់សោះ ឬឲ្យតែមានឱកាសលែបខាយ បោះសំដីភ្លាមៗ ឬដឹងថា គេមានសង្សារហើយក៏នៅតែស្រឡាញ់”។
រីឯ យុវជន បូរ៉ា អតីតនិស្សិតនៅសាកលវិទ្យាល័យមួយ មានស្រុកកំណើតនៅខេត្តកំពង់ចាម មករស់នៅភ្នំពេញជិត៨ឆ្នាំ ជាមនុស្សដែលចូលចិត្តដើរលេងយប់ បានសម្គាល់លើនារីចិត្តងាយវិញថា ស្រីចិត្តងាយ គឺជាមនុស្សស្រីដែលងាយស្រួលទាក់ទង គឺអាចឆាប់ត្រូវរ៉ូវជាមួយបុរសក្នុងរយៈមួយខ្លី តាមរយៈអាកប្បកិរិយា ដូចជាឲ្យកន្ទុយភ្នែក និយាយសំដីបោះពាក្យឌឺដង បណ្ដោយខ្លួនតាមការអូសទាញរបស់បុរស។
ដើម្បីអះអាង ការសង្កេតរបស់ខ្លួន បូរ៉ា បានរៀបរាប់ថា នារីៗដែលចូលចិត្តដើរលេងពេលរាត្រីតែម្ដង ទោះបីមិនដែលស្គាល់គ្នាសោះពីមុនមកក៏ដោយ ពេលឃើញស្រីៗទាំងនោះកំពុងជិះម៉ូតូ ឬនៅកន្លែងកម្សាន្តណាមួយ ពេលឃើញបុរសសម្លឹង នារីនោះដូចជារៀងផ្អើលៗ ងាកឆ្វេងងាកស្ដាំ ឲ្យកន្ទុយភ្នែកបន្តិច ហើយបើបានគេជិះតាមទៀត ធ្វើដូចខ្លួនឯងស្អាតណាស់អីចឹង ប៉ុន្តែមិនយូរប៉ុន្មានគឺចាប់ផ្ដើមបណ្ដោយឲ្យគេតាមញ៉ែភ្លាមៗ។
ផ្ទុយពីអ្នកដទៃ យុវជន កុសល ជាជាងជួសជុលទូរសព្ទនៅផ្សារដេប៉ូ បាននិយាយថា ភាគច្រើនចាស់ៗសម្គាល់លើមនុស្សស្រី ប៉ុណ្ណោះចំពោះរឿងងាយ មិនងាយ ប៉ុន្តែសម្រាប់ប្អូនផ្ទាល់យល់ថា មនុស្សស្រីក៏មានបេះដូងដែរ ដោយសារការស្រឡាញ់ខ្លាំង ទើបមនុស្សស្រីខ្លះសុខចិត្តបញ្ចេញសកម្មភាពមុន ដូចជា តេទូរសព្ទ ឬ ញញឹមដាក់បុរស ធ្វើឲ្យបុរសចាប់អារម្មណ៍ ប៉ុន្តែបុរសខ្លះបែរយល់ថា មនុស្សស្រីនោះ ជាមនុស្សចិត្តងាយទៅវិញ។
កុសលបានបន្ថែមថា៖ “ទេវតាបង្កើតចិត្តមនុស្សឲ្យមានភាពផ្ទុយគ្នាខ្លះ ដែលបុរសខ្លះមានចរិតអៀនប្រៀនច្រើន ដែលចាំបាច់ភាគីខាងស្រី មានសកម្មភាពមុនដែរ ដូច្នេះមិនគួរប្រកាន់ថា ងាយ ឬមិនងាយនោះទេ បើសិនជាពេញចិត្តដែរ ស្រឡាញ់តែម្ដងទៅ”។
ចុះអ្នកវិញសម្គាល់យ៉ាងណាដែរ?
