Pegatron Corp គឺ​​ជា​ក្រុមហ៊ុន​​​មួយ​ក្នុង​ចំណោម​ក្រុមហ៊ុន​ផ្សេងៗ​ទៀត​ដែល​ទទួល​ផលិត​ផ្នែក​ខ្លះៗ​នៃ​ផលិត​ផល​របស់​ក្រុមហ៊ុន Apple ។ ផលិតផល​របស់​ក្រុមហ៊ុន Apple ដែល​ Pegatron Corp ចូលរួម​ផលិត​មាន​ iPhones និង iPads ដូច​អ្វី​ដែល​ប្រិយមិត្ត​តែង​តែ​ឮ​​ហើយ​ថា​ ក្រុមហ៊ុន​ដែល​ទទួល​ផលិត​ ផលិត​ផល​ឲ្យ​ Apple ធំ​ជាង​គេ​នោះ​គឺ Foxconn Electronics Group ។

កាល​ពី​ចុង​សប្ដាហ៍​​មុន​ប្រភព​ពី​ Digitimes បាន​រាយការណ៍​រួច​ហើយ​ថា Apple ទំនង​ជា​ផលិត​ iPhone តម្លៃ​ទាប​ប្រមាណ​ 2.5 ទៅ 3 លាន​គ្រឿង​ ដោយឡែក​ថ្ងៃ​នេះ​យើង​ខ្ញុំ​សូម​ដក​ស្រង់​​នូវ​សេចក្ដីរាយការណ៍​របស់​ទីភ្នាក់ងារ​ព័ត៌មាន​ដ៏​ល្បី​គឺ Reuters ដែល​និយាយ​ទាក់ទង​ទៅ​នឹង​ iPhones តម្លៃ​ទាប​របស់ក្រុមហ៊ុន Apple ។ ប្រភព​ពី​ក្រុមហ៊ុន​ផ្គត់ផ្គង់​របស់​ Apple បាន​ប្រាប់ Reuters ថា​ពេល​នេះ​ក្រុមហ៊ុន Apple កំពុង​តែ​​ផលិត​គំរូ iPhones តម្លៃ​ទាប ហើយ​ប្រភព​ដដែល​នេះ​បាន​បន្ត​ទៀត​ថា​ ទីផ្សារ​គោល​ដៅ​នៃ iPhones តម្លៃ​ទាប​នោះ​ គឺ​ប្រទេស​កំពុង​អភិវឌ្ឍ​ ដូច​ជា​ ចិន និង​ ឥណ្ឌា ជា​ដើម ។ ដើម្បី​ផលិត​ iPhones តម្លៃ​ទាប​នោះ​គេ​ជឿ​ថា​​ក្រុមហ៊ុន Pegatron ត្រូវ​ការ​បន្ថែម​កម្មករ​ចំនួន​ ៤០%​ ទៀត ​លើ​កម្មករ​របស់​ខ្លួន​ដែល​មាន​សព្វថ្ងៃ​ចំនួន ១០០.០០០ នាក់ ។ ​ប្រភព​ផ្គត់ផ្គង់​មួយ​ទៀត​ដែល​មាន​មូល​ដ្ឋាន​នៅ​ប្រទេស​ជប៉ុន​បាន​និយាយ​ថា​ កា​រផលិត​បន្ទះអេក្រង់ iPhones តម្លៃ​ទាប​​នឹង​ត្រូវ​ចាប់​ផ្ដើម​ផលិត​​ក្នុង​បរិមាណ​តិច​នា​ខែឧសភា​នេះ​ ហើយ ដោយឡែក​ការ​ផលិត​ក្នុង​បរិមាណ​ច្រើន​នឹង​ត្រូវ​ធ្វើ​ឡើង​ក្នុង​ខែមិថុនា​ខាង​មុខ​នេះ ។

ប្រធាន​ផ្នែក​ហិរញ្ញវត្ថុ​របស់​ក្រុមហ៊ុន Pegatron បាន​បង្ហើប​ប្រាប់​​ទីភ្នាក់ងារ​ Reuters ថា​ចំនួន​ ៦០% នៃ​ចំណូល​របស់​ក្រុមហ៊ុន​នឹង​ត្រូវ​ទទួល​បាន​នៅ​ឆមាស​ទី២ នៃ​ឆ្នាំ២០១៣ ។ លោក Arthur Liao ដែល​ជា​អ្នក​វិភាគ​ឲ្យ​ក្រុមហ៊ុន​ទីផ្សារ​មូលបត្រ Fubon Securities បាន​មាន​ប្រសាសន៍​ថា ការផលិត​ទូរស័ព្ទ iPhones តម្លៃ​ទាប នឹង​ធ្វើ​ឲ្យ​​ប្រាក់​ចំណេញ​របស់​ Pegatron ស្ថិតក្នុង​កម្រិត​ខ្ពស់ ព្រោះ​ថា​តួ​ធ្វើ​ពី​ប្លាស្ទិក​​របស់​ទូរស័ព្ទ​នេះ​មាន​ភាព​ងាយ​ស្រួល​ផលិត​ជាង​​តួ​របស់ iPhone 5s ដែល​ផលិត​ពី​លោហធាតុ ។ សូម​បញ្ជាក់​ថា​កាល​ពី​មុន​ធ្លាប់​មាន​​ការ​លេច​ចេញ​​នូវ​គំរូ iPhones តម្លៃ​ទាប​ចំនួន​ពីរ​ម៉ូដែល​ គឺ ​មាន​អេក្រង់ 4-inch និង 4.5-inch

ប្រភព​ជា​ច្រើន​រំពឹង​ថា​ ក្រុមហ៊ុន Apple នឹង​បញ្ចេញ​ iPhones តម្លៃ​ទាប​នៅ​ក្នុង​ត្រីមាស​ទី៣ នៃ​ឆ្នាំ២០១៣ នេះ ។ តើ​ប្រិយមិត្ត​ជឿ​ថា​ក្រុមហ៊ុន Apple ពិត​ជា​នឹង​ចេញ​ទូរស័ព្ទទំនើប iPhones តម្លៃ​ទាប​​ក្នុង​ឆ្នាំ២០១៣ នេះ​ដែរ​ឬ​យ៉ាង​ណា? សម្រាប់​ព័ត៌មាន​បន្ថែម​ទៀត​​ដែល​ទាក់ទង​នឹង​ទូរស័ព្ទទំនើប​តម្លៃ​ទាប​របស់​ Apple សូម​ប្រិយមិត្ត​រង់ចាំ​តាមដាន​ជា​មួយ​ពពក ៕

រូបភាព​ iPhones តម្លៃ​ទាប​ដែល​ធ្លាប់​ចេញ​

តើ​ប្រិយមិត្ត​គិត​ថា​ Apple នឹង​ចេញ​ទូរស័ព្ទទំនើប​​តម្លៃ​ទាប​ក្នុង​ឆ្នាំ​នេះ​ឬ​ទេ? សូម​បញ្ចេញ​មតិ​ក្នុង​ប្រអប់ខាង​ក្រោម៖