វត្តមាន Hisense Sero 7 Pro អាចនឹងមានផលិតប៉ះពាល់ដល់ទីផ្សារ Nexus 7
Nexus 7 ជាកុំព្យូទ័របន្ទះស្ដើងដែលកើតឡើងក្រោយកិច្ចសហការរវាងក្រុមហ៊ុន Google នឹង ក្រុមហ៊ុន ASUS ដែលមានអេក្រង់ទំហំត្រឹមតែ 7-inch និងទទួលបានការពេញនិយមច្រើនពីសំណាក់អតិថិជនព្រោះថាវាមានគុណខ្ពស់ មានសមត្ថភាពបំពេញការងារបានច្រើន និងថែមទាំងមានតម្លៃទាបសមរម្យបើធៀបទៅនឹងកុំព្យូទ័របន្ទះស្ដើងរបស់ក្រុមហ៊ុន Apple ឬ Samsung ។
ដោយឡែកសម្រាប់ពេលនេះមានសេចក្ដីរាយការណ៍ថ្មីមួយថាក្រុមហ៊ុនចិនមួយឈ្មោះថា Hisense បានបញ្ចេញនូវកុំព្យូទ័របន្ទះស្ដើងមួយម៉ូដែល មានលក្ខណសម្បត្តិបច្ចេកទេសមិនចាញ់ Google Nexus 7 ហើយថែមទាំងមានតម្លៃទាបជាង Nexus 7 ទៀតផង ។ (ដើម្បីពិនិត្យពីលក្ខណសម្បត្តិបច្ចេកទេសរបស់ Google Nexus 7 សូមចុចទីនេះ) កុំព្យូទ័របន្ទះស្ដើងនោះមានឈ្មោះថា Hisense Sero 7 Pro និងមានលក្ខណសម្បត្តិបច្ចេកទេសដូចខាងក្រោម៖
- អេក្រង់ទំហំ 7-inch
- កម្រិតភាពច្បាស់ 1,280 x 800 pixels
- បច្ចេកវិទ្យាអេក្រង់ IPS HD
- CPU Quad-core 1.3GHz (NVIDIA Tegra 3)
- RAM 1 GB
- អង្គផ្ទុកទិន្នន័យជាប់ម៉ាស៊ីនទំហំ 8 GB (អាចបន្ថែម microSD card)
- មានរន្ធដោត mini-HDMI
- មាន Wi-Fi, Bluetooth, GPS, NFC,.
- កាមេរ៉ាមុខទំហំ 2 MP និង កាមេរ៉ាក្រោយទំហំ 5 MP (Flash)
- ដំណើរការដោយប្រព័ន្ធប្រតិបត្តិការ Android 4.2.1 Jelly Bean
- ថាមពលថ្ម 4,000mAh
បញ្ជាក់៖ ក្រុមហ៊ុន Hisense នឹងចាប់ផ្ដើមចេញលក់កុំព្យូទ័របន្ទះស្ដើងមួយប្រភេទនេះ នាពេលឆាប់ៗខាងមុខនៅលើទីផ្សារសហរដ្ឋដោយផ្ដល់សិទ្ធិចែកចាយកឲ្យក្រុមហ៊ុន Walmart និងលក់ក្នុងតម្លៃចាប់ពី $99 – $149 ។ សម្រាប់ការមកដល់ទីផ្សារកម្ពុជានៃកុំព្យូទ័របន្ទះស្ដើងនេះ នឹងត្រូវនាំចូលដោយក្រោយក្រុមហ៊ុនណានោះគ្មានប្រភពណាបញ្ជាក់នោះទេ ។ សូមប្រិយមិត្តរង់ចាំសាកសួរតាមហាងលក់ទូរស័ព្ទ ឬ កុំព្យូទ័រនានាក្នុងរាជធានីភ្នំពេញ ព្រោះថាបើផ្អែកលើលក្ខណសម្បត្តិបច្ចេកទេសនិងតម្លៃរបស់កុំព្យូទ័របន្ទះស្ដើងនេះ វាពិតជាសមល្មមនឹងប្រើ ៕
