G Note 3 បំពាក់ដោយកាមេរ៉ា 13MP ជាមួយនឹងបច្ចេកវិទ្យា OIS និង Optical zoom
ថ្មីៗនេះក្រុមហ៊ុន Samsung ទើបតែបានប្រាប់ឲ្យដឹងថា ខ្លួននឹងប្រកាសចេញនូវទូរស័ព្ទ Ative ដំណើរការដោយ Windows Phone និង ស្រឡាយ Galaxy ដំណើរការដោយ Android នាថ្ងៃទី២០ ខែមិថុនា នៅក្នុងទីក្រុងឡុងប្រទេសអង់គ្លេស ខាងមុខ។ ដោយឡែកស្របពេលដែលមានការជូនដំណឹងពីក្រុមហ៊ុន Samsung គេក៏ទទួលបាននូវពាក្យចចាមអារ៉ាមថ្មីមួយបានផ្ទុះឡើងផងដែរថា ទូរស័ព្ទទំនើប Galaxy Note 3 នឹងបំពាក់ដោយកាមេរ៉ាទំហំ 13MP ជាមួយនឹងបច្ចេកវិទ្យា OIS និង Optical zoom ។
នៅក្នុងរយៈពេលចុងក្រោយនេះព័ត៌មានដែលគេទទួលបានពីលក្ខណសម្បត្តិពិតប្រាកដរបស់ទូរស័ព្ទទំនើប Galaxy Note 3 រួមមានតែ តួផលិតចេញពីប្លាស្ទិក និងបំពាក់ដោយអេក្រង់ 5.9-inch OLED display (មិនអាចបត់បែនបាន) ប៉ុណ្ណោះ ។ យ៉ាងណាមិញ បើយោងទៅតាមគេហទំព័ររបស់កូរ៉េឈ្មោះ ET News បានឲ្យដឹងថា ទូរស័ព្ទទំនើប Galaxy Note 3 នឹងត្រូវក្រុមហ៊ុន Samsung បំពាក់ដោយកាមេរ៉ាទំហំ 13MP ដូចជា Galaxy S 4 ដែរ ប៉ុន្តែមានបន្ថែមនូវបច្ចេកវិទ្យាកាមេរ៉ា OIS និង Optical zoom ដែលធ្វើឲ្យកាមេរ៉ារបស់ Galaxy Note 3 កាន់តែមានភាពច្បាស់ជាងកាមេរ៉ាដែលមាននៅលើ Galaxy S4 បច្ចុប្បន្ន ។
ប្រភពដដែលបានបញ្ជាក់ថា ថ្វីបើពេលនេះក្រុមហ៊ុន Samsung កំពុងតែបានព្យាយាមធ្វើការបញ្ចូលនូវបច្ចេកវិទ្យា Optical zoom ទៅក្នុងទូរស័ព្ទ Galaxy Note 3 ប៉ុន្តែដោយមានបញ្ហាមួយចំនួនទៅនឹងភាពស្ដើងរបស់ឧបករណ៍ដូច្នេះគំនិតនេះអាចនឹងត្រូវបោះបង់នៅពេលក្រោយក៏ថាបាន ។
ជាការពិតទោះបីជាមិនបានបញ្ចូលនូវ Optical zoom ទៅក្នុងកាមេរ៉ា 13MP របស់ Galaxy Note 3 ក៏ទូរស័ព្ទនេះអាចនឹងមានកាមេរ៉ាដែលជាទីទាក់ទាញផងដែរ ព្រោះថា សូម្បីតែក្រុមហ៊ុន Nokia ក៏កំពុងតែព្យាយាមបញ្ចូលនូវបច្ចេកវិទ្យាកាមេរ៉ា OIS ទៅក្នុងកាមេរ៉ារបស់ទូរស័ព្ទស្រឡាយ Lumia ជំនាន់ក្រោយរបស់គេផងដែរ ៕
