បទយកការណ៍៖ រយៈពេល៨ឆ្នាំ នៃការដឹកនាំរបស់អតីតអភិបាលខេត្ដសៀមរាប លោក ស៊ូ ភិរិន្ទ
កាលពីថ្ងៃចន្ទ ទី២៩ ខែមេសា តំណែងអភិបាលខេត្តសៀមរាបថ្មី ត្រូវ បានប្រគល់ជាផ្លូវការទៅ លោក ឃឹម ប៊ុនសុង ជំនួសលោក ស៊ូ ភិរិន្ទ។ សៀមរាប ជាខេត្ដទេសចរណ៍ប្រសាស្ដ្រដ៏សំខាន់មួយ បន្ទាប់ពីរាជធានីភ្នំពេញ។ ខេត្តដែលសំបូរទៅដោយប្រាង្គប្រាសាទ ជាពិសេស ប្រាសាទអង្គរវត្ត បានទទួលភ្ញៀវទេសចរជាតិ និងអន្តរជាតិ រាប់លាននាក់ ក្នុងមួយឆ្នាំៗ។ដូច្នេះ ការរៀបចំខេត្តមួយនេះ ត្រូវមានការយកចិត្តទុកដាក់ ដើម្បីទទួលបានការកោតសរសើរពីភ្ញៀវទេសចរ។ តើក្រោមការដឹកនាំរបស់ លោក ស៊ូ ភិរិន្ទ ខេត្តសៀមរាប មានការអភិវឌ្ឍ និងមានចំណុចខ្វះខាតអ្វីខ្លះ?
អភិបាលខេត្ដសៀមរាប លោក ស៊ូ ភិរិន្ទ ដឹកនាំតំបន់ទេសចរណ៍មួយនេះ ចាប់ពីឆ្នាំ២០០៦។ ប្រជាពលរដ្ឋមួយចំនួន បានកោតសរសើរនូវស្នាដៃរបស់លោក ដូចជា ការរីកចម្រើនសំណង់ផ្ទះល្វែង សំណង់សណ្ឋាគារធំៗ ផ្លូវក្រាលកៅស៊ូក្នុងក្រុងខ្វាត់ខ្វែង ប្រព័ន្ធធារាសាស្ដ្រ និងសំណង់ជាច្រើនទៀតជាដើម ។
ប្រធានបទ ទំនាស់ដីធ្លី តែងតែកើតឡើង នៅគ្រប់ខេត្តក្រុង ទូទាំងប្រទេស។ ក្នុងរយៈពេលពីរអណត្តិនៃការដឹកនាំរបស់លោក ស៊ូ ភិរិន្ទ ទំនាស់ដីធ្លីក្នុងខេត្តមួយនេះ បានកើតឡើងជាបន្តបន្ទាប់។ សម្រាប់ប្រជាពលរដ្ឋ ដែលរងគ្រោះដោយសារទំនាស់ដីធ្លី បានដាក់ការស្តីបន្ទោសទៅអាជ្ញាធរខេត្ត ជាពិសេសអភិបាលខេត្តសៀមរាប។
ពលរដ្ឋម្នាក់នៅសង្កាត់សាលាកំរើក អ្នកស្រី យិន សៀកឡេង មានបញ្ហាដីធ្លីដ៏រ៉ាំរ៉ៃ និងធ្លាប់បានប្ដឹងផ្ដល់ដល់ខុទ្ទកាល័យ លោក នាយករដ្ឋមន្ដ្រី។ អ្នកស្រី មានប្រសាសន៍ថា ការរស់នៅក្រោមការដឹកនាំរបស់លោក ស៊ូ ភិរិន្ទ រយៈពេលជិត៨ឆ្នាំ អ្នកស្រីទទួលស្គាល់ថា មានកាអភិវឌ្ឍច្រើន ទាំងផ្នែកប្រព័ន្ធធារាសាស្ដ្រ និងហេដ្ឋារចនាសម្ព័ន្ធ។ ស្របពេលនឹងការអភិវឌ្ឍនេះ អ្នកស្រី បានលើកឡើងពីបញ្ហាដីធ្លី ដែលពលរដ្ឋមានទំនាស់ជាមួយក្រុមហ៊ុនឯកជនចម្រោះទឹកស្អុយ ដោយយកកន្លែងទៅអភិវឌ្ឍ។ អ្នកស្រី បានរំលឹកដល់អតីតកាលថា ពួកគាត់ធ្លាប់បានសុំអន្ដរាគមន៍ពីគ្រប់ស្ថាប័នរដ្ឋ តែអាជ្ញាធរខេត្ដមិនបានចេញមុខដោះស្រាយ ៖ "ដូចជារឿងដីធ្លី ដីធ្លីដែលវាស់រំលង ដូចដីខ្ញុំហ្នឹងគឺដីវាស់រំលង អត់មានទំនាស់នឹងអាជ្ញាធរណា ឬក៏យើងទំនាស់ជាមួយបុគ្គលណាទេ អញ្ចឹងពួកខ្ញុំសុំតែឲ្យគាត់ចេញប័ណ្ណសំគាល់សិទ្ធិកាន់កាប់ដីធ្លី ប៉ុន្តែគាត់នៅតែដោះស្រាយមិន មិនទាន់ដោះស្រាយឲ្យពួកយើងខ្ញុំ ហើយច្បាប់ពួកខ្ញុំនេះ បានដាក់ទៅគ្រប់ក្រសួង មានចាប់តាំងពីអាជ្ញាធរ ចៅសង្កាត់ រហូតដល់សាលាក្រុង រដ្ឋសភា ព្រឹទ្ធសភា ចូលទៅខេត្ត ហើយទៅដល់ខុទ្ទកាល័យសម្តេចទៀត"។
ប្រជាពលរដ្ឋមួយចំនួនទៀត លើកឡើងថា ក្រោមការដឹកនាំរបស់អតីតអភិបាលខេត្ដសៀមរាប លោក ស៊ូ ភិរិន្ទ មានជាប់ពាក់ព័ន្ធនឹងការប្រកាន់បក្សពួកនិយម ការលក់សំណង់អគាររបស់រដ្ឋ ជាលេសនឹងការប្ដូរទីតាំង និងអភិវឌ្ឍទីក្រុង ដូចជា សាលាមតេយ្យត្រីកោណ ស្តាតអូឡាំពិក និងអគារមន្ទីរ ។
ពលរដ្ឋដែលរស់នៅក្នុងតំបន់អាជ្ញាធរអប្សរា ក្នុងស្រុកបន្ទាយស្រី អ្នកស្រី នាង ឃុន្នី មានប្រសាសន៍ថា ការដឹកនាំរបស់អតីតអភិបាលខេត្ដ លោកស៊ូ ភិរិន្ទ មិនសូវមានគោរពសិទ្ធិពលរដ្ឋ ជាម្ចាស់ឆ្នោតនោះទេ ហើយការរស់ពួកគេមកដល់ពេលនេះ នៅក្នុងតំបន់អាជ្ញាធរអប្សរា មានបញ្ហាជាបន្តបន្ទាប់។ អ្នកស្រីបញ្ជាក់ថា កន្លងមក អ្នកស្រីបានប្ដឹងអាជ្ញាធរអប្សរាទៅតុលាការ ពីបទរុះរើផ្ទះពលរដ្ឋ ប៉ុន្ដែតុលាការមិនផ្ដល់ភាពយុត្ដិធម៌។ អ្នកស្រីបន្ដ ព្រៃឈើនៅភ្នំគូលេន ក៏ត្រូវបានកាប់បំផ្លាញ ដោយក្រុមយោធា និង បទល្មើសដឹកជញ្ជូនឈើគ្រប់ប្រភេទនៅតាមផ្លូវជាតិលេខ៦៧ កើតឡើងជារៀងរាល់ថ្ងៃ ស្ទើរតែបាក់ផ្លូវ ដោយពុំមានការទប់ស្កាត់ពីអាជ្ញាធរឡើយ ៖ "គាត់ឡើងជាអភិបាលខេត្តថ្ងៃណាមក គឺបទល្មើសព្រៃឈើកាន់តែខ្លាំង គាត់អត់ដែលមានការទប់ស្កាត់ទេ តែបើសិនប្រជាពលរដ្ឋណាហ៊ាននិយាយ គឺគាត់ហ្នឹងអត់ដែលព្រមទទួលថាគាត់ធ្វើអ្វីដែលមិនល្អ ដែលខុសគឺគាត់នៅតែនិយាយថា គាត់ល្អជានិច្ច"។
លោក ស៊ូ ភិរិន្ទ បានចូលនិវត្ដ ទើបតែបញ្ចប់ការដឹកនាំខេត្តសៀមរាបជាផ្លូវការ នៅថ្ងៃទី១ ខែឧសភានេះ ដោយបានទៅកាន់តំណែងជាទីប្រឹក្សាអាជ្ញាធរជាតិអប្សរា។ នៅពេលដឹងថា លោក ស៊ូ ភិរិន្ទ ទទួលបានតំណែងថ្មីនេះ ពលរដ្ឋមួយចំនួននៅក្នុងតំបន់អប្សរា នៅតែបន្ដក្ដីបារម្ភថា បញ្ហានៅតំបន់អប្សរានេះ នឹងមិនត្រូវបានដោះស្រាយនោះទេ។
កាលពីថ្ងៃចន្ទ ទី២៩ ខែមេសា ក្នុងពេលផ្ទេរតំណែងជាផ្លូវការ លោក ស៊ូ ភិរិន្ទ បានថ្លែងតាមរបាយការណ៍ថា ស្នាដៃដែលអាជ្ញាធរខេត្ដធ្វើបានច្រើន គួរឲ្យកត់សម្គាល់ ទាំងផ្នែក ហេដ្ឋារចនាសម្ព័ន្ធ ប្រព័ន្ធធារាសាស្ដ្រ សេវាកម្មទេសចរណ៍ កសិកម្ម និងនៅមានបណ្ដាផ្នែកជាច្រើនទៀត។ លោកបន្ដថា ទីក្រុងសៀមរាប ក៏ត្រូវបានរៀបចំឲ្យក្លាយជាទីក្រុងអច្ឆរិយៈ ដោយក្នុងនោះមានការធ្វើស្ពានឆ្លងស្ទឹងពីរន្លែងផងដែរ ៖ "លទ្ធភាពដែលមានលក្ខណៈងាយស្រួល និងបង្កើនទំនុកចិត្តដល់វិនិយោគិន និងបងប្អូនប្រជាពលរដ្ឋទូទាំងខេត្ត មានលទ្ធភាពប្រកបមុខរបរ និងធ្វើអាជីវកម្មបានយ៉ាងកក់ក្តៅ នៅគ្រប់មជ្ឈដ្ឋានទូទាំងខេត្ត។ បើនិយាយពីព្រឹត្តិការណ៍នៃការរៀបចំវប្បធម៌អាស៊ានបូកបី នៅក្នុងខណៈដែលខេត្តសៀមរាបអង្គរ គឺជាក្រុងវប្បធម៌នៃអាស៊ានបូព៌ាឆ្នាំ២០១២ ព្រឹត្តិការណ៍ពិពណ៌អន្តរជាតិ ក្នុងតំបន់អាស៊ីបូព៌ា តំណាងអរិយធម៌ ជាព្រឹត្តិការណ៍ព្រះពុទ្ធសាសនាដ៏ធំ ជាពិសេសកម្មវិធីអង្គរសង្ក្រាន្តនៅលើទឹកដីខេត្តសៀមរាបនៅពេលថ្មីៗកន្លងមកនេះ"។
អ្នកសម្របសម្រួលអង្គការលីកាដូ ខេត្ដសៀមរាប លោក ចៅ ល័ក្ខវណ្ណា បានទទួលស្គាល់ថា ការដឹកនាំរបស់លោក ស៊ូ ភិរិន្ទ ជាង៧ឆ្នាំ មានការរីកចម្រើនច្រើន តែទំនាស់ដីធ្លី ក៏មានច្រើនផងដែរ។ លោកបន្តថា ពលរដ្ឋដែលមានទំនាស់ដីធ្លី ត្រូវបានសមត្ថកិច្ច ចាប់ដាក់ពន្ធនាគារកន្លងមក មានចំនួន២៩នាក់ និងរងរបួសដោយសារការបាញ់ប្រហារ រហូតធ្លាក់ខ្លួនពិការចំនួន២នាក់។ លោកសង្ឃឹមថា អភិបាលខេត្ដថ្មីដែលចេញពីស្ថាប័នយោធា នឹងជួយកាត់បន្ថយបញ្ហាទំនាស់ដីធ្លី ដោយផ្ដល់សិទ្ធិសេរីភាពច្រើនដល់ពលរដ្ឋនៅពេលតវ៉ាបញ្ហាអ្វីមួយ ៖
តំណែងរបស់លោកស៊ូ ភិរិន្ទ ត្រូវបានបន្ដដឹកនាំដោយ លោក ឃឹម ប៊ុនសុង ជាឧត្ដមសេនីយផ្កាយពីរ នៃស្ថាប័នកងយោធពលខេមរៈភូមិន្ទ។
ការផ្លាស់ប្តូរមុខតំណែងរបស់អភិបាលខេត្តសៀមរាបនេះ បានបន្សល់ទុកនូវទំនាស់ដីធ្លី នៅកន្លែងមួយចំនួន សម្រាប់អភិបាលខេត្ដថ្មី ចេញមុខដោះស្រាយ ដើម្បីទទួលបានការគាំទ្រ និងចូលចិត្តពីប្រជាពលរដ្ឋ ដូចបញ្ហាដីធ្លីនៅឃុំត្បែង ស្រុកបន្ទាយស្រីជាមួយអាជ្ញាធរអប្សរា និងនៅស្រុកវ៉ារិន ជាដើម ។
អភិបាលខេត្ដសៀមរាប ដែលទើបកាន់តំណែងបានមួយថ្ងៃ លោក ឃឹម ប៊ុនសុង មានប្រសាសន៍ថា លោកនឹងដោះស្រាយទៅតាមគោលនយោបាយរបស់រាជរដ្ឋាភិបាល ៖
ប្រជាពលរដ្ឋរំពឹងថា អភិបាលខេត្ដក្រោយនេះ នឹងជួយដោះស្រាយរាល់ទំនាស់ដីធ្លី និងបទល្មើសផ្សេងមិនឲ្យកើតមាន មិនប្រកាន់បក្សពួក ហើយដឹកនាំបែបលទ្ធិប្រជាធិតេយ្យ៕ Via: http://vodhotnews.com/
