សហជីព និងកម្មករ ទាមទារឲ្យគណបក្សគោរពការសន្យាដំឡើងប្រាក់ឈ្នួល
ដោយ ណាត សុភាព និង ស៊ុន ណារិន ថ្ងៃពុធ ទី01 ឧសភា ឆ្នាំ2013 ម៉ោង16:10
ក្នុងឱកាសអបអរសាទរទិវាពលកម្មអន្តរជាតិលើកទី១២៧ ឆ្នាំ២០១៣នេះ ក្រុមកម្មករ បានដើរដង្ហែរក្បួនពីទីលានប្រជាធិបតេយ្យ ទៅរដ្ឋសភាជាតិ ដើម្បីយកញតិ្តទៅដាក់ជូនតំណាងរាស្ត្រ មកពីគណបក្សចំនួនបី គឺគណបក្សប្រជាជនកម្ពុជា គណបក្សសង្គ្រោះជាតិ និងគណបក្សហ្វ៊ុនស៊ិនប៉ិច។ តែនៅព្រឹកមិញនេះ មានតែតំណាងគណបក្សពីរប៉ុណ្ណោះ ដែលបានទទួលយកញត្តិ ដោយមិនមានវត្តមាន គណបក្សប្រជាជនកម្ពុជានោះទេ។
នៅខាងមុខរដ្ឋសភាជាតិ តំណាងរបស់កម្មករ និងមន្ត្រីរាជការ បានអំពាវនាវឲ្យរដ្ឋាភិបាលអាណត្តិថ្មី ដែលនឹងប្រសូត្រឡើងនៅពេលខាងមុខនេះ ត្រូវតែធ្វើតាមការសន្យារបស់ខ្លួន បើពុំដូចនេះទេ ពលរដ្ឋដែលជាម្ចាស់ឆ្នោត នឹងមិនផ្តល់សេចក្តីទុកចិត្តសម្រាប់ការបោះឆ្នោត នៅថ្ងៃទី២៨ខែកក្កដានោះទេ ៖ "ពេលដែលគាត់បានមើលសេចក្តីថ្លែងការណ៍ តើគាត់ហ៊ានសន្យា និងប្តេជ្ញាចិត្តថា ពេលដែលគាត់ជាប់ឆ្នោត គាត់ជួយអ្វីដល់បងប្អូនកម្មករ។ បើអ្នកណាហ៊ានសន្យា យកសេចក្តីថ្លែងការណ៍រួមរបស់យើង យើងត្រូវតែបោះឆ្នោតឲ្យអ្នកហ្នឹងទៅ។ យើងស្នើឲ្យរដ្ឋាភិបាលថ្មី ដំឡើងប្រាក់ខែជូនកម្មករ និយោជិត ឲ្យបាន១៥០ដុល្លារ"។
ស្តាប់សំឡេង៖
ប្រធានសហភាពការងារកម្ពុជា លោក អាត់ ធន់ មានប្រសាសន៍ថា ការដើរដង្ហែរក្បួននេះ ដើម្បីទាមទារឲ្យរដ្ឋាភិបាលជាប់ឆ្នោតអាណ្ណត្តិថ្មី ធ្វើតាមការសន្យារបស់ខ្លួន នឹងទាមឲ្យរដ្ឋាភិបាលដែលប្រសូត្រឡើងចេញពីពលរដ្ឋនោះ ផ្តល់ប្រាក់បៀវត្សរ៍ដល់កម្មករយ៉ាងតិច១៥០ដុល្លារ មន្ត្រីរាជការ ២៥០ដុល្លារ ការបញ្ចុះតម្លៃសាំងមកនៅត្រឹម ៣ពាន់៥រយរៀល១លីត្រ រួមជាមួយលក្ខខណ្ឌការងារមួយចំនួនទៀត។
តំណាងគណបក្សហ្វ៊ុនស៊ិនប៉ិច លោក ទេព នន្នរី មានប្រសាសន៍ទៅកាន់កម្មករថា គណបក្សហ្វ៊ុនស៊ិនប៉ិច គាំទ្រចំពោះសំណើររបស់កម្មករ។ លោកបន្តថា បើគណបក្សហ្វ៊ុនស៊ិនប៉ិចជាប់ឆ្នោត គណបក្សរបស់លោក នឹងធ្វើតាមសំណើររបស់កម្មករ និងពង្រឹងច្បាប់ការងារដែលមានស្រាប់នោះ ឲ្យមានភាពល្អប្រសើរឡើង ៖ "គណបក្សហ៊្វុនស៊ិនប៉ិច ចូលរួមថ្ងៃនេះ សូមគាំទ្រនូវសេចក្តីថ្លែងការណ៍ទាំងអស់ ហើយគណបក្សហ៊្វុនស៊ិនប៉ិច ព្យាយាមចូលរួមដោះស្រាយនូវបញ្ហាទាំងឡាយដែលបងប្អូនកម្មករមាន"។
សម្រាប់អនុប្រធានគណបក្សសង្គ្រោះជាតិ ដែលកើតចេញពីគណបក្សសមរង្ស៊ី និងគណបក្សសិទ្ធិមនុស្ស លោក កឹម សុខា បានសន្យាថា បើគណបក្សប្រឆាំង ឈ្នះការបោះឆ្នោត សំណើររបស់កម្មករ នឹងមានប្រសិទ្ធភាព គឺដំឡើងប្រាក់ឈ្នួលឲ្យកម្មករយ៉ាងតិច១៥០ដុល្លារ និងមន្ត្រីរាជការ ២៥០ដុល្លារក្នុងមួយខែ។ លោកបន្តថា បើគណបក្សសង្គ្រោះជាតិ ធ្វើមិនបាន នឹងលាលែងពីតំណែង ៖ "ខ្ញុំសូមបញ្ជាក់ គណបក្សសង្គ្រោះជាតិធានាឲ្យកម្មករទាំងអស់បាន ១៥០ដុល្លារ បើយើងធ្វើមិនបានយើងចុះចេញពីតំណែងបងប្អូន"។
បើប្រៀបធៀបនឹងប្រទេសផ្សេងៗ ប្រាក់ឈ្នួលកម្មកររបស់កម្ពុជា នៅមានកម្រិតទាបនៅឡើយ។ ប្រាក់ឈ្នួលគោលកម្មករនៅប្រទេសថៃមានចំនួន២៦៣ដុល្លារ ហ្វីលីពីន ២១២ដុល្លារ ឥណ្ឌូនេស៊ី ១៨២ដុល្លារ ប៉ាគីស្ថាន ១៧៤ដុល្លារ វៀតណាម ១៧២ដុល្លារ ស្រីល័ង្ការ ១២០ដុល្លារ។ ចំណែកកម្មករកម្ពុជា ទទួលបានប្រាក់ឈ្នួលគោលតែ៧៥ដុល្លារ តែប៉ុណ្ណោះ៕
មើលវីដេអូបន្ថែមទាក់ទងនឹងទិវាពលកកម្មអន្តរជាតិសូមចុចលើLinkនេះ៖https://www.youtube.com/watch?v=jiyBFCAkpno
