Acer C7 Chromebook នឹងមាននៅលើទីផ្សារនាពេលឆាប់ៗ តម្លៃប្រហែល $199
កុំព្យូទ័រយួរដៃប្រភេទ Chromebook គឺជាកុំព្យូទ័រដែលដំណើរការដោយប្រព័ន្ធប្រតិបត្តិការ Chrome OS របស់ក្រុមហ៊ុន Google ហើយក្រុមហ៊ុនដែលសហការផលិត Chromebook មុនគេនោះគឺ Samsung ។ បន្ទាប់មកទៀតគេក៏សង្កេតឃើញមានក្រុមហ៊ុនមួយចំនួនទៀតដែរដែលមានចំណាប់អារម្មណ៍ក្នុងការផលិត Chromebook ដែលមានដូចជា៖ HP, Lenovo និង Acer ជាដើម ។ បន្ទាប់ពីបានប្រកាសចេញលក់ Chromebook (11.6-inch) ដែលបំពាក់ដោយអង្គផ្ទុកទិន្នន័យប្រភេទ HDD រួចមក ពេលនេះមានព័ត៌មានថា Acer បានប្រកាសចេញ Acer C7 Chromebook ដ៏ថ្មីសន្លាងមួយម៉ូដែលទៀត ដែលបំពាក់ដោយអង្គផ្ទុកទិន្នន័យប្រភេទ SSD និងមានលក្ខណសម្បត្តិបច្ចេកទេសដូចខាងក្រោម៖
- អេក្រង់ទំហំ 11.6-inch
- កម្រិតភាពច្បាស់ 1,366 x 768 pixels
- CPU Dual-core 1.1GHz (Intel Celeron 847)
- RAM 2 GB
- អង្គផ្ទុកទិន្នន័យប្រភេទ SSD ទំហំ 16 GB
- មានបំពាក់ដោយ Wi-Fi 802.11a/b/g/n, USB ports, webcam,.
- ដំណើរការដោយ Chrome OS
សូមបញ្ជាក់ថាកុំព្យូទ័រប្រភេទនេះមានទំហំអង្គផ្ទុកទិន្នន័យមិនធំទេដោយសារតែកម្មវិធីរបស់វាភាគច្រើនត្រូវបានរក្សាទុកនៅលើអ៊ីនធឺណិត ។ ក្រុមហ៊ុនមិនទាន់បង្ហើបឲ្យដឹងពីកាលបរិច្ឆេទជាក់លាក់នៃថ្ងៃចេញលក់កុំព្យូទ័រនេះនៅឡើយទេ ប៉ុន្តែគេជឿថាវានឹងត្រូវបញ្ចេញទៅលើទីផ្សារនាពេលអនាគតដ៏ខ្លីខាងមុខនេះ ជាមួយតម្លៃប្រហែល $199 ៕
