Xiaomi Mi2S ត្រូវបានប្រកាសចេញជាផ្លូវការ (មានល្បឿនលឿនជាង Galaxy S4?)
Xiaomi គឺជាក្រុមហ៊ុនថ្មីរបស់ប្រទេសចិនដែលបានចូលខ្លួនធ្វើការផលិតទូរស័ព្ទទំនើបសម្រាប់ទីផ្សារក្នុងស្រុក ។ ថ្វីត្បិតតែជាក្រុមហ៊ុនថ្មីមែនតែទូរស័ព្ទដែលគេបានផលិតចំនួនពីរម៉ូដែលមុននេះគឺត្រូវបានទទួលការពេញនិយមយ៉ាងច្រើនពីសំណាក់អ្នកប្រើប្រាស់ទូរស័ព្ទទំនើបនៅក្នុងប្រទេសចិន ហើយសម្រាប់ពេលខាងមុនក្រុមហ៊ុន Xiaomi ថែមទាំងមានគម្រោងនឹងធ្វើការនាំចេញនូវផលិតផលរបស់ខ្លួនទៅកាន់តំបន់ទីផ្សារខាងក្រៅផងដែរ ដូចជានៅអាមេរិក និងអឺរ៉ុបជាដើម ។
បន្ទាប់ពីបានប្រកាសចេញទូរស័ព្ទ Xiaomi Mi2 នាចុងឆ្នាំ២០១២ មកពេលនេះក្រុមហ៊ុនទើបតែបានធ្វើការប្រកាសចេញនូវទូរស័ព្ទចំនួនពីរម៉ូដែលផ្សេងទៀតគឺ Xiaomi Mi2S (Xiaomi Phone 2S) និង Xiaomi Mi2A (Xiaomi Phone 2A) ។ ទូរស័ព្ទទំនើប Xiaomi Mi2S ត្រូវបានបំពាក់ដោយអេក្រង់ 4.3-inch IPS display កម្រិតភាពច្បាស់ 1,280x 720 pixels, CPU quad-core 1.7GHz Qualcomm Snapdragon 600, RAM 2GB ។
ដោយឡែកបើយោងទៅតាមក្រុមហ៊ុន Xiaomi បានឲ្យដឹងថា ក្នុងការសាកល្បងល្បឿនដំណើរការនៃទូរស័ព្ទថ្មី Xiaomi M2S ជាលទ្ធផលបានបង្ហាញថា ទូរស័ព្ទនេះមានល្បឿនដំណើរការលឿនជាងទូរស័ព្ទ Samsung Galaxy S4 ដែលបំពាក់ដោយ CPU Snapdragon ផងដែរ ។
លក្ខណសម្បត្តិបែបបច្ចេកទេសរបស់ Xiaomi Mi2S៖
- អេក្រង់ 4.3-inch 720p IPS
- CPU quad-core 1.7GHz Qualcomm Snapdragon 600
- GPU Adreno 320
- RAM 2GB
- កម្រិតភាពច្បាស់ 1,280x 720 pixels
- កាមេរ៉ាក្រោយ 8 MP(សម្រាប់ 16GB) និង 13MP (សម្រាប់ 32GB)
- កាមេរ៉ាខាងមុខ 2 MP
- អង្គផ្ទុកឯកសារជាប់ម៉ាស៊ីន 16GB និង 32GB
- មាន WiFi 802.11 a/b/g/n Bluetooth 4.0 និង NFC
- ថាមពលថ្ម 2,000mAh
- ដំណើរការដោយប្រព័ន្ធប្រតិបត្តិការ MIUI v5 ដែលមានធាតុដើមជា Android 4.1 Jelly Bean
សូមបញ្ជាក់ថា ទូរស័ព្ទទំនើប Xiaomi Mi2S នឹងមានលក់ជាផ្លូវការនាថ្ងៃទី ២៣ ខាងមុខនេះហើយនៅក្នុងទីផ្សារប្រទេសចិនដូចជា តៃវ៉ាន់ និង ហុងកុង ជាដើម ដែលមានតម្លៃប្រហែល $319 សម្រាប់ម៉ូដែលមានអង្គផ្ទុកឯកសារជាប់ម៉ាស៊ីនទំហំ 16GB និង តម្លៃ $367 សម្រាប់ម៉ូដែល 32GB ៕
