កូនអ្នកមានលុយបើកឡានស៊េរីទំនើប ទៅបុកសាំយ៉ុងរបួសមនុស្ស៥នាក់ ហើយស្រែកក្អេងក្អាងរឿងខ្សែទុយោ
ខេត្តសៀមរាប ៖ កូនសំណព្វចិត្តរបស់មហាសេដ្ឋីប្រចាំខេត្តសៀមរាប ម្នាក់បានបើកឡានស៊េរីទំនើប របស់ខ្លួន ក្នុងសភាពស្រវឹងជោកជាំទៅបុកជាមួយឡានមួយគ្រឿងទៀតបណ្តាល ឲ្យមានមនុស្សរងរបួស កាលពីរសៀលថ្ងៃទី២៣ ខែមេសាឆ្នាំ ២០១៣ ត្រង់ចំណុចផ្លូវបំបែកភូមិជន្លង់ ព្រំប្រទល់រវាងសង្កាត់ជ្រាវ និងសង្កាត់សាលាកំរើក ក្រុងសៀមរាប ខេត្តសៀមរាប ហើយជនបង្កបានចុះពីឡានមកស្រែកប្រាប់គេឯងថា នៅសៀមរាបគ្មាននរណាធំជាងខ្លួនឡើយ។សាក្សីបានឲ្យដឹងថា គេឃើញរថយន្តម៉ាកសាំយ៉ុង ១៥កៅអី ពណ៌ស ពាក់ស្លាកលេខ ព្រៃវែង 2A 1002 បើកបរពីទិសខាងជើងទៅត្បូង លុះមកដល់ចំណុចកើតហេតុក៏ស្រាប់តែមានឡានម៉ាករ៉េវហ្វរ ស៊េរីទំនើបមួយគ្រឿង ពណ៌ទឹកប្រាក់ ពាក់ស្លាកលេខ ភ្នំពេញ 2A 7286 បើកបរយ៉ាងលឿនពីលិចទៅកើត ហើយពេលរថយន្តសាំយ៉ុង បន្ថយល្បឿន អ្នកបើកឡាបរ៉េវហ្វរក៏បន្ថយ ល្បឿនដែរ។ ដោយឃើញឡានម្ខាងបន្ថយល្បឿនដូច្នេះ អ្នកបើកបរឡានសាំយ៉ុងក៏បន្តដំណើរទៅមុខទៀត ស្រាប់តែកូនអ្នកមានលុយ មានអំណាចបានបន្ថែមល្បឿនទៅបុកឡានសាំយ៉ុង ពេញទំហឹង ហើយបន្តទៅបុករោងយានដ្ឋាននៅក្បែរនោះ។
ក្នុងហេតុការណ៍នេះ ពុំមានមនុស្សរងរបួសធ្ងន់ធ្ងរ នោះទេ គ្រាន់តែរបួសស្រាល៥ទៅ៦ នាក់ប៉ុណ្ណោះ ហើយអ្នកបើកបរឡានសាំយ៉ុងឈ្មោះ រ៉ី សារ៉ាន់ អាយុជាង២០ឆ្នាំ មានផ្ទុកមនុស្សជិត២០ នាក់ ដែលជាកម្មករត្រូវទៅធ្វើការនៅខេត្តបន្ទាយមានជ័យ។ ចំណែកអ្នកបើកឡានរ៉េវហ្វរ មានឈ្មោះ សាល វណ្ណដា អាយុ២៥ឆ្នាំ ជាកូនរបស់លោក ជា សុភឿត ជាអ្នកមានលុយលំដាប់ខ្ពស់នៅក្នុងខេត្តសៀមរាប។ នៅកន្លែងកើតហេតុគេឃើញឈ្មោះ សាល វណ្ណដា បានស្រែកអួតក្អេងក្អាងក្នុងសភាពស្រវឹងថា នៅក្នុងខេត្តសៀមរាបនេះគ្មានអ្នកណាស្មើខ្លួនទេ មានតែខ្លួនធំជាងគេ មានមីងមាសុទ្ធតែជាអ្នកធ្វើ ការនៅតុលាការ ដូច្នេះកុំចង់ខ្លាំង៕
