ខូចចិត្តមេខ្យល់បោកយកលុយអស់ពីខ្លួន រត់ចូលរថយន្តយីឌុប កិនដាច់ខ្លួនជាពីរកំណាត់
ខេត្តបន្ទាយមានជ័យ ៖ ពលករ ចំណាកស្រុកម្នាក់ ដែលក្ដៅក្រហាយនឹងមេខ្យល់បោកលុយអស់ពីខ្លួន ហើយមកដល់ដីខ្មែរភ្លាម ខូចចិត្តរត់ចូលរថយន្តយីឌុប កិនដាច់ខ្លួនជា២កំណាត់ស្លាប់ភ្លាមៗមួយរំពេច កាលពីវេលាម៉ោង ៥ និង ៥០នាទីល្ងាចថ្ងៃទី២៣ ខែមេសា ឆ្នាំ២០១៣ នៅចំណុចលើផ្លូវជាតិលេខ៦ ពីបន្ទាយមានជ័យ ទៅសៀមរាប ត្រង់ម្ដុំភូមិ-សង្កាត់កំពង់ស្វាយ ក្រុងសិរីសោភ័ណ ខេត្តបន្ទាយមានជ័យ ហើយជនរងគ្រោះបានព្យាយាម ធ្វើអត្តឃាតចំនួន២ដងរហូតបានសម្រេច។ជនរងគ្រោះឈ្មោះ ម៉ម ភឿន អាយុ៣៥ឆ្នាំ រស់នៅភូមិខ្លាធំ ឃុំកំពង់ក្ដី ស្រុកជីក្រែង ខេត្តសៀមរាប មានមុខរបរជាកសិករ ហើយបានចំណាកស្រុកអស់រយៈពេល៥ថ្ងៃ តាមច្រករបៀងប៉ែកខាងត្បូងក្រុងប៉ោយប៉ែត។ រហូតដល់ម៉ោង១០និង៣០នាទី ព្រឹកថ្ងៃទី២៣ ខែមេសា ឆ្នាំ២០១៣ គេឃើញជនរងគ្រោះបានវិលពីប្រទេសថៃ រួចលួចចង.កសម្លាប់ខ្លួនម្ដងរួចមកហើយ តែមិនបានសម្រេច ដោយភ្លាមៗនោះក្រុមប៉ូលិស-ប្រជាពលរដ្ឋ នៅម្ដុំវត្តម៉ុងចិនក្រុងប៉ោយប៉ែត បានជួយសង្គ្រោះនិងធ្វើការអប់រំ។
តាមការរៀបរាប់របស់ជនរងគ្រោះនាពេលនោះបានឲ្យដឹងថា ខ្លួនចង់សម្លាប់ខ្លួនដោយសារគ្មានលុយវិលទៅផ្ទះវិញ ព្រោះមេខ្យល់បោកយកលុយអស់ចំនួនជាង១ពាន់បាត នៅក្នុងទឹកដីថៃនាពេល កន្លងមក។ ដោយមូលហេតុនេះហើយធ្វើឲ្យជនរងគ្រោះស្មុកស្មាញក្នុងចិត្តគិតទៅណា មិនរួច ទើបប៉ងសម្លាប់ខ្លួនបែបនេះ។ ឈ្មោះ ម៉ម ភឿន អង្គុយផឹកស្រា.ស ក្បែរផ្លូវជាតិលេខ៦ ស្ថិតនៅក្នុងក្រុងសិរីសោភ័ណ ហើយ មួយសន្ទុះក្រោយមកមានរថយន្តម៉ាកយីឌុបបើកក្នុងល្បឿនលឿន ពីកើតទៅលិច ស្រាប់តែឈ្មោះ ម៉ម ភឿន បានរត់សំដៅទៅពីមុខរថយន្តនោះ ហើយត្រូវកង់រថយន្តកិនចំកណ្ដាលខ្លួនដាច់ជា២ស្លាប់តែម្ដង ៕
