ក្រុមហ៊ុន Archos ប្រកាសចេញកុំព្យូទ័របន្ទះស្ដើង Arnova 97 G4
Archos គឺជាក្រុមហ៊ុនអេឡិចត្រូនិកដ៏ល្បីមួយរបស់បារាំងនិងទទួលបានភាពល្បីល្បាញតាមរយៈការផលិតកុំព្យូទ័របន្ទះស្ដើងជាច្រើនម៉ូដែល មានគុណភាពអាចប្រកួតប្រជែងនឹងផលិតផលរបស់ក្រុមហ៊ុនផ្សេងៗ ហើយថែមទាំងមានតម្លៃសមរម្យទៀតផង ។
ក្នុងរយៈពេលប៉ុន្មានខែចុងឆ្នាំ២០១២ និងដើមឆ្នាំ២០១៣ នេះ គេសង្កេតឃើញថាក្រុមហ៊ុន Archos បានប្រកាសចេញនូវកុំព្យូទ័របន្ទះស្ដើងរបស់ខ្លួនជាច្រើនម៉ូដែលដូចជាៈ «ក្រុមហ៊ុន Archos ប្រកាសចេញកុំព្យូទ័របន្ទះស្ដើង Archos 80 Cobalt ប្រើប្រព័ន្ធប្រតិបត្តិការ Android», «ក្រុមហ៊ុន ARCHOS ណែនាំកុំព្យូទ័របន្ទះស្ដើងម៉ាក FamilyPad», «ក្រុមហ៊ុន Archos នឹងប្រកាសចេញទូរស័ព្ទទំនើបដែលដំណើរការដោយ Android ក្នុងឆាប់ៗ!», «ក្រុមហ៊ុន Archos ប្រកាសចេញកុំព្យូទ័របន្ទះស្ដើង FamilyPad 2 តម្លៃប្រហែល $389 [វីឌីអូ]» និងកុំព្យូទ័របន្ទះស្ដើងមួយចំនួនទៀត ។ អ្វីដែលគួរឲ្យចាប់អារម្មណ៍នោះគឺកាលពីសប្ដាហ៍មុនក្រុមហ៊ុនដែលធ្លាប់តែជំនាញខាងផលិតកុំព្យូទ័របន្ទះស្ដើងនេះបានចាប់អារម្មណ៍លើទីផ្សារទូរស័ព្ទទំនើប និងបានប្រកាសចេញនូវទូរស័ព្ទទំនើបដែលមានតម្លៃទាបចំនួនបីម៉ូដែល ($100 – $250) ។ បើយោងតាមសេចក្ដីរាយការណ៍របស់គេហទំព័រ Androidauthority បានឲ្យដឹងថាម្សិលមិញ ក្រុមហ៊ុន Archos បានប្រកាសជាផ្លូវការនូវកុំព្យូទ័របន្ទះស្ដើងដ៏ថ្មីសន្លាងមួយម៉ូដែលទៀតគឺ Archos Arnova 97 G4 ដែលមកជាមួយនឹងលក្ខណសម្បត្តិបច្ចេកទេសដូចខាងក្រោម៖
- អេក្រង់ទំហំ 9.7-inch
- កម្រិតភាពច្បាស់នៃអេក្រង់ 1024 x 768pixels
- CPU Dual-core 1.6 Ghz (Cortex-A9)
- GPU Qual-core Mali 400
- RAM 1GB
- ទំហំអង្គផ្ទុកទិន្នន័យជាប់ម៉ាស៊ីនគឺ 8 GB និងអាចបន្ថែម microSD card បានទំហំ 32 GB
- ដំណើរការដោយប្រព័ន្ធប្រតិបត្តិការ Android Jelly Bean
- កាមេរ៉ាមុខនិងក្រោយមានទំហំដូចគ្នាគឺ 2 MP
- មាន Bluetooth, Wi-Fi, អាចភ្ជាប់ទៅកាន់ទូរទស្សន៍ មានរន្ធដោត Mini HDMI និងលក្ខណសម្បត្តិបច្ចេកទេសមួយចំនួនទៀត
ក្រុមហ៊ុន Archos មិនទាន់បង្ហើបឲ្យដឹងទាក់ទងនឹងកាលបរិច្ឆេទចេញលក់ និងតម្លៃរបស់កុំព្យូទ័របន្ទះស្ដើងនេះនៅឡើយទេ ដោយចំពោះតម្លៃប៉ាន់ស្មានសម្រាប់ទីផ្សារអឺរ៉ុបគឺប្រហែល $326 ៕
