របាយការណ៍អង្គការ HRW រកឃើញបញ្ហាទូទៅច្រើននៅតាមរោងចក្រកាត់ដេរកម្ពុជា
អង្គការឃ្លាំមើលសិទ្ធិមនុស្ស (Human Rights Watch) និយាយថា ខ្លួនបានរកឃើញការបំពាន និងការរើសអើងយ៉ាងច្រើនទូលំទូលាយទៅលើកម្មករតាមរោងចក្រកាត់ ដេរកម្ពុជា ដែលផ្គត់ផ្គង់ផលិតផលសម្លៀកបំពាក់ដល់ក្រុមហ៊ុនល្បីៗនៅអឺរ៉ុប និងអាម៉េរិក។
ក្រសួងឧស្សាហកម្ម និងសិប្បកម្មកម្ពុជាឲ្យដឹងថា ស្ដ្រីមានចំនួន៩០%នៃកម្មកររោងចក្រកាត់ដេរជាង៧សែននាក់ ដែលធ្វើការនៅក្រុមហ៊ុនរោងចក្រ១ពាន់២រយកន្លែងក្នុងប្រទេសកម្ពុជា (Credit: ABC Licensed)
របាយការណ៍មួយអំពីវិស័យកាត់ដេរកម្ពុជាលើកឡើងថា ការបំពានលើកម្មករបុគ្គលិករួមមានការយាយីផ្លូវភេទ, ការបំពានផ្លូវកាយ, បរាជ័យក្នុងការបង់ប្រាក់ឈ្នួលអប្បបរមា និងការបណ្ដេញជាលក្ខណៈប្រព័ន្ធចំពោះកម្មការិនីដែលមានផ្ទៃពោះ។
របាយការណ៍ នៃការសិក្សានេះ គឺផ្អែកលើបទសម្ភាសន៍ជាមួយមនុស្សជាង៣៤០នាក់ ក្នុងនោះរួមមានកម្មករ២៧០នាក់ពីរោងចក្រ៧៣កន្លែងនៅភ្នំពេញ និងខេត្ដមួយចំនួនក្បែរភ្នំពេញ។ ក្រៅពីនេះក៏មានការសួរនាំទៅមេដឹកនាំសហជីព, តំណាងរដ្ឋាភិបាល, មន្ដ្រីការពារសិទ្ធិការងារ, សមាគមរោងចក្រកាត់ដេរ និងតំណាងឧស្សាហកម្មកាត់ដេរអន្ដរជាតិ។
លោក Phil Robertson ពីអង្គការឃ្លាំមើលសិទ្ធិមនុស្សនិយាយថា បញ្ហាទាំងអស់នេះត្រូវតែមានការដោះស្រាយជាលក្ខណៈប្រព័ន្ធក្នុង សង្វាក់ផលិតកម្ម និងផ្គត់ផ្គង់។
ក្រសួងឧស្សាហកម្ម និងសិប្បកម្មកម្ពុជាឲ្យដឹងថា ស្ដ្រីមានចំនួន៩០%នៃកម្មកររោងចក្រកាត់ដេរជាង៧សែននាក់ ដែលធ្វើការនៅក្រុមហ៊ុនរោងចក្រ១ពាន់២រយកន្លែងក្នុងប្រទេសកម្ពុជា៕ ប្រភពៈ Radioaustralia
