បុរសខ្លាំងពូទីន៖ រុស្ស៊ីអាចកម្ទេចអាមេរិកដោយប្រើពេលត្រឹមតែកន្លះម៉ោង ឬ តិចជាងនេះ!
ស្ថានភាពនៅទីក្រុងមូស្គូនៅពេលនេះត្រូវបានគេមើលឃើញថា ហាក់មានភាពខុសប្រក្រតី ស្របពេលដែលបុរសខ្លាំងលើលោក លោក វ្លាឌីមៀរពូទីន (Vladimir Putin) អវត្តមានពីសាធារណជនអស់រយៈពេលជាច្រើនថ្ងៃមកហើយនោះ។
នេះបានធ្វើឲ្យពិភពលោកកំពុងដាក់មន្ទិលសង្ស័យថា ប្រធានាធិបតីរូបនេះអាចកំពុងសម្រាកព្យាបាលជំងឺនៅមន្ទីរពេទ្យ អាចត្រូវបានធ្វើរដ្ឋប្រហារ ឬក៏ស្លាប់ ឬក៏អាចកំពុងសម្ងំលាក់ខ្លួនពីសាធារណជនដើម្បីនៅជាមួយស្រីស្នេហ៍របស់លោក។
យ៉ាងណាមិញនេះជារឿងមួយ ប៉ុន្តែបើគេងាកទៅរំលឹកសម្ដីរបស់លោកកាលពីឆ្នាំ ២០១១ នៅក្នុងកំឡុងកម្មវិធីជប់លៀងដ៏ធំមួយក្នុងទីក្រុងមូស្គូវិញ គេនៅចាំបានថា ប្រធានាធិបតីរូបនេះបានបង្ហាញពីអនុភាពមួយគ្មានពីររបស់រុស្ស៊ីក្នុងការវាយកម្ទេចអាមេរិក។
ឆ្លើយតបទៅនឹងអ្នកកាសែតដែលបានចោទសួរលោកក្នុងកម្មវិធីនោះ លោកពូទីនបានមានប្រសាសន៍ដូច្នេះថា៖ «រុស្ស៊ីអាចកម្ទេចអាមេរិកដោយប្រើពេលត្រឹមតែកន្លះម៉ោង ឬ តិចជាងនេះ!»។
កាលនោះលោកនៅកាន់តំណែងជាគណបក្សប្រឆាំងនៅឡើយទេ មុននឹងលោកចូលកាន់តំណែងជាប្រធានាធិបតីរុស្ស៊ីជាលើកទី២ នៅខែមិថុនា ឆ្នាំ ២០១២ ពោលគឺមួយឆ្នាំក្រោយមក ហើយការថ្លែងរបស់លោកនៅពេលនោះ គឺដើម្បីឆ្លើយតបទៅនឹងការអភិវឌ្ឍបច្ចេកវិទ្យាមីស៊ីលអាមេរិក នូវអ្វីដែលលោកយល់ថា កំពុងគំរាមកំហែងសន្តិសុខរុស្ស៊ី។
ផ្អែកតាមសម្តីរបស់លោកមើលទៅវាគ្មានអ្វីដែលគួរឲ្យសង្ស័យថា រុស្ស៊ីគ្មានសមត្ថភាពកម្ទេចអាមេរិកនោះឡើយ ត្បិតអីមហាអំណាចយោធាមួយនេះមានគ្រឿងសព្វាវុធទំនើបៗជាពិសេសមីស៊ីលអន្តរទ្វីប (Intercontinental Missile) ជាច្រើនគ្រាប់ដែលអាចបំពាក់ក្បាលគ្រាប់នុយក្លេអ៊ែរបាញ់ចេញទៅកាន់គោលដៅរបស់សត្រូវនៅជុំវិញភពផែនដីបានក្នុងរយៈពេលដ៏ខ្លី៕
ប្រែសម្រួល៖ ខេវិន
ប្រភព៖ Businessinsider
