ដាំបាយក្នុងព្រលានចាំយន្តហោះ មានពិតនៅប្រទេសចិន
បុរសម្នាក់មកពីខេត្តសានទុង ប្រទេសចិន បានទាក់ទាញចំណាប់អារម្មណ៍ក្រោមក្រសែភ្នែកមនុស្សជាច្រើន ក្រោយបញ្ចេញសកម្មភាពមិននឹកស្មានដល់ គឺដាំបាយដើម្បីទទួលទានក្នុងព្រលានយន្តហោះអន្តរជាតិហុងកុងកាលពីថ្ងៃអាទិត្យកន្លងទៅ។
បន្ទាប់ពីសកម្មភាពនេះ ត្រូវបង្ហោះចូលក្នុងអ៊ីនធឺណិត មនុស្សជាច្រើនបានចែកចាយតគ្នា និងបញ្ចេញមតិយោបល់យ៉ាងក្ដៅគគុកផងដែរ។ ក្នុងចំណោមនោះ មានម្នាក់បានសរសេរថា មានតែចិនដីគោកប៉ុណ្ណោះដែលហ៊ានធ្វើបែបនេះ ហើយគួរតែទទួលបានការកោតសរសើរ។
កាលពីថ្ងៃចន្ទម្សិលមិញនេះ អ្នកយកព័ត៌មានរបស់ Apple Daily បានរកឃើញថា បុរសម្នាក់នោះខកជើងយន្តហោះទៅខេត្តសានទុងវិញ បន្ទាប់ពីត្រលប់មកពីប្រទេសសិង្ហបុរីក្រោយបំពេញការងារសំណង់ចប់។
ក្រោយពេលទិញសំបុត្រយន្តហោះ និងផ្ញើប្រាក់ ៧៥០០យាន់ (ប្រហែល ១២០០ដុល្លារ) ដែលរកបានទៅឲ្យក្រុមគ្រួសារ លោកនៅសល់ប្រាក់ត្រឹមជាង ២០០យាន់ (ប្រហែល ៣២ដុល្លារ) ប៉ុណ្ណោះ។ ពេលរង់ចាំជើងហោះហើរបន្តនៅហុងកុង លោកបានសម្រាកនៅលើកៅអី រួចក៏ភ្លេចខ្លួនលង់លក់ក្នុងដំណេក រហូតខកជើងយន្តហោះ។
បុរសកម្សត់ ត្រូវចំណាយប្រាក់ ២០០ដុល្លារហុងកុង (ប្រហែល ២៦ដុល្លារ) ដើម្បីទិញសំបុត្រយន្តហោះនៅថ្ងៃអង្គារនេះ។ ដោយសារនៅសល់លុយតិចពេក ទើបមិនអាចទទួលទានអាហារនៅក្នុងព្រលានយន្តហោះបាន និងសម្រេចចិត្តដាំបាយដោយខ្លួនឯងតែម្ដងទៅ។
យ៉ាងណាមិញ សកម្មភាពនេះអាចទទួលរងការពិន័យជាប្រាក់ ១០០០០ដុល្លារហុងកុង (ប្រហែល ១៣០០ដុល្លារ) និងជាប់ពន្ធនាគារ ៣ខែ ប្រសិនបើខាងព្រលានយន្តហោះធ្វើការចោទប្រកាន់នោះ៕
