Sony អាចនឹងដកខ្លួនចេញពីជំនួញស្មាតហ្វូន ដោយសាររកចំណេញមិនបាន
ក្រុមហ៊ុន Sony ប្រហែលអាចដកខ្លួនចេញពីការប្រកួតប្រជែងទីផ្សារស្មាតហ្វូនដោយសាររកចំណូលមិនបានដូចការរំពឹងទុក ក្នុងរយៈពេលប៉ុន្មានត្រីមាសជាប់ៗគ្នាកន្លងទៅ។ នាយកប្រតិបត្តិរបស់ក្រុមហ៊ុនអេឡិចត្រូនិកយក្សជប៉ុន លោក Kazuo Hirai បានប្រកាសនៅក្នុងសន្និសីទសារព័ត៌មានមួយថា Sony នឹងលែងមានកំណើនលក់ក្នុងទីផ្សារប្រកួតប្រជែងទូរស័ព្ទដៃតទៅទៀតហើយ។
នៅក្នុងរបាយការណ៍មុន លោក Hirai បានបង្ហើបឱ្យដឹងថា ក្រុមហ៊ុន Sony កំពុងពិចារណាលក់ជំនួញទូរទស្សន៍ និងស្មាតហ្វូនដែលកំពុងត្រដរខ្យល់នេះបាន ដោយសារជំនួញនេះមិនសូវជោគជ័យដូចពេលមុនៗ។ ទោះជាយ៉ាងណា ពេលនេះពុំទាន់មានកិច្ចព្រមព្រៀងទិញលក់ណាមួយធ្វើឡើងនៅឡើយ។
ខណៈកំពុងមានការអភិវឌ្ឍគុណភាពស្មាតហ្វូន Android ខ្លាំងឡើងៗនាពេលបច្ចុប្បន្ន ក្រុមហ៊ុន Sony ក៏មានគូប្រកួតប្រជែងជាច្រើនដូចគ្នា។ ដៃគូដ៏ធំរបស់ Sony ក្រៅពីស្មាតហ្វូនស៊េរីខ្ពស់ៗរបស់ Apple និង Samsung ក៏នៅមានក្រុមហ៊ុនទូរស័ព្ទចិនមួយចំនួនកំពុងអភិវឌ្ឍខ្លួនយ៉ាងមានសន្ទុះជាមួយស្មាតហ្វូនតម្លៃមធ្យម តែលក្ខណៈ សម្បត្តិល្មមប្រើអាចទទួលយកបាន។
ក្រុមហ៊ុន Sony បញ្ចេញក្ដីរំពឹងទុកថា ប្រាក់ចំណេញលើប្រតិបត្តិការប្រចាំឆ្នាំនឹងចំណេញ ៤,២ពាន់លានដុល្លារអាមេរិកនៅឆ្នាំ២០១៨ ខាងមុខ ដែលជាតួលេខកើនឡើងប្រៀបធៀបនឹងរបាយការណ៍ហិរញ្ញវត្ថុក្នុងពេលបច្ចុប្បន្ន។ Sony មានគម្រោងរកប្រាក់ចំណេញពីការវិនិយោគលើផ្នែកនៃជំនួញរបស់ខ្លួន ដូចមានដូចជាការអភិវឌ្ឍ Image sensor និងជំនួញ Sony PlayStation ជាដើម៕
ប្រែសម្រួល៖ លី ឈៀន
ប្រភព៖ wsj
