រកឃើញតំបន់ផ្នូរបុរាណដ៏មហិមានៅអេហ្ស៊ីប បញ្ចុះ Mummy ១ លាននាក់ (មានវីដេអូ)
ក្រុមអ្នកស្រាវជ្រាវបានរកឃើញតំបន់ផ្នូរបុរាណ Fag el-Gamous នៅប្រទេសអេហ្ស៊ីប ដែលបញ្ចុះ «សាកសពអប់ ឬម៉ាម់មី – Mummy» មិនតិចជាងមួយលាននាក់ឡើយ។ ក្នុងចំណោមសពបុរាណ (mummy) ទាំងនោះ អ្នកបុរាណវិទ្យាបានគាស់កកាយបានម៉ាម់មីចំនួន ១៧០០ ដែលត្រូវបានជនជាតិអេហ្ស៊ីបសម័យបុរាណប្រើបច្ចេកទេសអប់ (mummified) ហើយកប់ទៅក្នុងផ្នូរ។
តំបន់នេះស្ថិតនៅចម្ងាយ ៩៦ គីឡូម៉ែត្រពីរដ្ឋធានីគែ (Cairo)។ គេវាយតម្លៃថាតំបន់ផ្នូរបុរាណនេះ មានសាកសពជាលក្ខណៈម៉ាម់មី (mummy) រហូតដល់ជាងមួយលានឯណោះ ហើយកប់ក្នុងផ្នូរធ្វើអំពីថ្មកំបោរ ក្នុងជំរៅដល់ជិត ៣០ ម៉ែត្រទៅក្រោម (កាលសម័យនោះ)។
តាមការវិភាគ សាកសពម៉ាម់មី ទាំងនេះត្រូវគេយកមកបញ្ចុះនៅតំបន់នេះ តាំងពី ១៥០០ ឆ្នាំមុន។ កាលណោះ ប្រទេសអេហ្ស៊ីបត្រូវចក្រភពរ៉ូម (Roman Empire) និងក្រោយមកដោយចក្រភពប៊ីហ្សង់ទីន (Byzantine) ចូលត្រួតត្រា។ ម៉ាម់មីទាំងនេះ ជាសាកសពមនុស្សធម្មតា មិនមែនជាខ្សែរាជវង្ស ឬនាហ្មឺនសព្វមុខមន្ត្រីនោះទេ។ គេរកនឹកមិនយល់ មិនដឹងថាគេដឹកជញ្ជូនសាកសពម៉ាម់មីដ៏ច្រើនលើសលប់មកបញ្ចុះនៅទីនេះ ដោយវិធីណាបើច្រើនម្ល៉ឹងៗ ព្រោះកាលពីសម័យបុរាណ នៅម្ដុំនោះមានភូមិតូចមួយប៉ុណ្ណោះ ចំណែកបុរី Philadelphia ក៏មានកន្លែងបញ្ចុះសពផ្ទាល់ខ្លួនដែរ មិនចាំបាច់យកទៅបញ្ចុះនៅទីនោះទេ។
ទិដ្ឋភាពនៅតំបន់ផ្នូរបុរាណ Fag el-Gamous (ប្រភព៖ BBC)
សាស្ត្រាចារ្យបណ្ឌិត Kerry Muhlestein ដែលបង្រៀននៅសាកលវិទ្យាល័យ Brigham Young University (សហរដ្ឋអាមេរិក) ឲ្យដឹងថាសពបុរាណទាំងនេះ ត្រូវគេបញ្ចុះប្រជ្រៀតគ្នាខ្លាំង ព្រោះគ្រាន់តែផ្ទៃដី ៥ ម៉ែត្រគុណនឹង ៥ ម៉ែត្រជំរៅ ២ ម៉ែត្រ គេបញ្ចុះសពរហូតដល់ ៤០ នាក់។ លោកវាយតម្លៃតាមរូបមន្តគណិតវិទ្យាថា បើគុណនឹងផ្ទៃដីផ្នូរបុរាណនេះ មានម៉ាម់មី (mummy) មិនតិចជាងមួយលាននាក់ទេ។សាកសពដែលបញ្ចុះនៅតំបន់ Fag el-Gamous មិនត្រូវបានរៀបចំហ៊ឹកហ៊ាក់ខ្លាំងដូចសពអ្នកមានបុណ្យទេ។ សពខ្លះត្រូវគេបញ្ចុះផ្ទាល់ដី មិនដាក់មឈូសក៏មាន។
តាមធម្មតា តាមបច្ចេកទេសរបស់អេហ្ស៊ីបសម័យបុរាណ មុននឹងគេធ្វើម៉ាម់មី គេវះកាត់គ្រឿងក្នុងនៃសាកសពចេញពីខ្លួនសពសិន ទើបគេអប់តាមបច្ចេកទេសទំនើប ឲ្យក្លាយជាម៉ាម់មី (mummy) ប៉ុន្តែសាកសពដែលបញ្ចុះនៅតំបន់ Fag el-Gamous មិនដូច្នោះទេ ព្រោះគ្រឿងក្នុងនៅទាំងអស់។ អ្នកវិទ្យាសាស្ត្រសន្និដ្ឋានថាមូលហេតុដែលធ្វើឲ្យម៉ាម់មីទាំងនេះអាចស្ថិតស្ថេរបានមកទល់នឹងពេលនេះ ដោយសារកត្តាបរិស្ថាន និងអាកាសធាតុក្ដៅដែលរក្សាគុណភាពឲ្យនៅបានយូរ។ សាស្ត្រាចារ្យ Muhlestein ឲ្យដឹងថាសាកសពម៉ាម់មីទាំងនោះ ត្រូវគេអប់ដោយប្រើសារធាតុពិសេសៗបំពោកពីក្រៅ ហើយគេយកយកក្រណាត់រុំព័ទ្ធជុំវិញទាល់តែជិតសាច់ទាំងអស់៕
ប្រែសម្រួល ៖ អន សំអាង
ប្រភព ៖ The Daily Mail
ប្រភព ៖ The Daily Mail
