​ក្រុម​ជ្រុល​និយម ISIS បាន​សម្លាប់​មនុស្ស​យក​គ្រឿង​ក្នុង​លក់ ដើម្បី​យក​លុយ​ទៅ​ចិញ្ចឹម​ចលនា​ប្រដាប់​អាវុធ​របស់​គេ។ នេះ​ជា​ការ​អះអាង​របស់​ឯកអគ្គរដ្ឋទូត​អ៊ីរ៉ាក់​ប្រចាំ​អង្គការ​សហប្រជាជាតិ។ លោក​បន្ត​ទៀត​ថា​ជន​រងគ្រោះ​ដែល​ត្រូវ ISIS ចាប់​ជា​ចំណាប់​ខ្មាំង ត្រូវ​ក្រុម​នេះ​វះ​យក​គ្រឿង​ក្នុង (human organs) ជា​ពិសេស​តម្រង​នោម។ គេ​នៅ​មិន​ទាន់​មាន​ឯកសារ​បង្ហាញ​ថា​គ្រឿងក្នុង​ទាំង​នោះ ត្រូវ​ក្រុម​នេះ​យក​ទៅ​លក់​នៅ​ទីណា​ឲ្យ​ពិត​ប្រាកដ​ទេ។

ឯកអគ្គរដ្ឋទូត​អ៊ីរ៉ាក់ ប្រចាំ​អង្គការ​សហប្រជាជាតិ លោក Mohamed Alhakim ​បាន​ឡើង​រាយការណ៍​ និង​ផ្ដល់​សក្ខីកម្ម (testimony) ជូន​អ្នក​តំណាង​អង្គការ​សហប្រជាជាតិ​ប្រចាំ​ប្រទេស​អ៊ីរ៉ាក់។ អំពី​បញ្ហា​នេះ​ជា​ផ្លូវ​ការ នៅ​ចំពោះ​មុខ​ក្រុម​ប្រឹក្សា​សន្តិសុខ​អង្គការ​សហប្រជាជាតិ (UN’s Security Council)។ ​លោក​មាន​ប្រសាសន៍​ថា សាកសព​ដែល​ត្រូវ​ក្រុម ISIS សម្លាប់​ត្រូវ​អ្នក​ជំនាញ​គាស់​ចេញ​ពី​រណ្ដៅ​សាកសព​រួម (mass grave) ​ដើម្បី​ធ្វើ​កោសល្យវិច័យ (autopsy)។ សាកសព​ទាំង​នោះ មាន​ស្នាម​ម្ជុល​ដេរ​រឆេតរឆូត ខ្លះ​បាត់​ថ្លើម (liver) – ខ្លះ​បាត់​តម្រងនោម (kidney)។

​​​បន្ទាប់​ពី​ស្ដាប់​សក្ខីកម្ម​នោះ​រួចរាល់​ហើយ លោកNikolay Mladenov បាន​ធ្វើ​សេចក្ដី​សន្និដ្ឋាន​រួម​ជូន​ក្រុម​ប្រឹក្សា​សន្តិសុខ​អង្គការ​សហប្រជាជាតិ។ លោក​ថា​សេចក្ដី​អះអាង​របស់​លោក​ឯកអគ្គរដ្ឋទូត​អ៊ីរ៉ាក់​អំពី​ក្រុម ISIS វះកាត់​មនុស្ស​យក​គ្រឿង​ក្នុង​លក់​នេះ គឺ​មាន​ប្រភព និង​ឯកសារ​ភស្តុតាង​គ្រប់​គ្រាន់​បញ្ជាក់​ថា​ពិត​ជា​យ៉ាង​ដូច្នេះ​មែន។

កាលពី​ឆ្នាំ២០១៤ សារព័ត៌មាន Al-monitor ចុះ​ផ្សាយ​ថា​គ្រូពេទ្យ​បាន​វះកាត់​យក​គ្រឿង​ក្នុង​មនុស្ស​នៅ​ទីក្រុង Mosul ប្រទេស​អ៊ីរ៉ាក់។ វេជ្ជបណ្ឌិត​ម្នាក់​ជា​ជនជាតិ​អ៊ីរ៉ាក់ ឈ្មោះ Siruwan al-Mosuli ដែល​បាន​​ទម្លាយ​អាថ៌កំបាំង​អំពី​ក្រុម ISIS វះ​កាត់​យក​គ្រឿង​ក្នុង​មនុស្ស​ទៅ​លក់។

លោក​បាន​ឲ្យ​ដឹង​ថា​សកម្មភាព​គ្រូពេទ្យ​នៅ​តាម​គ្លីនិក​ឯកជន នៅ​ទីក្រុង Mosul ហាក់​ដូច​ជា​ផុលផុស និង​ពុះកញ្ជ្រោល​សម្បើម​ណាស់ មិន​ដឹង​គេ​ធ្វើ​ស្អី​ខ្លះ​ទេ នៅ​ក្នុង​ហ្នុង។ គ្រូពេទ្យ​ខាង​វះកាត់ ទាំង​គ្រូពេទ្យ​ក្នុង​ស្រុក នៅ​តំបន់​អារ៉ាប់ និង​គ្រូពេទ្យ​មក​ពី​ស្រុក​ឆ្ងាយ ត្រូវ​គេ​ជួល​សម្រាប់​វះកាត់​មនុស្ស ប៉ុន្តែ​ត្រូវ​គេ​ហាម​ដាច់​ខាត មិន​ឲ្យ​ទាក់ទង​ជាមួយ​គ្រូពេទ្យ​ទូទៅ​ទេ។ ​

សកម្មភាព​នេះ​ប្រព្រឹត្ត​ទៅ​ជា​ខ្សែ​សង្វាក់ និង​មាន​រចនា​សម្ព័ន្ធ​ត្រឹម​ត្រូវ​របស់​គេ ព្រោះ​បន្ទាប់​ពី​វះ​យក​គ្រឿង​ក្នុង​រួច​ហើយ គេ​មាន​ខ្សែបណ្ដាញ​របស់​គេ​ចូល​ទៅ​ដឹក​ជញ្ជូន​យក​ចេញ​ទៅ​ក្រៅ ដើម្បី​លក់​បន្ត​លើ​ទីផ្សារ​អន្តរជាតិ។ តាម​ព័ត៌មាន​​ចុងក្រោយ ដែល​ទើប​តែ​ទទួល​បាន បាន​បង្ហាញ​ថា អង្គការ​សហប្រជាជាតិ​បាន​ជំរុញ​ឲ្យ​​ពិនិត្យ​មើល និង​​​ស៊ើបអង្កេត​ករណី​ជួញដូរ​គ្រឿង​ក្នុង​មនុស្ស​នេះ និង​ករណី​ដែល​ថា​គ្រូពេទ្យ​ជា​ច្រើន​ត្រូវ​ក្រុម ISIS សម្លាប់​ចោល ដោយ​សារ​តែ​គ្រូពេទ្យ​មិន​ធ្វើ​តាម​បង្គាប់​​ និង​​ការ​បញ្ជា​របស់​គេ៕

ប្រែ​សម្រួល ៖ អន សំអាង

ប្រភព៖​ Russia Today , The Daily Mail , CNN , newsweek magazine