​យន្តហោះ​ដឹក​អ្នក​ដំណើរ​មួយ​គ្រឿង​របស់​ក្រុមហ៊ុន​​អាកាសចរណ៍ EasyJet បាន​ចុះ​ចត​ជា​បន្ទាន់​ក្នុង​គ្រា​អាសន្ន បន្ទាប់​ពី​ត្រូវ​ភ្លើង​ឆេះ នៅ​អាកាសយានដ្ឋាន Manchester។ អ្នក​ដំណើរ​ម្នាក់​ដែល​ជិះ​នៅ​ក្នុង​យន្តហោះ​បាន​ឃើញ​ហេតុ​ការណ៍​មិន​ស្រួល ហើយ​បាន​ប្រាប់​ទៅ​បុគ្គលិក​នៅ​ក្នុង​យន្តហោះ។​

​យន្តហោះ​នោះ​មាន​ជើង​ហោះហើរ EZY1877 ដែល​បាន​ចេញ​ដំណើរ​ទៅ​កាន់​តំបន់ Bilbao ប្រទេស​អេស្ប៉ាញ (Spain)។ លុះ​ជួប​ស្ថានភាព​បែប​នេះ ក៏​ហោះ​បត់​ក្បាល​ត្រឡប់​ក្រោយ​វិញ​ទៅ​កាន់​អាកាសយានដ្ឋាន Manchester។

​អ្នក​ដំណើរ​នៅ​ក្នុង​យន្តហោះ​បាន​ប្រាប់​គ្នា​ថា​គេ​ធុំក្លិន​ផ្សែង​ឆួល​នៅ​ក្នុង​យន្តហោះ​។ អ្នក​ដំណើរ​ម្នាក់​រៀបរាប់​ថា ៖ គាត់​ឃើញ​ក្រុម​បង្ការ​អគ្គិភ័យ​ដាក់​ពង្រាយ​បុគ្គលិក​តាម​ផ្លូវ​ហោះ​ហើរ ចំណែក​យន្តហោះ​ដែល​ប្រុង​ចេញ​ដំណើរ ត្រូវ​គេ​កាក់​ទុក​សិន (stopped)។

អ្នក​នាំពាក្យ​ក្រុមហ៊ុន EasyJet និយាយ​ថា ​ក្រុមហ៊ុន​សូម​បញ្ជាក់​ឲ្យ​កាន់​តែ​ច្បាស់​ថា​យន្តហោះ EZY1877 ​នោះ​បាន​ហោះ​បក​ក្រោយ​វិញ ជា​លក្ខណៈ​បង្ការ​ក្រែង​ជួប​គ្រោះ​ថ្នាក់ បើ​បាន​ជា​មាន​មនុស្ស​ធុំ​ក្លិន​ផ្សែង​ឆួល​នៅ​ក្នុង​យន្តហោះ​ទៅ​ហើយ។ ចុង​ក្រោយ​នេះ គេ​ទទួល​ដំណឹង​ថា​យន្តហោះ​បាន​ចុះ​ចត​ដោយ​សុវត្ថិភាព គ្មាន​អ្នក​ណា​រង​របួស​អ្វី​ទាំងអស់៕

មាន​ព្រឹត្តិការណ៍​ដាច់​ដោយ​ឡែក​មួយ​ទៀត ទាក់​ទង​នឹង​យន្តហោះដែរ។ នារី​ម្នាក់​ជា​ភ្ញៀវ​ជិះ​យន្តហោះ​របស់​ក្រុមហ៊ុន​អាកាសចរណ៍ Alaska Airlines ត្រូវ​សត្វ​ខ្ទួយ​ទិច​ឡើង​ហើម​ពេញ​ខ្នង​ដៃ។ នាង Annie Simone ​ប្រាប់​ថា​នាង​ត្រូវ​បាន​ខ្ទួយ​ទិច​ម្រាម​ដៃ​កណ្ដាល​ដៃ​ស្ដាំ​។ ខ្ទួយ​នោះ​មិន​ដឹង​ចេញ​ពីណា​មក លឿន​នោះ​លឿន ហើយ​បាន​ទិច​តែ​ម្ដង។ នាង​ប្រាប់​ថា​នាង​បាន​សម្លាប់​ខ្ទួយ​មួយ​ក្បាល​នោះ​គ្មាន​ប្រណី​ដៃ​ទេ។ អ្នក​នាំ​ពាក្យ​ក្រុមហ៊ុន​សុំ​មិន​និយាយ​អ្វី​ទាំង​អស់ ព្រោះ​គាត់​មិន​អាច​បកស្រាយ​ចេញ មិន​ដឹង​ខ្ទួយ​នោះ​ឡើង​ទៅ​លើ​យន្តហោះ​តាម​វិធី​ណា ហើយ​ហេតុ​ដូចម្ដេច​ក៏​មាន​ខ្ទួយ​នៅ​ក្នុង​យន្តហោះ៕

ទស្សនា​នារី​ដែល​ត្រូវ​ខ្ទួយ​ទិច​រៀបរាប់​

ប្រែ​សម្រួល ៖ អន សំអាង

ប្រភព៖​ The Daily Mail