ស្ដាប់ការរៀបរាប់របស់អ្នកនៅរស់ពីព្រឹត្តិការណ៍ដ៏រន្ធត់ពេលយន្តហោះតៃវ៉ាន់ធ្លាក់
ក្នុងចំណោមជនរងគ្រោះក្នុងឧបទ្ទវហេតុធ្លាក់យន្តហោះតៃវ៉ាន់ម៉ាក ATR-72-600 កាលពីថ្ងៃពុធនោះ មានអ្នកនៅរស់រានមានជីវិតម្នាក់បានរៀបរាបអំពីព្រឹត្តិការណ៍នោះឡើងវិញយ៉ាងពិស្ដារ។ លោកហួងជីនស៊ុន (Huang Jin-sun) ជាអ្នករួចជីវិតក្នុងគ្រោះថ្នាក់នោះបានរៀបរាប់ថាគាត់បានស្ដាប់ឮសំឡេងនៅក្បែរនោះ ហើយគាត់ទទួលអារម្មណ៍ថា ស្ថានភាពនៅក្នុងយន្តហោះ ហាក់មិនសូវស្រួលតាំងពីដំបូងដៃម៉្លេះ។
លោកអ៊ំហួងជីនស៊ុន (Huang Jin-sun) អាយុ ៧២ ឆ្នាំ ស្ថិតក្នុងចំណោមអ្នកនៅរស់ទាំង ១៥ នាក់ពីគ្រោះថ្នាក់ធ្លាក់យន្តហោះចូលទឹកទន្លេកាលពីថ្ងៃពុធ ទី៤ កុម្ភៈ។ តាមពិត យន្តហោះ ATR-72-600 គ្រាន់តែចាប់ចេញដំណើរពីអាកាសយានដ្ឋានភ្លាម គឺភ្លើងបានឆាបឆេះភ្លាមៗផងដែរ។ អ្នកបើកយន្តហោះក៏បានស្រែកខ្លាំងៗថា «យន្តហោះត្រូវភ្លើងឆេះហើយ! យន្តហោះត្រូវភ្លើងឆេះហើយ!»។ នេះបើយោងតាមមន្ត្រីអាកាសចរណ៍ស៊ីវិលមួយរូបដែលសុំមិនប្រាប់ឈ្មោះ។
លោកអ៊ំហួងជីនស៊ុន (Huang Jin-sun)បន្តថាលោកឃើញអ្នកជិះក្នុងយន្តហោះបានលង់ទឹក ហើយប្រសិនបើគាត់មិនប្រញាប់ជួយអ្នកទាំងនោះទាន់ពេលទេ ប្រហែលជាស្លាប់ជាមិនខាន។ លោកគ្រីសលីន (Chris Lin) ឲ្យដឹងថាប្រសិនបើពេលយន្តហោះត្រូវភ្លើងឆេះ ហើយពីឡុតមិនរហ័សបើកយន្តហោះចូលទឹកទន្លេទេ ប្រហែលអ្នកជិះក្នុងយន្តហោះ គ្មានអ្នកណានៅរស់ទេ៕
ប្រែសម្រួល ៖ អន សំអាង
ប្រភព៖ ទូរទស្សន៍ CBS
